Read Car_Nicobarese KINṘEŪKÖ 22 Bible Online

KINṘEŪKÖ 22 - Car_Nicobarese bible

KINṘEŪKÖ 22

¹Ngaich kiröönngöre yik kūön Israĕl, ngaich iyöngtöre nö i nuk panam Mô-āp töṙā-akūö lā muh tö Yôtön i Yerikō.

²Ngaich ök kikōnyö kūön Sippōr ang Pēlak nö meuk nup tī Israĕl nö ṙòkhöre nö i yik aṅ Amôr.

³Ngaich Mô-āp nö pōyen pinhë-ekūö tö yik tarik, pò cha nö maṙôngö: kihngen inrē Mô-āp tökūö yik kūön Israĕl.

⁴Ngaich ngö ṙô Mô-āp tö yik mā aṅ Mītiā, Keuheūtngörevah tī ön min ngih ṙôngö tö vē mahavīlen hī, nö sā kūö nuā nö nyāngö kiyôp ngam töngāṅ. Ök kikōnyö ök kūön Sippōr ang Pēlak rācha mī-i Mô-āp hē e.

⁵Ngaich anga-aṅ nö tīnngö ma-ahānga nö in Pēlām ök kikōnyö kūön Pī-ōr nö i Pītōr, ök tö röhta nö ik tahël nö i panam yik kūön yik tarik ò, nö havëten ò, nö ngö ṙô, Yĕh meuk, ṙamā-ang Aikup yin vē tarik yamih: yĕh meuk, tööḵlö kūö ön ngih panam tö cha, ngaich cha-a inrē nö höngngöh nö lā-al chu.

⁶Tā-a lökten töngamuh, vë-ekūö meh chin, rūtngövah vē tarik; tön yāha kumlēḵ yin tö chu: lohten min öich mihôiṅ, hòṅ ih fëlö cha, hòṅ chu inrē ahōngen cha ṙā-ang kūö ngam panam: pò chu akahalōn tö öp töng hakôlöngṙô tö meh ngaich kôlò, ane inrē anga-aṅ öp törūtiṙen mgaich ök kôlò.

⁷Ngaich yik mā aṅ Mô-āp tö yik mā aṅ Mītiā nö kiröönngöre nö keuntö nuk raneushö milūönö nö eltī cha; yih cha-a ngaich nö in Pēlām, ngaich ṙônyö nuk ṙô Pēlak nö in ò.

⁸Ngaich ngö ṙô anga-aṅ tö cha, Ngöh yin ihih i ngih hatööm, hòṅ chu min kumtö ṙô in yīö hēk, sā ṙô ngam Mā Tēv min tö chu: ngaich yik mā aṅ Mô-ap nöng ngöh nö in Pēlām.

⁹Ngaich yih ngam Tēv, tahīntö Pēlam, ngaich ngö ṙô, Asuh aich vē tarik in meh?

¹⁰Ngaich ngö ṙô Pēlām tö ngam Tēv, tahīntö Pēlak yin ök kikōnyön kūön Sippōr rācha aṅ Mô-āp, nö in chu, nö ngö ṙô,

¹¹Yĕh meuk, yip tarik ṙameū-eung Aikup, lipngö tī yip tökūö ngam tumlat: tā-a rūtngö vah cha min; löhten chin min mihôiṅ kiyung lā-al cha, ngaich ahōnyen cha.

¹²Ngaich ngö ṙô ngam Tēv tö Pēlām, Uh man rūtngö vah yip tarik tön tökôlò yip.

¹³Chōholre ngaich Pēlām im peūheu, ngaich ngö ṙô tö yik mā aṅ in Pēlak, ngaich yin chuh panam re: tön sōḵ an ngam Mā Tēv nö kētö inlöngten chu kiröönngöre in yīö.

