Read Car_Nicobarese KINṘEŪKÖ 19 Bible Online

KINṘEŪKÖ 19 - Car_Nicobarese bible

KINṘEŪKÖ 19

¹Ngaich ngam Mā Tēv nö vë-ekūö Môsös, Āròn inrē nö ngö ṙô,

²Angū-ö ön ngih chöngö aṅ im chöngö ngam hachöngten ngam Mā Tēv, nö ngö ṙô, Vë-ekūö yip kūön Israĕl,hòṅ cha nö hĕng nòng kahëti nö in meh tö tangāṅv kan kūön nuā töt pitōtu, öp töt chanôichu alaha, ane inrē öp töt hakeunlöng tö kaneun inröl.

³Ngaich yī-ö kēten ò min in Ēliasör öp kūönṙô, ngaich anga-aṅ min nö kēnyen ò lā uk ngam elyöngö, ngaich hĕng tak min ṙamatnyö likeun ò nö i kūö ò.

⁴Ngaich öp kūönṙô min Ēliasör nö aṅtī tö kuntī re nö kēḵ mahām ip mahām ò, ngaich kicheny tö öp mahām ò nö lā kūö ngam rūkui manūlö sat heuh tī:

⁵Ngaich hĕng tak min famöngngö ngam kan kūön nuā nö i kūö ò; föngi min tö ò öp uk ò, alaha ò, mahām ò, hol töp sôḵ ò inrē:

⁶Ngaich ngam kūönṙô min nö kēḵ chōn sītör hissòp, laturë inrē ngaich kavalhöt u nö ellōn kūö ngam töhūkūö tameūyö ngam kan kūön nuā.

⁷Ngaich ngam kūönṙô min nö söich nup inyut re, vōk alaha re min inrē anga-aṅ nö el mak, ngaich unôich anga-aṅ min nö kuhēthöre nö im elyöngö, ngaich ngam kūönṙô min nö kuvīö söl harap.

⁸Ngaich anga-aṅ öp famöngngen ò min nö söich inyut re nö el mak, ngaich kuvīö min söl harap.

⁹Ngaich öp tarik öp töt kuvīö min nö hamūl nup tisum ngam kan kūön nuā, ngaich ṙātö u nö lā uk ngam elyöngö in öp tölöök chūök, ngaich in e min angū-ö nö halīniṙen tö yip ṙôngö kūön Israĕl nö mak inrēvngöre: tökētu an angū-ö kūö tökööl.

¹⁰Ngaich anga-aṅ öp mahamūl nup tisum öp kan kūön nuā, nö söich inyut re min, ngaich kuvīö söl harap: ngaich angū-ö min in yip kūön Israĕl tö öp aṅ tahëng mi-iyöng in cha nö chöngö tö-örheūheu.

¹¹Ngòh lamūölkö alaha kupah öp töng sitih tarik, kuvīö min anga-aṅ nö sat kumkam:

¹²Ahetlöre min anga-aṅ im linūöyö sakāmö, ngaich in sinātö sakāmö anga-aṅ min nö öt kuvīö: yĕn öt ha-etlöre pöri anga-aṅ im linūöyö sakāmö, ngaich anga-aṅ min im sinātö sakāmö nö tökuvīö.

¹³Öp töng lamūölkö alaha kupah töng sitih tarik öp tökapah, ngaich rö-ö nö ahetlöre, hachōichngö ngam inrūkui ngam Mā Tēv anga-aṅ: ngaich anga-aṅ min nö rökiṙen nö ṙā-ang in Israĕl: pò ngam mak inrēvngö nö öt kichenytu nö i kui ò, tökuvīö an min anga-aṅ, ṙòngmö in ò min ngam kinvīöṙö ò.

¹⁴Ngih ön kinvīöṙö, yē ngòh tarik nö kapah nö el rūkui: öp kumhëthötre nö el ngam rūkui, öp töng mī-el ngam rūkui inrē, sat sumkam min nö kuvīö.

¹⁵Ṙòkhöre nup chūökṙen töluvë-akkūi, nup töt inkūpu tö tököp nö i kui u, nö kuvīö.

¹⁶Öp töng lamūölkö öp töfëli nö el kahôyö, hēk inrē öp lamūölkö alaha kupah, hēk tangëḵ kupah, hēk anūlö, kuvīö min anga-aṅ sat sumkam.

¹⁷Ngaich kūö öp tökuvīö min cha-a nö kēḵ i nup tisum öp töföngö tökētu kūö tökööl, ngaich asëlöng min öp töhëm mak nö el öp tanīöyö.

¹⁸Ngaich öp töt kuvīö min tarik nö kēḵ hissòp, sumtö e ngaich nö el mak, ngaich kichënyö e nö i kui öp rūkui, i kui nup chūökṙen inrē nö ṙòkhöre, i kui yip tarik inrē mu-umuh, i kui ò inrē, öp lamūölkö tangëḵ, lamūölkö töfëli, lamūölkö kupah, hēk lamūölkö anūlö:

¹⁹Ngaich ngam töt kuvīö tarik min im linūöi sumkam, sinat sumkam inrē, nö kicheny kui ngam tökuvīö: ngaich im sinat sumkam anga-aṅ min nö ahetlen ò; ngaich anga-aṅ min nö söich hilā re, vōk inrē, ngaich öt kuvīö min söl harap.

²⁰Ngaich öp tarik pöri min öp tökuvīö, nö ötha-etlöre, anga-aṅ min tarik törökiṙen nö ip manūlö, pò ò nö hachōichngö ngam inrūkui ngam Mā Tēv: öt kichenytu inrē ngam mak inrēvngö nö i kui ò: tökuvīö an anga-aṅ.

²¹Ngaich angū-ö min nö in cha nö chöngö töt chanūhuvṙen: ngaich anga-aṅ ngam lamūölkö ngam mak inrēvngö min nö kuvīö söl harap.

²²Ngaich öp töng lūölka min tö ngam tökuvīö tarik nö kuvīö min; ane inrē öp tarik lamūölkö e min nö kuvīö söl harap.