Read Car_Nicobarese KINṘEŪKÖ 2 Bible Online

KINṘEŪKÖ 2 - Car_Nicobarese bible

KINṘEŪKÖ 2

¹Ngaich ngam Mā Tēv nö vë-ekūö Môsös, Āròn inrē nö ngö ṙô,

²Kö vītö chūökre yip Kūön Israĕl min nö kö i pantērare, tö nup pantēra mitī-i yöng cha tö kikōnyö: ranghö öp rūkui manūlö cha-a min nö havīlö e tö chūökre.

³Ngaich cha-a yip vamītö chūökre nö lā chuhöt, lā maneutlö ngam tavūöi, nö cha-a min aṅ im pantēra elyöngö Yūtā, sā ṙôngö yip kumyung: ngaich öp mākūö kūön Yūtā min nö Nāsön öp kikōnyö kūön Amminatap.

⁴Yip kumyung in ò inrē, cha-a inrē yip tö kaheuklöng nö ngaich aṅ in cha, nö sat anāi fën sīön köny tafūölòng.

⁵Ngaich cha-a yip vamītö chūökre nö ranghen ò min yip miyöngö Isakār: ane inrē öp mākūö kūön Isakār min nö Netenī-ĕl öp kikōnyö kūön Sūar.

⁶Yip kumyung in ò inrē, cha-a inrē tö ngaich nö kaheuklöng, nö taneui anāi fën köny fënòng.

⁷Ngam miyöngö Sepulön: öp mākūö kūön Sepulön inrē min nö Ēliāp öp kikōnyö kūön Hilòn.

⁸Yip kumyung in ò inrē, yip tö kaheuklöng inrē nö ngaich nö taneui anāi sat köny fënòng.

⁹Ṙòkhöre yip tö kaheuklöng elyöngö Yūtā, hēngòng, sā ṙôngö yik kumyung in cha. Cha-a min lamā urĕh.

¹⁰Lā lòhngö min öp pantēra elyöngö Rūpön sā ṙôngö yip kumyung in cha, öp mākūö kūön Rūpön inrē nö Ēlīsör öp kikōnyö kūön Sĕtē-ör.

¹¹Yip kumyung in ò inrē, yip tö kaheuklöng nö ngaich, nö fën anāi tafūöl köny taneūyòng.

¹²Ngaich cha-a yip vamītö chūök re min nö ranghen ò nö miyöngö Simōn: ane inrē öp mākūö kūön Simōn min nö Selūmi-ĕl öp kikōnyö kūön Sūrisattai:

¹³Yip kumyung in ò inrē, cha-a inrē yip tö kaheuklöng in cha, nö taneui anāi machūötör köny lūöyòng:

¹⁴Ngam miyöngö Kāt: öp mākūö kūön Kāt min nö Ēlī-asaf öp kikōnyö kūön Rū-ĕl.

¹⁵Yip kumyung in ò inrē, cha-a inrē yip tö kaheuklöng nö ngaich in cha, nö fën anāi taneui köny tafūölòng taneui anāi.

¹⁶Ṙòkhöre yip tö kaheuklöng elyöngö Rūpön, nö hēngòng taneui anāi hĕng köny fënòng taneui anāi, sā ṙôken yip kumyung in cha. Cha-a min nö innëtö.

¹⁷Ngaich kiröönngöre min ngam rūkui manūlö, nö holtö elyöngö yip Lēvī nö ellōn nup elyöngö: sā chūöktī cha tö elyöngöre, ngatī chanūhuh cha-a nö kiröönngöre, kö i chūök re tarik nö i nup pantēra cha.

¹⁸Lā sūng min öp pantēra elyöngö Ifrēm sā yip kumyung in cha: ane inrē öp mākūö kūön Ifrēm min nö Ēlisamā öp kikōnyö kūön Ammihöt.

¹⁹Yip kumyung in ò inrē, cha-a inrē yip tö kaheuklöng nö ngaich in cha, nö fën anāi köny taneūyòng.

²⁰Ngaich cha-a yip vamītö chūökre min nö ranghen ò nö miyöngö Manasē: ane inrē öp mākūö kūö Manasē nö Kamēliĕl öp kikōnyö kūön Pītahsör:

²¹Yip kumyung in ò inrē, yip tö kaheuklöng nö ngaich in cha, nö lūöi anāi nët köny nëtòn:

²²Ngam miyöngö Penyamin, ane inrē öp mākūö kūön Penyamin min nö Epiten öp kikōnyö kūön Kitī-ōnī;

²³Yip kumyung in ò inrē, yip tö kaheuklöng nö ngaich in cha, nö lūöi anāi taneui köny fënòng.

²⁴Ṙòkhöre yip tö kaheuklöng elyöngö Ifrēm, nö hēngòng hëvör köny hēngòng, sā ṙôken yip kumyung in cha. Cha-a min nö linūöyö.

²⁵Lā kapā min öp pantēra Tën, sā ṙôken yip kumyung in cha: ane inrē öp mākūö kūön Tën min nö Ēhī-ēsör öp kikōnyö kūön Ammisattai.

²⁶Yip kumyung in ò inrē, yip tö kaheuklöng nö ngaich nö in cha, nö tafūöl anāi nët köny sātòng.

²⁷Ngaich cha-a yip vamītö chūök re min nö ranghen ò nö miyöngö Asēr: ngaich öp mākūö kūön Asēr min nö Paki-ĕl öp kikōnyö kūön Òkren.

²⁸Yip kumyung in ò inrē, yip tö kaheuklöng nö ngaich nö in cha, nö fën anāi hĕng köny taneūyòng.

²⁹Ane inrē öp miyöngö Naftalī: ane inrē öp mākūö kūön Naftalī min nö Āhīra öp kikōnyö kūön Inön.

³⁰Yip kumyung in ò inrē, yip tö kaheuklöng nö ngaich nö in cha, nö taneui anāi lūöi köny fönòng.

³¹Ṙòkhöre yip tö kaheuklöng i elyöngö Tën, nö hēngòng taneui anāi sat köny tafūölòng. Lā unôich takô cha-a min i nup patēra cha.

³²Cha-a yin vē tö kaheuklöng nö ngaich, in yip kūön Israĕl nö i mitī-i yöng cha tö kikōnyö: ṙòkhöre yip tö kaheūkö i nup elyöngö cha sā ṙôngö yip kumyung in cha nö tafūölòng lūöi köny taneūyòng taneui anāi.

³³Öt kaheuktu pöri yip kūön Lēvī nö in yip kūön Israĕl, sā tinöölô Môsös tö ngam Mā Tēv.

³⁴Ngatī tī yik kūön Israĕl; sā nuk chöngö ngam Mā Tēv nö in Môsös, ngatī cha-a nö iyöngtöre nö i nuk pantēra cha, ngatī vanāngnyi cha-a kö i mupīhöre, sā mitī-i yöng cha tö kikōnyö.