Read Car_Nicobarese KINṘEŪKÖ 1 Bible Online

KINṘEŪKÖ 1 - Car_Nicobarese bible

KINṘEŪKÖ 1

¹Ngaich ngam Mā Tēv nö vë-ekūö Môsös nö elinchōn i Sināi, nö el rūkui manūlö, im raneh sakāmö ngam innëtö chingëṅt, im innëtö samyeūheu unôichrit cha nö kunyī-inyre nö ṙāngö panam Aikup, nö ngö ṙô,

²Kēḵ ṙôken yip kūön Israĕl man nö ṙòkhöre, i mupīhö cha, i mitī-i yöng cha, sā tūmö nup minë-eny cha, keuheūtlöre kikōnyö, i miyöngö cha;

³Löktökūö tö nët anāi samyeūheu ṙēti söl tulöng, ṙòkhöre yip tökô in Israĕl nö kiyung, kaheūkö cha më-eṅ Āròn inrē i kiteūm cha.

⁴In meh min inrē hĕng tak tarik aṅ i tum miyöngö cha; hĕng tak mākūö aṅ patī öp yöng ò.

⁵Në nun minënyö vē tarik tösökhak min nö in meh: aṅ in Rūpön, Ēlīsör ök kikōnyö kūön Sĕtē-ör.

⁶Aṅ in Simōn; Selūmi-ĕl ök kikōnyö kūön Sūrisattai.

⁷Aṅ in Yūtā; Nāsön ök kikōnyö kūön Amminatap.

⁸Aṅ in Issakār; Netenī-ĕl ök kikōnyö kūön Sūar.

⁹Aṅ in Sepulön; Ēliāp ök kikōnyö kūön Hilòn.

¹⁰Aṅ in yik kūön Yôsĕf: aṅ in Ifrēm; Ēlisamā ök kikōnyö kūön Amihöt: aṅ in Manasē; Kamēli-ĕl ök kikōnyö kūön Pītahsör.

¹¹Aṅ in Penyamin; Epiten ök kikōnyö kūön Kitī-ōnī

¹²Aṅ in Tën; Ēhīēsör ök kikōnyö kūön Ammisattai,

¹³Aṅ in Asēr; Pāki-ĕl ök kikōnyö kūön Òkren.

¹⁴Aṅ in Kāt; Ēlī-asaf ök kikōnyö kūön Tū-ĕl.

¹⁵Aṅ in Naftalī; Ahīrā ök kikōnyö kūön Inön.

¹⁶Cha-a yin vē töhavëtu aṅ i yik ṙôngö tarik, nö mākūö miyöngö aṅ i yik yöng cha; cha-a yin kui yik tököṅnyu aṅ Israĕl.

¹⁷Ngaich kēḵ yik tarik nā Môsös nā Āròn yik tö vënyu minë-eny.

¹⁸Ngaich cha-a nö hamūl yik ṙôngö yik tarik nö ṙòkhöre im raneh sakāmö ngam innëtö chingëṅt, ngaich cha-a nö i mupīhöre ṙô nö vë-eny lökngöritre, nö löktökūö patī yöngre tö kikōnyö tūmö nup minë-eny, löktökūö tö nët anāi samyeūheu ṙēti söl tulöng, i miyöngö cha.

¹⁹Sā tinöölô Môsös tö ngam Mā Tēv, ngatī anga-aṅ ngaich nö kaheūkö cha nö elinchōnngö Sināi.

²⁰Ngaich yik kūön Rūpön, ök lanòh kūön Israĕl, vē tumkölchap cha i mupīhö cha, i mitī-i yik yöng cha tö kikōnyö, sā tūmö nuk minë-eny, i miyöngö cha, ṙòkhöre yik kikōnyö löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

²¹Cha-a yip tö kaheuklöng nö ngaich, aṅ i miyöngö Rūpön, fën anāi tafūöl köny taneūyòng.

²²Aṅ in yip kūön Simōn, i tumkölchap cha, i mupīhö cha, i mitī-i yöng cha tö kikōnyö, yip tö ngaich nö kaheuklöng sā tūmö nuk minë-eny, i miyöngö cha, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

²³Cha-a yip tö kaheuklöng nö ngaich, aṅ i miyöngö Simōn, taneui anāi machūötöre köny lūöyòng.

²⁴Aṅ in yip kūön Kāt, i tumkölchap cha, i mupīhö cha, i mitī-i yöng cha tö kikōnyö, sā tūmö nuk minë-eny, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

²⁵Cha-a yip tö kaheuklöng nö ngaich, aṅ i miyöngö Kāt, fën anāi taneui köny tafūölòng taneui anāi.

²⁶Aṅ in yip kūön Yūtā, i tumkölchap cha, i mupīhö cha, i mitī-i yöng cha tö kikōnyö, sā tūmö nuk minë-eny, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

²⁷Cha-a yip tö kaheuklöng nö ngaich, aṅ i miyöngö Yūtā, sat anāi fën köny tafūölòng.

²⁸Aṅ in yip kūön Issakār, i tumkölchap cha, i mupīhö cha, i mitī-i yöng cha, i mitī-i yöng cha tö kikōnyö, sā tūmö nuk minë-eny, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

²⁹Cha-a yip tö kaheuklöng nö ngaich, aṅ i miyöngö Issakār, taneui anāi fën köny fënòng.

