Read Car_Nicobarese KINṘEŪKÖ 15 Bible Online

KINṘEŪKÖ 15 - Car_Nicobarese bible

KINṘEŪKÖ 15

¹Ngaich ngam Mā Tēv nö vë-ekūö Môsös, nö ngö ṙô,

²Vë-ekūö yip kūön Israĕl, ngö ṙô tö cha, Yē yīö sölhöt ip panam elyöngö yīö, öp kahëtö Chu in yīö,

³Ngaich min öi kētö tökētu löktö i kūö tameūyö i ngam Mā Tēv, töföngö tökētu, hēk öp töchūöku kinlēḵngô, hēk öp kanahanglōn tökētu, hēk ip tölēnlö tökiröng nyinā-aṅ, vinīlö tahūsa im Mā Tēv, aṅ i nup kiteūmö töhĕng mihëṅṙö töṙeūla, hēk aṅ i kiteūmö töṙōl mihëṅṙö töṙeūla:

⁴Ngaich anga-aṅ min nö kētö tökētu nö i ngam Mā Tēv, öp nyā-aṅ tökēṭu, hĕnghata i tösöm i töhĕng tö efa (3 Kilokrām) tavī-i, öp töfën tit ṙôken i töhĕng hin (2 Lītöör), kahëtö ò nö i ngam Mā Tēv.

⁵Vāin inrē tö-ôkö tökētu, fën tit ṙôken i töhĕng hin (2 Lītöör), halēnö u min më-eṅ hol töföngö tökētu hēk inrē öp töng kētu, i töhĕng nòng kōiny sīṅp.

⁶Hēk öp töhĕng nòng kun kōiny sīṅp, halēn öp nyā-aṅ më-eṅ tökētu nët i tösöm öp töhĕng efā (3 Kilokrām) töpahīöy atra kalūöichö tö tavī-i öp tölūöi tit i töhĕng hin:

⁷Ane inrē ip tö-ôkö tökētu ngaich më-eṅ kētö öp tölūöi tit vāin i töhĕng hin (2 Lītöör), nö tötahūsa nö i ngam Mā Tēv.

⁸Yē meh halēn öp köiny nuā nö töföngö tökētu, hēk tökētu, nö kinheūṅtngen öp töchūöku kinlēḵngô, hēk nup tökētu inlāmö nö i ngam Mā Tēv:

⁹Ngaich anga-aṅ min nö kētö hol ngam kōiny nuā tö nyā-aṅ tökētu, lūöi tit i tösöm i töhĕng efā (3 Kilō) töpahīöya atra kalūöichö tö tavī-i ròngti i töhĕng hin (2 Litör).

¹⁰Ngaich më-eṅ min ketö tö-ôkö tökētu vāin ròngti i töhĕng hin (2 Lītöör), ip tökētu nö löktökūö tameūyö, tötahūsa nö i ngam Mā Tēv.

¹¹Ngatī inlahen tī i töhĕng nòng kōiny nuā, hēk i töhĕng nòng kōiny kūön sīṅp, hēk i töhĕng nòng kōiny sīṅp, hēk i nup tökūöṅnö kūön.

¹²Sā tum nòng nup halēnken yīö min, ngaich kö ngatī tī yī-ö min i töhĕng, sā tum nòng u.

¹³Ṙòkhöre yip tökayôḵnyu nö i patī min nö ngatī tī sā inlahen ngih, i kinëtö öp tökētu nö lökten i kūö tameūyö, öp tötahūsa nö i ngam Mā Tēv.

¹⁴Ngaich hē öp aṅ tahĕng nö iyöng in yīö hēk inrē öp töng mī-in yīö i tumkölchap yīö, ngaich hòṅ kētö tökētu nö löktö i kūö tameūyö, öp tötahūsa nö i ngam Mā Tēv; nö sā tī yīö, ngaich kô-òren anga-aṅ.

¹⁵Hĕng öp chöngö in yīö, ip manūlö, ane inrē ip aṅ tahëng mī-iyöng in yīö, hĕng öp chöngö nöng örheūheu i tumkölchap yīö: sā yīö yī-ö, ngatī min ngòh aṅ tahëng nö i kūö ngam Mā Tēv.

¹⁶Hĕng öp chöngö min nö in yīö, tö yip aṅ tahëng inrē yip mī-iyöng in yīö.

¹⁷Ngaich ngam Mā Ṭēv nö vë-ekūö Môsös, nö ngö ṙô.

¹⁸Vë-ekūö yip kūön Israĕl, ngö ṙô tö cha, Yē yīö yih ip panam öp chūök yīö kētu tö Chu,

¹⁹Ngaich nö ngö min angū-ö, hē yīö nyā rôtī aṅ ngam panam, ngaich kētö tökētu min yī-ö töhatāilöngö i ngam Mā Tēv.

²⁰Aṅ ip tökaṙôta atra kēk tökētu min töyīö nö tö hatāilöng nö tökētu: sā tī yīö ṙung hatāilö tökētu el chūök pinṙōngö ṙòng, ngatī yī-ö min hatāilö e.

²¹Aṅ ip raneh tökaṙôta atra nö kētu min tö yīö i ngam Mā Tēv, töhatāilöng nö tökētu, i tumkölchap yīö.

