Read Car_Nicobarese KINṘEŪKÖ 25 Bible Online

KINṘEŪKÖ 25 - Car_Nicobarese bible

KINṘEŪKÖ 25

¹Ngaich Israĕl nö ngöh nö i Sittim, ngaich yik tarik nö chô-òkānö nö i yik kikānö kūön aṅ Mô-āp:

²Pò cha nö havëtö yik tarik nö i tökētu nö i nup tēv cha: ngaich nyā-aṅvkūö yik tarik, ngaich sōnngöre nö i nup tēv cha.

³Ngaich Israĕl nö hanôltöre nö in Pē-āl yik aṅ Pī-ōr: hūlökūö ngaich ngam tanāinyö ngam Mā Tēv nö in Israĕl.

⁴Ngaich ngö ṙô ngam Mā Tēv tö Môsös, Kēḵ yip mākūö yip tarik nö ṙòkhöre, kiseutngen cha im Mā Tēv i kūö ngam tavūöi, hòṅ ngam tanāinyö ngam Mā Tēv nö havööṙikūö nö ṙā-ang in Israĕl.

⁵Ngaich ngö ṙô Môsös tö yik kamhôṅka aṅ Israĕl, Kö fëlngö yip tarik re yin mahanôltöre nö in Pē-āl aṅ Pī-ōr.

⁶Ngaich, yĕh meuk, yihtöre ök kūön Israĕl hĕng tak nö kumtö kikānö hĕng tak aṅ Mītiā nö i yik holre nö i kūö Môsös, i kūö yik ṙôngö kūön Israĕl inrē, i saha cha nö peuiny nö ik inkūp rūkui manūlö.

⁷Ngaich hē Finehas nö meūkö e ök kikōnyö kūön Ēliasör, ök kūönṙô kikōnyö kūön Āròn; choholre ngaich anga-aṅ nö ṙā-ang i yik ṙôngö tarik, kēḵ ök vöi re nö eltī re;

⁸Lūḵ ök tarik ngaich anga-aṅ aṅ Israĕl nö ël ök inrūkui, ngaich sapngen cha nö nëtre taka tök tarik Israĕl, tök kikānö inrē nö nyāha aich. Ngaich ök invah tölëlngökūö nö asökiröön nö ṙā-ang in yik kūön Israĕl.

⁹Ngaich cha-a yik tökapah tökūö ök invah nö lanëlngö nö nët anāi fën köny.

¹⁰Ngaich vë-ekūö Môsös ngam Mā Tēv, nö ngö ṙô,

¹¹Havööṙi kūö lanīnö Chin ṙā-ang in yip kūön Israĕl tö Finehas ök kūön Ēliasör kikōnyö, öp kūönṙô kūön Āròn kikōnyö, pò ò nö kalēḵĕlōn nö i ngam kumlēḵlōn Chu tö cha, lökten Chin öt keuheūtngöre vah tī tö yip kūön Israĕl im kumlēḵlōn Chu.

¹²Ngö ṙô pöichö, Yĕh meuk, kētö ngam kinlēḵngô aṅ i lanāmö chin in ò:

¹³Ngaich angū-ö min nö in ò, ip kūön ò inrē unôichrit ò, ngam kinlēḵngô töt chanūhuvṙen nö im la-en kūönṙô; pòn kalēḵĕlōn anga-aṅ nö i ngam Tēv re, ngaich vī inlām tökööl yip kūön Israĕl.

¹⁴Angū-ö ön ngih minënyö öp tarik Israĕl öp töfëli öp anòngngö vah ök kikānö aṅ Mītiā, Simrī ök, kikōnyö kūön Salū, mā elpatī yöngre in yip aṅ in Sumōn.

¹⁵Ngih minënyö ök kikānö aṅ Mītiā ök töfëliyö, Kòspī ök kūön Sūr nö kikānö; yöngkūö yik tarik i Mītiā nö i patī yöngre.

¹⁶Ngaich vë-ekūö Môsös ngam Mā Tēv, nö ngö ṙô,

¹⁷Hakihten yip aṅ Mītiā, fëlö cha inrē.

¹⁸Tön hakihten yīö yip nö i tötlöök, aṅtī tö e cha-a nö haṙöingen yīö in Pī-ōr, i inlahen Kòspī inrē, ök kikānö kūön öp Mā aṅ Mītiā yik töfëliyö ik sakāmö ök lanëlngö i inlahen Pī-ōr.