Read Car_Nicobarese KINṘEŪKÖ 20 Bible Online

KINṘEŪKÖ 20 - Car_Nicobarese bible

KINṘEŪKÖ 20

¹Ngaich yik kūön Israĕl, keuheūtlöre yip ṙôngö tarik, nö yihtöre nö el nyaṅlnyi nö i Sin im raneh chingëṅt: iyöng i Kātēs inrē yik tarik; umuh inrē Miriöm nö kapah umuh inrē nö lāpi.

²Ngaich öt māku yik ṙôngö tarik nö umuh: hamūlöre cha-a ngaich nö lā-alkūö Môsös Āròn inrē.

³Ngaich yik tarik nö lā-alkūö Môsös, ngaich vë-ekūö ò nö ngö ṙô, Kapah in öre ngaich i lōn ngam Tēv hē yip hol ih nö i kūö ngam Mā Tēv nö kapah!

⁴Kūöyòh an kētö vē aṅ im Mā Tēv tömūl nö el ngih tönyaṅlyi nö pò ih hōḵtu kapah in e, īhö tö në chehen ih töṙeūla?

⁵Kūöyòh an inrē kēngen ih ṙā-ang Aikup, an kēten ih in ngih tötlöök chūök? Hö-ö an nö chūök kulöl, hēk anychīr, hēk angkūr hēk anār; öt rēhĕn nö mak tö-ôkö umuh.

⁶Ngaich Môsös Āròn inrē nö kiröönngöre nö ṙā-ang i yip ṙôngö tarik nö chuh ik inkūp ök rūkui manūlö, ngaich afukngöre cha-a nö fāthak kūö: ngaich ngam lanöökö ngam Mā Tēv nö meūkö tö cha.

⁷Ngaich ngam Mā Tēv nö vë-ekūö Môsös nö ngö ṙô,

⁸Kēḵ ngam tinkung, hamūl yip ṙôngö tarik inrē, më-eṅ, ap mëm meh inrē Āròn, vë-ekūö ngam ihong nan i kūö cha; hòṅ e nö kētö ap in re mak; ngaich nā-aṅ min kēnyö mak in cha nö löknyö im ihong: hòṅ nā min kētö òk yip ṙôngö tarik tö nup töṙeūla chehen cha inrē.

⁹Kēḵ ök tinkung ngaich Môsös nö ṙā-ang i kui ngam Mā Tēv, sā tinöölô ò tö Ò.

¹⁰Ngaich Môsös nö hamūl yik tarik tömūl nö i kūö ök ihong, ngaich ngö ṙô tö cha, Hangihtöre, yī-ö ma-ahôngen chöngö; kēnyö mak yīö öi vöh ṙā-ang i ngòh ihong?

¹¹Hanyāṅklö këlre ngaich ang Môsös, ngaich nët heuh tī nö foh ök ihong nö aṅtī tö ök tinkung re: pōyen ngaich ök mak nö hëmnyi, òk ngaich yik ṙôngö tarik, tö nuk töṙeūla chehen cha inrē.

¹²Ngaich ngö ṙô ngam Mā Tēv tö Môsös Āròn inrē, kūö nā öt ṙātö ellōnre in Chu, an ahetlen Chu i kūö vē kūön Israĕl, lökten nan min öt kētö ngih manūlö in öp panam öp kahëtö Chu in cha.

¹³Në nun mak i Meripāh, kūö yik kūön Israĕl nö lā-alkūö ngam Mā Tēv, ngaich anga-aṅ nö hameuktöre nö töhet nö in cha.

