Read Car_Nicobarese YÔNA 3 Bible Online

YÔNA 3 - Car_Nicobarese bible

YÔNA 3

¹Yih ngaich ngam ṙô ngam Mā Tēv nö in Yôna im innët heuh, nö ngö ṙô,

²Chōholre, kuṙòh kiröönngöre chuh Ninĕvē hū-a in e hūkö ngam minkahten tinölô meh tö chu.

³Lökten nö chōholre Yôna, ngaich kiröönngöre nö chuh Ninēvĕ, sā ṙô ngam Mā Tēv. Yöng tökiröng ök Ninēvĕ nö elpanam, tölūï sumkam rô-òlkūö kinröönö.

⁴Ngaich Yôna nö hĕng sumkam röön nö kiröön ngaich mölnö kuhēthötre nö el ngam panam, Hū-a ngaich anga-aṅ, nö ngö ṙô, Höng fëntöre anāi nup sakāmö,ngaich min Ninēvĕ nö tiṙōli.

⁵Ṙātö ellōn re ngaich yik tarik aṅ Ninĕvē nö im Tēv; ahangkö inhīkö cha-a ngaich, kahūmöre ngaich tö sāk, löktökūö tökiröng tö cha söl i manā-angkūö ṙôngòng cha.

⁶Ngaich nuk inhānga nö sölta nö ik rācha aṅ Ninēvĕ, chōholre ngaich anga-aṅ nö ṙā-ag el ök kantēra re nö rācha, ṙātö nuk inyut re inrē nö ṙā-ang ò, kahūmöre ngaich anga-aṅ tö sāk, ūichhakṙen ngaich nö el tisum.

⁷Ahānga ngaich anga-aṅ pirātngö e inrē nö Ninēvĕ nö i chöngö ök rācha chöngö yik mā ò inrē, nö ngö ṙô, Un rēhĕn tarik uh rēhĕn töṙeūla, nūa pököre inrē, nö kalahkö nya-aṅkūö; hökngen u un nyā-aṅvkūö, un rēhĕn nö òk mak;

⁸Hökngen u pöri nö kahūmö tö sāk, tarik hĕnghöre töṙeūla inrē, hökngen u tö cha inrē nö kalē-ĕṙô nö peuinyhökūö ngam Tēv: hôṅ hökngen u tö cha inrē nö kö havööngö kūö re nö ṙā-ang i tötlöök talöököre, ṙā-ang i chanökhuṙen öp eltī cha.

⁹Chīāp tö-akahalōn tö ngam Tēv min lohten nö havöötökūöre nö ṙā-al lōnre, ngaich havööngökūöre nö ṙā-ang im tökiröng lanīnöre, hòṅ hī öt lëlngö?

¹⁰Ngaich ngam Tēv nö meuk nuk la-en cha, pò cha nö havööngökūöre nö ṙā-ang in nuk öt lanöökö cha; ngaich ngam Tēv nö ṙā-al lōnre tö ngam tötlöök, ök ṙô ò tī ò nö in cha; ngaich rö-ö anga-aṅ nö tīten tö e.