Read Car_Nicobarese KINṘEŪKÖ 24 Bible Online

KINṘEŪKÖ 24 - Car_Nicobarese bible

KINṘEŪKÖ 24

¹Ngaich hē Pēlām nö meuk ngam Mā Tēv nö ṙāmölōn nö hakôlò Israĕl ngaich öt kiröönngöre anga-aṅ, nö sāre i nuk tahëng hē, nö höngkūö ò nö holtö milūönö, havööngö kūöre pöri nö kū-ö tö el nyaṅlnyi.

²Hachônglö matre ngaich Pēlām, ngaich meuk elyöngö cha; ngaich yihtöre ngam ma-alaha aṅ im Mā Tēv nö in ò.

³Kē öp inchōḵo ṙô re ngaich anga-aṅ, ngaich ngö ṙô, Ngö ṙô öp Pēlām öp kikōnyö kūön Pī-ōr, Öp tarik inrē öp tölöpnyukūö mat nö ngö ṙô:

⁴Ngö ṙô anga-aṅ, ngam hamang në ṙô ngam Tēv. Ngam mameuk töt maneūken aṅ im Tökeuheūttöre Chöngö, Afukngöre, ngaich milakhak nup mat ò:

⁵Yöng vanāyö nun minë inrūkui meh, Ō Yāköp, Minë inrūkui meh inrē, Ō Israĕl!

⁶Sā innyāṅknyö achāṙö nun, sā panô-òṅ i kui tahël, Sā nup chōn liknaloe nup töteūichtu tö ngam Mā Tēv, Sā nup chōn sitör mī-i kui mak.

⁷Hëmnyi min öp mak nö löknyö ël nup pālti ò, El nup mak töṙōl yip kūön ò min inrē, Marô-òl chūök öp min rācha ò tö Ākak, Hapōilöng min inrē ngam Pūlngö ò.

⁸Kēnyen ò an ngam Tēv nö ṙā-ang Aikup; Ngaich sā kumlēḵ hanchōn kōiny nuā anga-aṅ: Keuheūt an min nö kāḵngö pumnāmö tarik yip tökunyāha elmat tö ò, Pinyeny nup tangëḵ cha an min nö likölö u, Ngaich tafūni tī nö lirënyö cha.

⁹Ṙōlngöre an, sā ṙanôlngö lāyön, Sā kan lāyön inrē: chiāp min mahachohlen ò? Tökôlò yip yēḵ mahakôlò meh, Öt kôlò pöri yēḵ yip töt mahakôlò meh.

¹⁰Ngaich tainy ang Pēlak nö lā-alkūö Pēlām, ngaich kōk eltīre anga-aṅ: ngaich ngö ṙô Pēlak tö Pēlām, Havëten meh chū-ö rūtngövah vē tökunyāha elmat tö chu, ngaich, yĕh meuk, hakôlò cha më-eṅ öm ngaich lūöi heuh.

¹¹Lökten man kūṙòh falngöre i chūök re: ṙamūölen meh chin tö lōnre i tökiröng minā-aṅ; ngaich pöri, yĕh meuk, ngam Mā Tēv nö haköpngen meh öt im minā-aṅ.

¹²Ngaich ngö ṙô Pēlām tö Pēlak, Öt ṙô-òvö öichu inrē in yip ma-ahānga, yip tahīntö meh in chu, öich ngö ṙô,

¹³Yē Pēlak öre nö kē-ĕkūö chu töp patī re nö tööḵlö tö rupīö humlum inrē, ötkô chū-ö vāngngö röön tö ngam ṙô ngam Mā Tēv, öich löökö tī hēk inrē ötlöökö tī, öich kahanglōnre; öp ṙô ngam Mā Tēv angū-ö min ṙô chu?

¹⁴Yĕh meuk, ngaich, chuh i yip tarik re chin ngaich: tā-a, hòṅ chu vë-enynang meh tö tī vē tarik min tö vē tarik meh, i në sakāmö

¹⁵Ngaich kēḵ inchōḵ-oṙô re anga-aṅ, nö ngö ṙô, Ngö ṙô ök Pēlām ök kikōnyö kūön Pī-ōr, Öp tarik tölöpnyukūö mat, ngö ṙô,

¹⁶Ngö ṙô anga-aṅ, öp tökumtö nup ṙô ngam Tēv, Öp tö-akahakūö tö inkaha aṅ im Lamā Tulöng, Öp mameuk töt maneūken aṅ im Tökeuheūttöre Chöngö, Afukngöre, ngaich nup mat ò nö löpnyukūö:

¹⁷Meūkan chin, öt töngamuh pöri; Hatīönken ò chin, öt röhta pöri: Meutlö öp min taneūsömat nö löklö in Yāköp, Hĕng öp min kinchīṙö minā-aṅ löklö in Israĕl, Ngaich min nö fohtu i nup sinkeukngö kūö Mô-āp, Ngaich likölngö yip kūön Set nö ṙòkhöre.

¹⁸Ngaich Itöm min nö hayōmö, Sēir inrē min nö hayōmö, më tökunyāha elmat tö ò misī; Isaha Israĕl nö öt pa-ekūö.

¹⁹Hĕng tak öp min löknyö in Yāköp mahayōm panam, Ngaich piyāingö chööḵṙen min nö ṙā-ang elpinnāmen.

²⁰Ngaich hatīöntö kui Amelek, ngaich kēḵ inchōḵoṙô re, nö ngö ṙô, Ranehlö pumnāmö tarik an Amelek; Ngaich pöri öp manāḵngen ò min nö pinyaingö.

²¹Ngaich anga-aṅ nö ngëichtö kui yik aṅ Kēn, ngaich kēḵ inchōḵoṙô re, nö ngö ṙô, Ngëḵ an ngam chūök meh iyöng, I kui ihong inrē ngam fôngö meh tö tī meh.

²²Halëli pöri min Kēn, Hanöngsaha Assör min nö kēngen meh töhakövö.

²³Ngaich kēḵ inchōḵoṙô re anga-aṅ, nö ngö ṙô, Vĕihāṅ, achīö ap min tö-aṅ yē ngam Tēv nö hateungtö e!

²⁴Yih pöri min nup chōng nö ṙāḵngö Kittim, Ngaich cha-a min nö hakihten Assör, hakihten Ēpör min inrē, Ngaich anga-aṅ min inrē nö piyāyi.

²⁵Chōholre ngaich Pēlām, ngaich kiröönngöre havantöre ngaich nö i chūök re: kiröönngöre ngaich Pēlak nö i kū-öre.