Read Car_Nicobarese KINṘEŪKÖ 18 Bible Online

KINṘEŪKÖ 18 - Car_Nicobarese bible

KINṘEŪKÖ 18

¹Ngaich ngam Mā Tēv nö ngö ṙô tö Āròn, Keun tökööl ngam töhet chūök man tö yip kikōnyö kūön meh, holkūöre min tö yip aṅ patī ap yöng meh: keun tökööl re yī-ö öi kūönṙô inrē.

²Më-eṅ tö yip kikōnyö kūön meh öi holkūöre, yip mak-alaha meh min inrē, miyöngö Lēvī, öp miyöngö öp yöng meh kikōnyö, kēten cha nö röhta nö in meh, hòṅ cha nö mūlta nö in meh, meukṙen meh inrē: më-eṅ pöri tö yip kikōnyö kūön meh hol meh min nö i kūö ngam rūkui minkahngö kanô-en.

³Ngaich cha-a min nö hayōmö meh, höng uh pöri cha-a nö haröhtöre nö i minë chūökṙen ngam töhet chūök, im tahāklö inrē, hòṅ cha nö öt kapah, ötrēhĕn cha-a ötrēhĕn yī-ö.

⁴Ngaich hamūltu cha-a min nö in meh, ngaich hayōm ngam rūkui manūlö, nup vahīṙen ngam rūkui inrē nö ṙòkhöre: öt yihtöre inrē öp aṅ tahëng min nö röhta nö in yīö.

⁵Ngaich yī-ö min hayōm ngam töhet chūök, tö ngam tahāklö inrē: hòn öt hēk öp tanāinyö nö i kui yip kūön Israĕl.

⁶Yĕh meuk, tö chu, öich ngaich kē yip mak alaha yīö yip Lēvī nö ṙā-ang i yip kūön Israĕl: inlōntö meh yip, nö kētu nö i ngam Mā Tēv, nö i nup vahīṙen rūkui manūlö.

⁷Ngaich më-eṅ tö yip kūön meh kikōnyö inrē nö hol meh öi haköp ngam chūök kūönṙô min i nup tökeuheūttöre im tahāklö, in u inrē nup lā ël ngam ranangkūö; meukṙen yī-ö min inrē: kē-ĕkūö yīö chin tö ngam chūök kūönṙô nö sā inlōnti mineukṙen: öp aṅ tahëng yamihtöre nö röhta kumpahaivah mīnö.

⁸Ngaich ngam Mā Tēv nö vë-ekūö Āròn, Yĕh meuk, tö Chu, Öich kē-ĕkūö meh tö inyōmö nup tö hatāilöng tökētu nö in Chu, ṙòkhöre nup tö ahetlöng aṅ i yip kūön Israĕl, in meh tī Chin tö u nö kūö meh tö hachāmö kui, i yip kikōnyö kūön meh inrē, nö sā lumnööṙö cha nö örheūheu.

⁹Më-eṅ meh an angū-ö min nö aṅ i nup tölngö töhet, töṙālöng nö i kūö tameūyö: ṙòkhöre nup kahëtö cha, ṙòkhöre nyā-aṅ kahëtö cha, ṙòkhöre inrē kahëtö cha kūö tökööl cha, ṙòkhöre inrē kahëtö cha kūö fālen cha, nup tī cha min nö in cha, tölngö töhet min nö in meh i yip kikōnyö kūön meh inrē.

¹⁰Sā kūö re më-eṅ nyā-aṅ u nö tölngö töhet: nyā-aṅ u min yip kikōnyö: töhet min angū-ö nö in meh.

¹¹Më-eṅ meh an angū-ö; ngam kahëtö cha inlōnti tö hatāilöng, ṙòkhöre inrē yip kūön Israĕl tökuvāyö kinëti: kētö u Chin in meh, in yip kikōnyö kūön meh, in yip kikōnyö kūön meh, in yip kikānö kūön meh inrē hol meh, nö lumnööṙö örheūheu: ṙòkhöre yip töt mūmu el patī meh nyā-aṅ e min.

¹²Ṙòkhöre nup tölngö tölöök tavī-i, ṙòkhöre inrē nup tölngö tölöök ṙòng angkūr, sāiny inrē, nup lanòh lòng u kahëtö cha nö i ngam Mā Tēv, in meh tī chin kētö u.

¹³Nup lanòhlòng chōn nö ṙòkhöre i panam cha, nup kahëtö cha nö i ngam Mā Tēv, më-eṅ meh min anū-ö; ṙòkhöre yip töt mūmu el patī meh nyā-aṅ u min.

¹⁴Ṙòkhöre nup tökētu i Israĕl nö më-eṅ meh min.

¹⁵Ṙòkhöre nup lamöknyö el chūök kanūönö, nup alaha, kahëtö cha nö i ngam Mā Tēv, hĕng höre tarik töṙeūla inrē, min nö më-eṅ meh: öp lanòh pöri tarik havaha tö meh nö ṙāyu, nup lanòh inrē aṅ i nup töhet töṙeūla havānö tö meh nö ṙāyu.