³⁰Aṅ in yip kūön Sepulön, i tumkölchap cha, i mupīhö cha, i mitī-i yöng cha tö kikōnyö, sā tūmö nuk minë-eny, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

³¹Cha-a tö kaheuklöng nö ngaich, aṅ i miyöngö Sepulön, taneui anāi sat köny fënòng.

³²Aṅ in yip kūön Yôsĕf, nö aṅ i yip kūön Ifrēm, i tumkölchap cha, i mupīhö cha, i mitī-i yöng cha tö kikōnyö, sā tūmö nuk minë-eny, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

³³Cha-a yip tö kaheuklöng nö ngaich aṅ i miyöngö Ifrēm, fën anāi köny taneūyòng.

³⁴Aṅ in yip kūön Manasē, i tumkölchap cha, i mupīhö cha, i mitī-i yöng cha tö kikōnyö, sā tūmö nuk minë-eny, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

³⁵Cha-a yip tö kaheuklöng nö ngaich, aṅ i miyöngö Manasē, lūöi anāi nët köny nëtòng.

³⁶Aṅ in yip kūön Penyamin, i tumkölchap cha, i mupīhö cha, i mitī-i yöng cha tö kikōnyö, sā tūmö nuk minë-eny, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

³⁷Cha-a yip tö kaheuklöng nö ngaich, aṅ i miyöngö Penyamin, lūöi anāi taneui köny fënòng.

³⁸Aṅ in yip kūön Tën i tumkölchap cha, i mupīhö cha, i mitī-i yöng cha tö kikōnyö, sā tūmö nuk minë-eny, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

³⁹Cha-a yip tö kaheuklöng nö ngaich, aṅ i miyöngö Tën, tafūöl anāi nët köny sātòn.

⁴⁰Aṅ i yip kūön Asēr, i tumkölchap cha, i mupīhö cha, i mitī-i yöng cha tö kikōnyö, sā tūmö nuk minë-eny, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö;

⁴¹Cha-a yip tö kaheuklöng nö ngaich aṅ i miyöngö Asēr, fën anāi hĕngköny taneūyòng.

⁴²Aṅ in yip kūön Naftalī, i tumkölchap cha, i mupīhö cha, i mitī-i yöng cha tö kikōnyö, sā tūmö nuk minë-eny, löktökūö tö nët anāi samyeūheu ṙēti söl tulöng, ṙòkhöre yip tökô nö chuh i kinyūngö:

⁴³Cha-a yip tö kaheuklöng nö ngaich, aṅ i miyöngö Naftalī, taneui anāi lūöi köny fönòng.

⁴⁴Cha-a yin vē tö kaheuklöng nö ngaich, vē kaheuklö nā Môsös nā Āròn, tö vē mākūö Israĕl inrē; nëtsīön tak; kö köhĕng tak yin nö aṅ i mitī-i yöngre tö kikōnyö.

⁴⁵Lökten cha nö ṙòkhöre yik tö kaheuklöng aṅ i yik kūön Israĕl, i mitī-i yöng cha tö kikōnyö, löktökūö tö nët anāi samyeūheu ṙēti söl tulöng, ṙòkhöre yip tökô in Israĕl nö chuh i kinyūngö;

⁴⁶Cha-a yik tö kaheuklöng nö ṙòkhöre tafūölòng lūöi köny taneuyòng taneui anāi.

⁴⁷Hö-ö pöri yik Lēvī nö kaheuktu nö in cha nö i miyöngö yöngre tö kikōnyö.

⁴⁸Pòn ngö ṙô ngam Mā Tēv nö vë-ekūö Môsös,

⁴⁹Höng yip miyöngö Lēvī tö un kaheuktu tö meh, uh më-eṅ rēhĕn kētö nup ṙôken cha nö i yip kūön Israĕl;

⁵⁰Vīten yip kūön Lēvī pöri më-eṅ nö hayōm öp inrūkui minkahngö kanô-en, hayōm chehen e inrē nö ṙòkhöre, tö nup töng aṅ in e inrē nö ṙòkhöre; keun öp inrūkui min cha-a, tö nup chehen e inrē nö ṙòkhöre, meukṙen e cha-a min inrē, ane inrē iyöngtöre nö havīlö ngam inrūkui.

⁵¹Yē ngam inrūkui nö kiröönngöre, ngaich yip Lēvī min nö teuklö e: ane inrē yē ngam inrūkui nö vītu, ngaich asöklö e min yip Lēvī: ngaich yip yamihtöre min aṅ tahëng nö haröhtöre, kumpahaivah min.

⁵²Ngaich yip kūön Israĕl min nö vītö rūkuire, kö köhĕng tak tarik, ip elyöngöre, kö köhĕng tak tarik inrē ip pantēra ò, sā ṙôngö cha.

⁵³Yip Lēvī pöri min vītö chūökre nö havīlö ngam inrūkui minkahngö kanô-en, hòn öt lanīnu min nö i kui yip ṙôngö kūön Israĕl: ngaich yip Lēvī min nö hayōm ngam inrūkui ngam minkahngö kanô-en.

⁵⁴Ngaich ngatī yik kūön Israĕl; sā ṙô ngam Mā Tēv nö tölṙô Môsös ngatī cha-a.