Read Car_Nicobarese KINṘEŪKÖ 23 Bible Online

KINṘEŪKÖ 23 - Car_Nicobarese bible

KINṘEŪKÖ 23

¹Ngaich Pēlām nö ngö ṙô tö Pēlak, Sātö vahī-il man tö tahāklö ihih, ngaich sat nòng halēn tö kōiny nuā sat nòng inrē kōiny sīṅp.

²Ngaich Pēlak nö ngatī sā ṙô Pēlām; kētö tökētu ngaich Pēlak, Pēlām inrē nö kö kö i kui nuk tahāklö, hĕng nòng kōiny sīṅp inrē.

³Ngaich ngö ṙô Pēlām tö Pēlak, Söklöre man ranghö ngam töföngö tökētu, töich kiröönngöre chū-ö: lohten an ngam Mā Tēv min nö yih nö höngkūö chu: ngaich vë-eny nang meh min chū-ö tö nup töng hameuktö Ò nö in chu. Ngaich kiröönngöre anga-aṅ nö ip töt chōnu kui rung.

⁴Ngaich ngam Tēv nö höngkūö Pēlām; ngaich ngö ṙô anga-aṅ tö ò, Ngaich chin sātö halēn tö tahāklö, ngaich inrē öich kētö tökētu hĕng nòng kōiny nuā hĕng nòng kōiny sīṅp inrē el töhĕng tahāklö.

⁵Ngaich ngam Mā Tēv nö chaphöt elvāng Pēlām tö ṙô nö ngö ṙô, Havantöre man in Pēlak, ngö ṙô pömchö.

⁶Havantöre ngaich anga-aṅ nö in ò, ngaich meūkö nö sökhak nö ranghö ök töföngö tökētu, anga-aṅ, ṙòkhöre inrē yik mā aṅ Mô-āp.

⁷Ngaich anga-aṅ nö kēḵ inchōk-oṙô re, ngaich ngö ṙô, Ṙā-ang Aram ang Pēlak nö kēten chu. Ṙā-ang i minë rôngö lā chuhöt ngam rācha aṅ Mô-āp, Tā-a rūtngövah Yāköp, Ane inrē tā-a, harāinyngen Israĕl.

⁸Sitih ṙô öich min rūtngövah, ngam töt rūtiṙen tö ngam Tēv? Sitih inlahen öich min inrē harāinyngö, ngam töt harāinyi tö ngam Mā Tēv?

⁹Pò chu yih meūkan, löktökūö i kui minë ihong, Löktökūö minë rung chin meūkan: Yĕh meuk, tarik an nö töng hĕngtöṙah, Öt kaheuktu an min nö i pumnāmö tarik.

¹⁰Chiāp tökô nö kaheuk pinṙōngö Yāköp, Hēk kaheuk öp finëntit Israĕl? Hökngen chu kapah kinpaha tö kinpaha tölöök. Hökngen öp manāḵngen chu inrē nö sā ò!

¹¹Ngaich ngö ṙô Pēlak tö Pēlām, Sitih tī öm ngaich tö chu? Kēten meh chin yih öm rūtngövah më lā-al chu, ngaich, yĕh meuk, höng hakôlò cha më-eṅ.

¹²Ngaich ngö ṙô anga-aṅ nö sapṙô, Röh öich töhòṅ haṙēmngenre ṙô tö nup ṙô ngam Mā Tēv chahaphöt Ò nö elvāng chu?

¹³Ngaich Pēlak nö ngö ṙô tö ò, Vë-ekūö meh chin, tā-a in chu ip tahëng chūökö, öm löktökūö in e mat meūkö cha; höng meuk öp manā-angkūö cha man min, öt kauheūtlöre mat pöri tö cha: löknyö in e ṙô pömchö rūtngövah cha.

¹⁴Ngaich anga-aṅ nö kēnyen ò nö ip töngāṅ i Sōfim i kui Piskā, ngaich sātö vahī-il tö tahāklö ngaich kētö kōiny nuā anga-aṅ hĕng nòng, hĕng nòng inrē kōiny sīṅp nö ël töhĕng tahāklö.