¹⁴Ngaich ṙā-ang Kātes ang Môsös nö tīnngö ma-ahānga nö ik rācha aṅ Itöm, Ngö ṙô ap kahëm meh Israĕl, Akahalōn man tö nuk kanihngen ih nö ṙòkhöre nuk famuk in ih:

¹⁵Tö inlahen yik muvöhngö ih nö chuh Aikup, ngaich marô-òten īhö iyöng Aikup; ngaich yip aṅ Aikup nö öt lēken ih, tö yik muvöhngö ih inrē:

¹⁶Ngaich hē ih peuinyhökūö ngam Mā Tēv, ngaich hang ṙô ih Anga-aṅ, ngaich tīntö ma-ahānga hĕng tak, ngaich kēnyen ih ṙā-ang Aikup: yĕh meūkö ih ngaich i Kātes, ngih elpanam i manā-ang kūö kūöngö meh:

¹⁷Vë-ekūö meh chin halöngten ih lök el panô-òṅ sāiny, hēk panô-òṅ angkūr, öt rēhĕn min hōḵ òk angkūr, öt rēhĕn min hōḵ òk mak aṅ nup tö-ūlö mak: höng lök ngam tökiröng talöökö ngam rācha in min, öt rēhĕn in min hōḵ kānköre lā hāmö öt rēhĕn lā tavē, hanöngsaha ih chööḵngö ngam kūö panam meh.

¹⁸Ngaich ngö ṙô Itöm tö ò, Uh man lök in chu, hòṅ chu öt kumtö sanëtre kunyī-inyre lā-al meh.

¹⁹Ngaich yik kūön Israĕl nö ngö ṙô tö ò, Hòṅ kiröönngöre in lök im tökiröng talöökö: ngaich yē ih min òk mak meh chū-ö tö në töṙeūla chehen chu inrē, ngaich chū-ö min kētö ṙāi, halöngten chu höng lök muh në elröön chu, öt lahūölku tö yô-òv.

²⁰Ngaich ngö ṙô anga-aṅ, Uh man tufunnyöre, Kunyī-inyre ngaich Itöm nö lā-al ò nö pōyen hol tö tarik, hol tö yöng kumlēḵ kël re inrē.

²¹Ngati inlahen Itöm nö sōḵ nö kētö talöökö Israĕl nö lök el kūöngö ò: lökten Israĕl nö havöökūöre nö ṙā-ang in ò.

²²Ṙā-ang Kātes cha-a ngaich nö kiröönngöre: sölta ngaich nö ik rung Hōr yik kūön Israĕl, nö ṙòkhöre yik ṙôngö tarik.

²³Ngaich ngam Mā Tēv nö vë-ekūö Môsös Āròn inrē nö ik rung Hōr, i kūöngö panam Itöm, nö ngö ṙô,

²⁴Hamūltu an min Āròn nö in yip tarik re: pò ò min nö öt kuhēthötre nö im panam ngam kahëtö Chu ngaich in yip kūön Israĕl, pò nā ahôngen ṙô Chu, i nup mak Meripāh.

²⁵Ngô-òṅ Āròn töp kikōnyö kūön ò inrē Ēliasör, ngôlen cha ip rung Hōr

²⁶Ngaich luhnyö nuk inyut Āròn, ngaich hayutlen u ip kikōnyö kūön ò Ēliasör: ngaich Āròn min nö hamūltu nö in yip tarik re, ngaich kapah, min nö umuh.

²⁷Ngaich Môsös nö asā tinöölôre tö ngam Mā Tēv: yônlö cha-a ngaich nö i kui ök rung Hōr nö meūkö tö yik ṙôngö tarik nö ṙòkhöre.

²⁸Ngaich Môsös nö ṙòngngö nuk inyut Āròn nö ṙā-ang in ò, ngaich hayutlen ū nö in Ēliasör ök kikōnyö kūön ò; ngaich kapah Āròn nö umuh i kui ap rung: yônti ngaich Môsös, Ēliasör inrē nö ṙā-ang kui ap rung.

²⁹Ngaich hē yik ṙôngö tarik nö ṙòkhöre nö meūkö Āròn nö kapah, lūöi anāi sakāmö cha-a ngaich nö peūinyö Āròn, ṙòkhöre yik aṅ patī Israĕl.