Read Car_Nicobarese KINṘEŪKÖ 27 Bible Online

KINṘEŪKÖ 27 - Car_Nicobarese bible

KINṘEŪKÖ 27

¹Ngaich ṙuöhtöre yik kikānö kūön Selōfehat, kikōnyö kūön Hēför, kikōnyö kūön Kilīöt, kikōnyö kūön Mākīr, kikōnyö kūön Manasē, aṅ i mupīhö Manasē, öp kikōnyö kūön Yôsĕf: anū-ö nun në minënyö yik kikānö kūön ò; Mahla, Nō-a, Hòkla, Milka, Tirsa inrē.

²Söklöre cha-a nö i kūö Môsös, i kūö öp kūönrô Ēliasör inrē, i kūö yik mākūö inrē tö yik ṙôngö tarik nö ṙòkhöre ik inkūp rūkui manūlö, ngö ṙô cha-a,

³Kapah ök yöng ih kikōnyö nö el inchōnngö, rö-ö ök misī nö hol cha yik mahamūlöre nö lā-alkūö ngam Mā Tēv nö hol Kōrah; i tökööl re ök anga-aṅ nö kapah; hö-ö inrē anga-aṅ nö kūönu tö kikōnyö.

⁴Kūöyòh ök minë-eny ök yöng ih kikōnyö nö kē-ĕyö nö ṙā-ang ik mupīhö ò, yĕn öt kūönu anga-aṅ tö kikōnyö: kētö amin ih in yip makalaha öp kikōnyö yöng ih.

⁵Ngaich Môsös nö kētö ngam vahë-eny cha nö i kūö ngam Mā Tēv.

⁶Ngaich ngö ṙô ngam Mā Tēv nö vë-ekūö Môsös,

⁷Huveū-eu ṙô yip kikānö kūön Selōfehat: hòṅ kē-ĕkūö cha man tö amin cha in yip makalaha ök yöng cha kikōnyö; vīten ngam amin ök yöng cha min kikōnyö nö chuh in cha.

⁸Ngaich ngö ṙô më-eṅ vë-ekūö yip kūön Israĕl, Yĕh kapah öp tarik, ngaich rö-ö nö kūönu tö kikōnyö, ngaich yī-ö min vīten ngam amin ò nö chuh ip kūön ò kikānö.

⁹Ngaich yĕn öt kūönu anga-aṅ tö kikānö, ngaich yī-ö min kētöp amin ò nö ip makalaha ò.

¹⁰Ngaich yĕn öt māku-alaha anga-aṅ, ngaich yī-ö min kētö öp amin ò, ip makalaha öp yöng ò kikōnyö.

¹¹Yē öp kikōnyö yöng nö öt māku-alaha ngaich yī-ö min kētö ap amin ò ip kisānö ò öp ṙanët ò im mupīhö ò, ngaich anga-aṅ min nö amīnu tö e: ngaich angū-ö nö in Israĕl nö chöngö i inkaha fālen, sā tinöölô Môsös tö ngam Mā Tēv.

¹²Ngaich ngö ṙô ngam Mā Tēv tö Môsös, Yônlö man i kui ngih rôngö Aparim, ngëichkö ap panam öp kahëtö Chu in yip kūön Israĕl.

¹³Yē meh keuheūtö mat ngëichkö e, hamūli min më-eṅ ngaich in yip tarik re, sā ök kahëm meh Āròn nö hamūliyö nö ngaich:

¹⁴Pò nā ahôngö chöngö Chu el inchōngö i Sin, hē yip ṙôngö tarik nö ahôngen, an ma-ahetlen Chu i kūö cha nö i nup mak. (Anū-ö nup mak i Meripā, i Katĕs el inchōnngö i Sin.)

¹⁵Ngaich ngö ṙô Môsös nö vë-ekūö ngam Mā Tēv,

¹⁶Vīlö tarik an yēḵ ngam Mā Tēv, ngam Tēv ma-alaha tarik nö ṙòkhöre, nö yöngṙen vē ṙôngö tarik,

¹⁷Öp mu-urēhĕkūö cha nö kunyī-inyre, öp mu-urēhĕkūö cha inrē nö kuhēthötre, öp kamëhötnen cha inrē; hòṅ vē ṙôngö tarik ngam Mā Tēv nö öt sā sīṅp töt yōmuṙen.

¹⁸Ngaich ngam Mā Tēv nö ngö ṙô tö Môsös, Kē-ĕ Yôsuā man öp kikōnyö kūön Nön, öp tarik tö-īnu tö ma-alaha, ṙātö eltīre i kui ò;

¹⁹Asöklen ò i kūö öp kūönṙô Ēliasör i kūö yip ṙôngö tarik inrē; kētö chöngö ò i kūö cha.

²⁰Ngaich më-eṅ inrē ṙātö ap minā-aṅ re i kui ò, hòn ṙòkhöre yip ṙôngö kūön Israĕl nö hang chöngö ò.

²¹Sökhak min anga-aṅ nö i kūö ap kūönṙô Ēliasör, ngaich kē-ĕvkūö min töp inchōḵten re i kūö ngam Mā Tēv nö lökten ip Urim; i chöngö ò min cha-a nö kunyī-inyre, i chöngö ò min cha-a inrē nö kuhēthötre, anga-aṅ, ṙòkhöre inrē yip kūön Israĕl nö hol ò tö yip ṙôngö tarik nö ṙòkhöre.

²²Ngaich ngati Môsös sā tinöölô ò tö ngam Mā Tēv; kē-ĕ Yôsuā ngaich anga-aṅ, asöklen ò ngaich nö i kūö ök kūönṙô Ēliasör, i kūö yip ṙôngö tarik inrē nö ṙòkhöre:

²³Ṙātö eltīre ngaich anga-aṅ nö i kui ò ngaich kētö chöngö ò, sā ṙô ngam Mā Tēv nö tölṙô Môsös.