²²Ngaich yē yīö min lōḵngen öt haköpkö në chöngö inrē nö ṙòkhöre, në ṙô ngam Mā Tēv nö in Môsös,

²³Në hachöngten ngam Mā Tēv nö in yīö nö löktö eltī Môsös, löktökūö im sakāmö hē ngam Mā Tēv nö kētu chöngö, unôichngöre inrē i tumkölchap yīö;

²⁴Ngaich angū-ö min, yē e nö öt vaīchö kinëka alaha, nö öt akahalōn yip tömaṙôngö, ngaich hĕng nòng öp kun kōiny nuā töföngö tökētu, tī yip tömaṙôngö nö ṙòkhöre, nö tötahūsa nö i ngam tö-ôkö inrē, sā ngam chöngö, hĕng nòng inrē öp kōiny pököre, tökētu kūö tökööl.

²⁵Ngaich min öp kūönṙô nö vī inlām tökööl yip tömaṙôngö kūön Israĕl nö ṙòkhöre, ngaich aṙēlöngö min cha-a; pò e nö lanôḵngen, ngaich cha-a inrē nö kētö inlöökre, nö im Mā Tēv nö lökten i kūö tameūyö, ane inrē öp tökētu nö i kūö ngam Mā Tēv kūö tökööl cha kūö lanôḵngen cha:

²⁶Ngaich ṙòkhöre min yip ṙôngö kūön Israĕl nö aṙēlöngö tö yip aṅ tahëng inrē mi-iyöng in cha; pò e nö öt töhutölhangṙen tö tī yip tarik nö ṙòkhöre.

²⁷Yĕn hĕng tak öp tarik tö amahaiṙen nö köölöfālen, ngaich min anga-aṅ nö kētö kan pököre aṅ im raneh samyeūheu, nö tökētu kūö tökööl.

²⁸Ngaich min ngam kūönṙô nö vī inlām tökööl ngam tarik tölōḵngen, hē ò nö öt hutölhangṙen nö köölöfālen nö i kūö ngam Mā Tēv, ngaich vī inlām tökööl ò anga-aṅ; ngaich aṙēlöng min anga-aṅ.

²⁹Hēngö chöngö yin min tö ò ngam töt hutölhangṙen, tö ò inrē ngam tökayôḵnyu nö i patī yip kūön Israĕl, tö ngam aṅ tahëng inrē, ngam mī-iyöng in cha.

³⁰Ngam tarik pöri tamölngenre pòrô nö töfötnyu nö i patī hēk inrē pòrô nö aṅ tahëng anga-aṅ mahachōichngö minë-eny ngam Mā Tēv; ngaich anga-aṅ min tarik nö rökiṙen nö i yip tarik ò.

³¹Pò ò nö ha-āichngen ṙô ngam Mā Tēv, filalngö ngam chöngö ò inrē; röökiṙen an min anga-aṅ tarik nö ahāti, i kui ò min öp tökööl ò.

³²Hē yik kūön Israĕl nö ṙòngmö elinchōn, kôtökūö cha-a ngaich tök tarik nö hamūl ngòh hē el töhet sakāmö.

³³Ngaich cha-a yik tökôtökūö töp maha mūl ngòh nö kēten ò nö in Môsös in Āròn inrē, i yip ṙôngö tarik inrē nö ṙòkhöre.

³⁴Kalonghöt ò cha-a ngaich, pòn öl nö vënyu öp lānyngen ò min.

³⁵Ngaich ngö ṙô ngam Mā Tēv tö Môsös, Hòṅ kumpaha ön ngòh tarik: ṙòktöre tī yip min ṙôngö tarik nö kulëhan tö ihong nö la uk ngam elyöngö.

³⁶Ngaich ṙòkhöre yik ṙôngö tarik nö kēnyen ò nö lā uk ök elyöngö, ngaich kulëhan nö aṅtī tö ihong, kapah ngaich anga-aṅ; sā tinöölô Môsös tö ngam Mā Tēv.

³⁷Ngaich ngam Mā Tēv nö vë-ekūö Môsös,nö ngö ṙô,

³⁸Vë-ekūö yip kūön Israĕl, tölṙô cha nö vī tanū taseū hilāre i tumkölchap cha, vītö ngam tölingūṅ mat tökuvāha cha-a inrē tanū taseū ngam hilā.

³⁹Ngaich tanū min angū-ö, hòṅ yīö ngëichkö e, ngaich fēḵĕlre tö nup chöngö ngam Mā Tēv nö ṙòkhöre, ngaich la-evṙen tö u; hòṅ yīö öt tömrit kulōnre minë mat yīö inrē, nö öt tömrit nup töha-eh töchōich tahömken yīö.

⁴⁰Hòṅ yīö köpölōn la-evṙen inrē tö nup chöngö chu nö ṙòkhöre, ngaich het yī-ö i ngam Mā Tēv re.

⁴¹Chū-ö Chin Mā Tēv, Tēv yīö kamënyen yīö ṙā-ang ap panam Aikup, Öich Tēv yīö: Chū-ö Chin Mā Tēv: Tēv yīö.