¹⁵Ngaich ngö ṙô anga-aṅ tö Pēlak, Sökhak man ihih ranghö ngam töföngö tökētu, i saha chu sin höngkūö ngam Mā Tēv umū-aṅ.

¹⁶Ngaich ngam Mā Tēv nö meukkūö Pēlām, ngaich chaphöt ṙô nö elvāng ò, nö ngö ṙô, Havantöre man in Pēlak ngaich ngö ṙô öm ṙô-òv.

¹⁷Yihtöre ngaich anga-aṅ nö in ò, yĕh meuk, sökhak anga-aṅ nö ranghö ök töföngö tökētu tö ò, in ò inrē yik mā aṅ Mô-āp. Ngaich ngö ṙô Pēlak tö ò, Suh ap ṙô ngam Mā Tēv?

¹⁸Kēḵ inchōḵoṙô re ngaich anga-aṅ nö ngö ṙô. Chōholre, Pēlak, hang inrē; Hangihtöre tö ṙô chu, më-eṅ kikōnyö kūön Sippōr:

¹⁹Rö-ö an ngam Tēv nö tarik, nö töminyôinyaṅ; Ötrēhĕn nö kūön tarik, nö mahavöötö ellōnre: Keuheūtô Anga-aṅ, ngaich yòh öt kēken e hòng? Hēk ṙô-òv Anga-aṅ, ngaich öt hateungngö e hòng min?

²⁰Yĕh meuk, teūngen chin tö chöngö öich hōḵtu hakôlò: Ngaich hakôlò Anga-aṅ, ötkô chū-ö haṙī-ing e.

²¹Öt meuk tökööl anga-aṅ nö in Yāköp, Ötrēhĕn nö meuk töchōich nö in Israĕl: In ò An ngam Tēv ò ngam Mā Tēv, In cha öp ṙô rācha nö hūḵa.

²²Ṙā-ang Aikup yin nö kēnyu tö ngam Tēv; Kumlē-ĕv an tö tösā kumlēḵ hanchōn kōiny nuā.

²³Kô-en takô an Yāköp nö öt aṅhaṅv in tö milūönö, Ötrēhĕn an Israĕl nö aṅhaṅv in tö chanông alaha: Eūka an min nö in Yāköp in Israĕl inrē, Nöng tī ngam Tēv!

²⁴Yĕh meuk, chōholre an ngam tarik nö sā kan lāyön, Hachônglöre an inrē nö sā lāyön: Öt ṙōlngöre an min yĕn öt keuheūtökūö nö kā ap pôḵre, Òk mahām öp pôḵ re inrē.

²⁵Ngaich Pēlak nö ngö ṙô tö Pēlām, Ötrēhĕn man rūtngövah cha, ötrēhĕn öm hakôlò cha.

²⁶Sapṙô Pēlak pöri ang Pēlām nö ngö ṙô, Öt ngö ṙô öich tö meh, Ṙòkhöre nup ṙô ngam Mā Tēv, anū-ö la-en chu?

²⁷Ngaich ngö ṙô Pēlām, Tā-a, töich kēten meh ip tahëng chūökö; lohten min nö ṙanāmölōn ngam Tēv tö meh öm rūtngövah cha öm in e.

²⁸Ngaich Pēlak nö kēngen Pēlām nö i kui Pī-ōr, öp tö chônghaka nö lā tulöng töp tönyaṅlnyi.

²⁹Ngaich Pēlām nö ngö ṙô tö Pēlak, Vīlö tahāklö chu man sat, sat nòng halēn inrē tö kōiny kūön nuā.

³⁰Ngaich Pēlak nö ngatī, sā ṙô Pēlām, kētö tökētu ngaich hĕng nòng kōiny nuā, hĕng kōiny sīnp inrē el töhĕng tahāklö.