¹⁴Chōholre ngaich yik mā aṅ Mô-āp, ngaich chuh in Pēlak cha-a, ngaich ngö ṙô, Sōḵ ap Pēlām nö yih nö hol ih.

¹⁵Hēk ang Pēlak nö ṙūhöl tum tak tahīnngöre tö yik mā, tömötlö minā-aṅ tö cha.

¹⁶Chalôḵ cha-a ngaich nö in Pēlām, ngaich ngö ṙô tö ò, Ngö ṙô ap Pēlak ap kikōnyö kūön Sippōr, Vë-ekūö meh chin, un hĕng ap lökngen meh öt yihtökūö in chu.

¹⁷Tön ṙūölen meh chin min i tökiröng minā-aṅ, öp tö sitih ṙô meh in chu kēkö kaha e chū-ö min: tā-a lökten, vë-ekūö meh chin, rūtngövah vē tarik.

¹⁸Ngaich Pēlām nö ngö ṙô nö sap ṙô yik tarik Pēlāk, Yē Pēlak öre nö kē-ĕkūö chu töp patī re nö tööḵlö tö rupīö humlum inrē ötkô chū-ö vāngngö röön tö ngam ṙô ngam Tēv chu ngam Mā Tēv, öich kūöṅnhöl hēk pōihöl.

¹⁹Vë-ekūö yīö chin lökten, ngöh yin ihih inrē ing hatööm, hòṅ chu akahalōn tö ṙanūölô ngam Mā Tēv min nö vë-ekūö chu.

²⁰Ngaich yihtöre ngam Tēv nö in Pēlām tö hatööm, ngaich ngö ṙô tö ò, Yē vē tarik nö yih nö havëken meh, chōholre, kuṙòh in cha; höng ap ṙô chu pöri vë-ekūö meh, angū-ö la-en meh.

²¹Chōholre ngaich Pēlām tö peuheū, hanāmlö uk ök köttö re ngaich, ngaich kiröönngöre nö hol yik mā-aṅ Mô-āp.

²²Ngaich līn ngam Tēv pò ò nö kiröönngöre: ngaich ök ma-ahānga aṅ im Mā Tēv nö harònglöre nö el talöökö nö lā-al ò. I uk ök köttö re anga-aṅ, hol ò inrē nak tarik ò tönët tak.

²³Meuk ök ma-ahānga aṅ im Mā Tēv, ngam köttö, nö el taköökö nö sökhakaṙen, nyāṅkhaka ök sanët nö eltī ò: kānngöre ngaich ök köttö tö ngam talöökö, ngaich chuh el ngāṅṙö: foh ngam köttö ngaich ang Pēlām, nö havöötö kūö ò nö el ngam talöökö.

²⁴Ngaich ök ma-ahānga aṅ im Mā Tēv nö sökhaka nö el ök talöökö tökilūhötre i hôi nuk panô-òṅ angkūr tö-ahëmlöng tö kinlōngö lā hih hĕng, lā hī-a hĕng.

²⁵Meuk ök ma-ahānga ngam köttö aṅ im Mā Tēv, ngaich singtöre nö i kaha kinlōngö, ngaich tileuich tö kunröön Pēlām nö i kaha kinlōngö, ngaich hēk anga-aṅ nö fōhan.

²⁶Ṙūöhöng re ngam ma-ahānga ngam Mā Tēv ngaich sökhaka nö el ök töcheūkti chūökö, i chūök töt talööku nö havöö lā hāmö hēk lā tavē.

²⁷Meuk ök ma-ahānga aṅ im Mā Tēv ngam köttö, ngaich hulalngöre anga-aṅ nö el katòh Pēlām: hūlökūö tanāinyö ngaich Pēlām, foh ngam köttö ngaich anga-aṅ aṅtī tök tinkung re.

²⁸Ngaich ngam Mā Tēv nö löpnyö kūö elvāng ngam köttö, ngaich ngö ṙô anga-aṅ tö Pēlām, Suh ap tī chu in meh taheui töp lökten chu fōho tö meh ngaich öm lūöi heuh tī?

