Read Car_Nicobarese YÔNA 4 Bible Online

YÔNA 4 - Car_Nicobarese bible

YÔNA 4

¹Pōyen tī pöri angū-ö nö kunya-halōn tī tö Yôna, līn ngaich anga-aṅ.

²Vë-ekūö ngam Mā Tēv ngaich anga-aṅ, nö ngö ṙô, Ō Mā Tēv, vë-ekūö meh chin, röh öng angū-ö nö ṙô chu, hēchu ṙòngmö i panam re? Lökten chu kumeūingöritre falgöre chuh Tarsis; pò chu akahalōn tö meh tö-aṙē-ĕlōn öm Tēv, tööḵlö inrē tö miṙēlōnre, tötveūtö lanīnö, töpōyen neūkölōn inrē, mahavanrit lōnre nö ṙā-ang tötlöök.

³Ō Mā Tēv, hayāichtôre chin vë-ekūö meh, lökten töngamuh, kēngö ngih nômö chu ṙā-ang in chu; tön ĕhten chin kapah töre aṅ.

⁴Ngö ṙô ngaich ngam Mā Tēv, kiröngö lanīnö ömeh?

⁵Kunyī-inyre ngaich Yôna; nö ṙā-ang el panam, ūichngöre ngaich nö lā chuhöt tö elpanam, in e anga-aṅ inrē nö vī rūkui re, ūichngöre ngaich nö ël e nö el tönyat, hanöng saha mat ò nö meuk lāinyngen ngam elpanam.

⁶Ngaich ngam Mā Tēv nö halēn ök katū, ngaich vīten e nö sīöplö nö i kui Yôna, pòn hōtu nö nyat kui ò, nö ṙānyen ò ṙā-ang im tötlööok inlahen ò. Lökten Yôna nö kiröngö ṙanāmölōn tök katū.

⁷Hĕng nòng pöri ök halēnngö ngam Tēv kata-ĕm hē ngam peuheū im tahëng sakāmö, kat ngam katū ngaich anga-aṅ, nyangngö ngaich anga-aṅ.

⁸Ngaich ngö inlahen angū-ö, hē maneutlö ngam tavūöi, ngam Tēv nö halēnlö ök tönyô kuföt chuhöt; ngaich ngam tavūöi nö ṙāchö tī tö kui Yôna, tö lökten ò nö chaṙīvi, ngaich havëkö kinpahare anga-aṅ, nö ngö ṙô, Ĕhten chin kapah töre aṅ.

⁹Ngö ṙô ngaich ngam Tēv tö Yôna, Kirööngö lanīnö ömeh tökūö ngam katū? Ngaich ngö ṙô anga-aṅ, Huveū-eu lanīnö chin söl kinpaha.

¹⁰Ngaich ngö ṙô ngam Mā Tēv, Aṙē-ĕlōn man tö ngam katū ngam töt halinten meh, öt rēhĕn nö asīöpö tö meh: ngam tösīöp tö hatööm, ngaich nyangngö tö hatööm.

¹¹Uh öich chū-ö aṙē-ĕlōn tö Ninēvĕ, ngam tökiröng elpanam; ngam chūök yip tömötlö ṙôngö tö töhēngòng nët anāi köṅny tarik yip tötkô nö akah lahāmöre lātavē re inrē; pōyen nup nuā inrē?