Read Car_Nicobarese KINṘEŪKÖ 13 Bible Online

KINṘEŪKÖ 13 - Car_Nicobarese bible

KINṘEŪKÖ 13

¹Ngaich ngam Mā Tēv nö vë-ekūö Môsös, nö ngö ṙô,

²Tīnngö tarik man, hòṅ cha nö ulāikö matre töp panam Kanā-aṅ, öp kahëtö Chu in yip kūön Israĕl: kö hĕng tak tahīnngö më-eṅ tö aṅ i miyöngö yik yöng cha, nö kö mā-aṅ aṅ in cha.

³Ngaich ang Môsös nö tīnngen cha nö ṙā-ang el inchōn i Pēran sā chöngö ngam Mā Tēv: ṙòkhöre cha-a nö mākūö yik kūön Israĕl.

⁴Në nun minënyö cha: Samuā kikōnyö kūön Sakūr, aṅ i miyöngö Rūpön.

⁵Sāfat kikōnyö kūön Hōrī, aṅ i miyöngö Sūmon.

⁶Kalĕp kikōnyö kūön Yĕfuneh, aṅ i miyöngö Yūtā.

⁷Ikal kikōnyö kūön Yôsĕf, aṅ i miyöngö Issakār.

⁸Ōsiā kikōnyö kūön Nön aṅ i miyöngö Ifrĕm.

⁹Paltī kikōnyö kūön Rafū, aṅ i miyöngö Penyamin.

¹⁰Katti-ĕl kikōnyö kūön Sōtī, aṅ i miyöngö Sepulön.

¹¹Kātī kikōnyö kūön Sūsī, aṅ i miyöngö Yôsĕf, ngam miyöngö Manasē.

¹²Amī-ĕl kikōnyö kūön Kamalli, aṅ i miyöngö Tën.

¹³Satūr kikōnyö kūön Maiköl, aṅ i miyöngö Asēr.

¹⁴Nahpī kikōnyö kūön Vopsī, aṅ i miyöngö Naftalī.

¹⁵Kū-ĕl kikōnyö kūön Makī, aṅ i miyöngö Kāt.

¹⁶Anū-ö nun në minë-nyö yik tarik tahīnngö Môsös nö ulāikömatre tök panam. Ngaich Môsös nö kaheūkö Ōsiā kikōnyö kūön Nön nö Yôsuā.

¹⁷Ngaich Môsös nö tīnngen cha nö ulāikö mat re töp panam Kanā-an, ngaich ngö ṙô tö cha, Kuṙòh kiröönngöre yin lök el ngih talöökö lamöktö lā lòhngö, ngaich peūlöre i kui minë rôngö:

¹⁸Ngëichkö ngam panam tö sitih öng; ngëichkö yip tarik inrē mi-iyöng in e, yē cha nö tökalēḵ hēḵ yĕn tötkalēk, yē cha nö öt pōyen hēk yĕn pōyen;

¹⁹Ngëichkö inlahen ap panam tö-iyöngö tö cha, yē e nö tökôlò hēk yĕn tötkôlò; nup elpinnāmen cha inrē chūök cha nö iyöng, yĕn elyöngö, hēk yĕn el tökeung chūökö.

²⁰Öp inlahen ap panam inrē, yē e nö tötëḵ hēk yĕn tö iyāich, yĕn chōnu in e, hēk yĕn rö-ö. Uh yī-ö pinhë-eṅvkūö inrē, kumtö nup ṙòng chōn aṅ ngam panam inrē. Hē nup ṙòng angkūr mu-urĕhnyi nganāvö an angū-ö hē e.

²¹Kiröönngöre cha-a ngaich, ngaich ulāikö matre töp panam löktökūö el inchōnngö Sin söl Rēhop, tölngö ip lökhöt i Hamāt.

²²Ngaich cha-a nö kiröönngöre nö löktö lòhngö, ngaich sölta nö i Hepṙòn; ngaich umuh yik Ahīman, Sēsai; Talmai inrē, yik kūön Anāk. (Tövīlöng öp Hepròn nö sat samyeūheu urĕh tö Sōān öp i Aikup.)

²³Ngaich cha-a nö sölta nö el achāṙö Ĕsköl, ngaich cha-a nö ṙal ök pak töhĕng tum aṅ rōi tö angkūr, ngaich kaneūnu cha-a nö nëtö kūö nö keun, kumtö anār inrē cha-a, anychīr inrē.

²⁴Kaheūkö ök minë-eny e angū-ö chūökö nö achāṙö Ĕsköl, kūö ök töhĕng tum ök ṙahal tö yik kūön Israĕl umuh.

²⁵Havan cha-a ngaich nö ṙāngö unlāikö matre töm panam, unôichrit töfën anāi sakāmö.

²⁶Kiröönngöre cha-a nö ngaich, ngaich yih nö in Môsös, in Āròn, in yik ṙôngö kūön Israĕl inrē nö ṙòkhöre, el inchōnngö Pēran, nö i Kātēs; kumtö nup ṙô cha-a nö in cha, nö in yik ṙôngö yik tarik nö ṙòkhöre, hameuktö uk ṙòng chōn ngam panam inrē nö in cha.

²⁷Ngaich vë-eny nang ò cha-a nö ngö ṙô, Tachta in ip panam öp chūök tinīnngö ih tö meh, kô-en öp nö töhëmö aṅkūö tö aṅteh hönī inrē; ngih ön yih ṙòng aṅ in e.

²⁸Tökalēḵ pöri yip tarik mi-iyöng ip panam, kalonglöng inrē nup elpinnāmen, nö kiröng: ane inrē īhö meuk yip kūön Anāk nö umuh.

²⁹Iyöng im lā lòhngö panam yip Amelek: iyöng i kui rôngö Hitāit, Yēpus, Amôr inrē: iyöng lā kūö mai inrē yik aṅ Kanā-an, teutngö chūök inrē nö i kui Yôtön.

³⁰Ngaich Kalēp nö tahngö ṙô yik tarik nö i kūö Môsös, nö ngö ṙô, Tā-a töi ngaich kē-ĕ e ilööṙen kiröönngöre: tön kô-òren in mihôiṅ tö e.

³¹Ngaich pöri yik tarik yik hol ò nö kiröönngöre nö ngö ṙô, Ötkô in kiröönngöre la-al yip tarik; pò cha nö kalēḵ tö hī.

³²Ngaich cha-a nö chōichö ṙô nö eūkö ngam panam nö i yik kūön Israĕl ngam chahöh cha nö ulāikenre, nö ngö ṙô, Ap panam, öp tölökö ël tö ih öi ulāikö, matre tö e, panam ap kamāngö aṅkūöre; ngaich yip tarik inrē maheuṅk ih in e nö tömarôlòng nö tarik.

³³Meuk yip Nefil in inrē, (yip kikōnyö kūön Anāk, yip hakūöntö yip Nefil:) ngaich īhö tö matre höng sā mufākö, ngatī ṙēti öi i kūö cha.