²⁹Ngaich ngö ṙô Pēlām tö ngam köttö, Pò meh, miyëḵ tö chu: yik chin öre hòṅ sanëtu eltī, ngaich vah öre më-eṅ töngamuh kapah tö tī chu.

³⁰Ngaich ngö ṙô ngam köttö tö Pēlām, Öt köttö meh öichu, öich tö-i-ūkö tö meh i ṙô-òtö nômö meh söl ing töngamuh? Hĕng heuh öich ṙung ngati tī tö meh? Ngaich ngö ṙô anga-aṅ, Hö-ö.

³¹Ngaich ngam Mā Tēv nö löpnyö kūö mat Pēlām ngaich meuk ök ma-ahānga anga-aṅ aṅ im Mā Tēv nö sökhaka nö el talöökö, nyāṅkhaka ök sanët nö eltī ò: sōntökūöre anga-aṅ ngaich, ngaich afukngöre nö fāthakkūö.

³²Ngaich ngö ṙô tö ò ngam ma-ahānga ngam Mā Tēv, Kūöyòh öm foh ngam köttö re öm ngaich lūöi heuh tī? Yĕh meuk, yih chin lā-al meh, pò ngam talöökö meh nö ötlöök nö i kūö chu:

³³Ngaich meūkö chu ngam köttö, ngaich lūöi heuh nö kānngöre nö i kūö chu: yĕn öt ngatī öre anga-aṅ nö kānngöre tö chu, tö ngāichövah man öre fëli tö chu, ngaich hayöölöngṙen nômö anga-aṅ.

³⁴Ngaich ngö ṙô Pēlām tö ngam ma-ahānga aṅ im Mā Tēv, Ngaich chin köölöfālen; pò chu öt akahalōn tö meh öm lā-al chu sökhaka el talöökö: lökten, yē meh kunyāhalōn tö e, ngaich kô-òren chu-ö hēk havanrit re.

³⁵Ngaich ngö ṙô ök ma-ahānga aṅ im Mā Tēv tö Pēlām, In më tarik man kuṙòh: höng ngam ṙô Chu pöri vë-ekūö meh angū-ö min ṙô meh. Lökten Pēlām nö ngaich nö kiröönngöre nö in yik mā-aṅ in Pēlak.

³⁶Ngaich hē Pēlak nö ngaich nö hang tö Pēlām nö ngaich nö yih, kunyī-inyre ngaich anga-aṅ nö höngkūö ò nö elpanam i Mô-āp, ök i kūöngö Arnòn, ök lā manā-angkūö, kūö panam.

³⁷Ngaich ngö ṙô Pēlak tö Pēlām, Röh öich tīnngö mahavëken meh öich kô-ò ṙô? Kūöyòh öm öt yih in chu? Kô-òngrit ṙöng öich ötkô ṙūölen meh i minā-aṅ?

³⁸Ngaich ngö ṙô Pēlām tö Pēlak, Yĕh meuk, ngaich chin taichtökūö in meh: ngaich kanô-òvö hòng chū-ö ṙô tö yô-òv? Höng ṙô tö ngam ṙô chin min ngam töchaphötvö nö elvāng chu tö ngam Tēv.

³⁹Ngaich kiröönngöre Pēlām nö hol Pēlak, yih cha-a ngaich nö i Kiryathūsot.

⁴⁰Ngaich kētö kōiny nuā ang Pēlak nö tökētu sīṅp inrē, ngaich söömtu nö in Pēlām in yik mā inrē hol ò.

⁴¹Ngaich im peuheū, ang Pēlak nö ngô-òṅ Pēlām, ngaich hayihten ò nö ik tömarô-òl chūök chūök Pē-āl, ngaich löktökūö in e mat anga-aṅ nö meuk öp tölngö manā-angkūö ṙôkti yik tarik.