¹⁶Nup töhavāntö tö meh nö ṙāyu löktökūö töhĕng chumngëṅtö ṙētī, sā öp tölngö ṙāi ò tö lōn meh, ṙāi tö rupīö (chantī) tö taneui siköl sā siköl ngam töhet chūök, tösā nup tönët anāi kērah.

¹⁷Nup lanòh pöri kōiny nuā, hēk lanòh sīnp, hēk lanòh pököre un havānö tö meh nö ṙāyu; töhet nun anū-ö: kicheny nup mahām u min më-eṅ el ngam tahāklö, ngaich föng nup tösangöö u min më-eṅ nö tökētu lökten i kūö tameūyö, nö tötahūsa nö im Mā Tēv.

¹⁸Më-eṅ meh min nup alaha u tö ngam elngòh tökuvāilöng tö ngam takeun lahāmö inrē, më-eṅ meh min angū-ö.

¹⁹Ṙòkhöre nup tö hatāilöng tökētu aṅ i nup töhet, nup kahëtö yip kūön Israĕl nö i ngam Mā Tēv, kētö u chin ngaich in meh, in yip kikōnyö kūön meh, in yip kikānö kūön meh inrē in meh, nö lumnööṙö meh örheūheu: sāl an kinlēḵngô nö tö-örheūheu nö in meh i kūö ngam Mā Tēv in yip kūön meh inrē nö in meh.

²⁰Ngaich ngö ṙô ngam Mā Tēv tö Āròn, Hö-ö man më-eṅ in cha amīnu tö taṙeūḵ, ötrēhĕn öm minchööḵövö in cha: Chū-ö Chin minchööḵö meh amin meh inrē i yip kūön Israĕl.

²¹In yip kūön Lēvī, yĕh meuk, ngaich chin kētö nup töhĕng i tösöm in Israĕl nö amin ò, nö invahlö nup mineukṙen tö cha nö kūönkūö, nö i vahīṙen ngam rūkui manūlö.

²²Ngaich töngamuhangen yik kūön Israĕl nö öt yih nö röhta nö im rūkui manūlö, hòn öt keun tökööl cha-a, ngaich kapah.

²³Më Lēvī pöri töla-evṙen i vahīṙen ngam rūkui manūlö, ngaich keun tökööl re cha-a min: chöngö an min angū-ö nö örheūheu i tumkölchap cha, in yip kūön Israĕl inrē nö öt amīnu cha-a.

²⁴Pò nup töhĕng i tösöm aṅ in yip kūön Israĕl, nup kahëtö cha nö i ngam Mā Tēv tö hatāilöngö, kētu nup anū-ö tö chu nö amin yip Lēvī, lökten chin ngö ṙô tö cha, Öt amīnu yip min cha-a nö in yip kūön Israĕl.

²⁵Ngaich ngam Mā Tēv nö vë-ekūö yip kūön Môsös, nö ngö ṙô,

²⁶Hēk inrē më-eṅ vë-ekūö yip kūön Lēvī, ngö ṙô, tö cha, Yē yīö kētö töhĕng i tösöm in yip kūön Israĕl nup kahëtö Chu in yīö aṅ in cha nö amin yīö, ngaich yī-ö min kētö tö hatāilöng tökētu aṅ in u nö im Mā Tēv, hĕng i tösöm i nup tösöm.

²⁷Ngaich nup kahëtö yīö min tö hatāilöng nö kaheuktu nö in yīö, nö sāre öre nö sāiny nö aṅ ngam chūök sanông sāiny, ane inrē sā tanööḵlö öp kinrān vāin.

²⁸Ngatī yī-ö inrē kētö tö hatāilöng tökētu im Mā Tēv nup töhĕng i tösöm in yīö nö ṙòkhöre, nup taneūngen yīö in yip kūön Israĕl; ngaich kētö nup aṅ in u min yī-ö im Mā Tēv nö löö in Āròn öp kūönṙô nö tö hatāilöng nö tökētu.

²⁹I nup inlōntö yīö nö ṙòkhöre kētö töhataīlöng yī-ö min tökētu nö im Mā Tēv, nup tölngö tölöök in u, nup aṅ in u töngaich nö ahetlöngö.

³⁰Lökten meh min ngö ṙô tö cha, Yē yīö hatāilö nup tölngö tökôlò aṅ in u, ngaich kaheuktu min anū-ö nö in yip Lēvī nö ṙanūölö ṙôken aṅ sanông sāiny, ane inrē ṙanūölö ṙôken aṅ kinrān vāin.

³¹Keuheūt chūökre yī-ö min nyā-aṅ u, yī-ö tö yip aṅ patī yīö: tön raneushö yīö nun nö ṙënngen la-en yīö el ngam rūkui manūlö.

³²Ngaich rö-ö yī-ö min keun tökööl tö pôkūö e, yē yīö hatāilö nup tölngö tökôlò aṅ in u: ngaich yī-ö min öt hachōichngö nup töhet aṅ in yip kūön Israĕl, hòṅ yīö öt kapah.