Read Car_Nicobarese KINṘEŪKÖ 28 Bible Online

KINṘEŪKÖ 28 - Car_Nicobarese bible

KINṘEŪKÖ 28

¹Ngaich ngö ṙô ngam Mā Tēv nö vë-ekūö Môsös,

²Tölṙô yip kūön Israĕl, ngö ṙô tö cha, Öp tökētu nö in Chu, nyā-aṅkūö nö tökētu nö in Chu lökten i kūö tameūyö, nö tötahūsa nö in Chu, haköpka min tö yīö ip ṙētak e, nö kētu nö in Chu.

³Ngaich ngö ṙô më-eṅ min tö cha, Ngih ön tökētu lökten i kūö tameūyö nö tökētu min tö yīö nö im Mā Tēv; kōiny kūön sīṅp aṅ im raneh samyeūheu töt pitōtu, nët nòng i töhĕng sakāmö, nö töng iṙūöhen töföngö tökētu.

⁴Hĕng nòng kōiny sīṅp kahëtö meh min tö peuheū, ngaich ngam tahëng sīṅp kētu min tö meh tö harap;

⁵Ngaich hĕng i tösöm i töhĕng efā öp tö pahīöya atra, nö nyā-aṅ tökētu, kalūöchö töp tösōngö tavī-i hĕng i töfën öp töhĕng hin.

⁶Tö-iṙūöhen an angū-ö töföngö tökētu, ngam chöngö i kui rôngö Sināi nö tötahūsa, nö im Mā Tēv, lökten i kūö tameūyö.

⁷Ngam tö-ôkö tökētu ip töhĕng nòng sīṅp, hĕng i töfën i töhĕng hin, im töhet chūök min më-eṅ ṙöhnyö ngam tö-ôkö tökētu i ngam Mā Tēv, aṅ im tökalēḵ.

⁸Kētö ngam tahëng nòng sīṅp min më-eṅ tö harap: nö sā ngam nyā-aṅ tökētu tö peuheū, sā ngam tö-ôkö tökētu, kēten u min më-eṅ, nö tökētu lökten i kūö tameūyö tötahūsa nö i ngam Mā Tēv.

⁹Im anôilö sakāmö, nët nòng nup kōiny sīṅp aṅ ël töhĕng samyeūheu töt pitōtu, ngaich nët i tösöm öp töhĕng efā, ṙôken öp töpahīöya atra nö nyā-aṅ tökētu, kalūöchö tö tavī-i, töp tö-ôkö tökētu inrē:

¹⁰Angū-ö ön ngih töföngö tökētu kaheuk anôilö, nö hol tö ngam tö-iṙūhö töföngö tökētu, tö ngam tö-ôkö tökētu inrē.

¹¹I ranehtökūö nup chingëṅt yīö, kētö töföngö min yī-ö tökētu im Mā Tēv: nët nòng kun kōiny nuā, hĕng nòng kōiny sīṅp inrē, sat nòng kōiny sīṅp aṅ el töhĕng samyeūheu töt pitōtu;

¹²Lūöi i tösöm i töhĕng efā töpahīöya atra nö nyā-aṅ tökētu, kalūöchö tö tavī-i, töhĕng nòng kōiny nuā; nët i tösöm öp töpahīöya atra nö nyā-aṅ tökētu, kalūöchö tö tavī-i, i töhĕng nòng kōiny sīṅp;

¹³Ṙōl i tösöm ṙôken öp töpahīöya atra kalūöchö tö tavī-i nö nyā-aṅ tökētu i töhĕng nòng kōiny sīṅp; nö töföngö tökētu tötahūsa, tökētu nö im Mā Tēv.

¹⁴Öp tö-ôkö tökētu tö cha min vāin ròngti i töhĕng hin i töhĕng nòng kōiny nuā, ane inrē ròngti i töròngti töhĕng hin töhĕng nòng kōiny sīṅp, fën i töhĕng hin inrē i ngòh sīṅp; töföngö an angū-ö tökētu i töhĕng nòng chingëṅt nö keuheūtlö nup chingënt ngam samyeūheu.

¹⁵Hĕng nòng kōiny pököre tökētu im Mā Tēv kūö tökööl; kētu min anga-aṅ nö hol ngam tö-irūöhen tökētu töföngö tökētu, tö ngam tö-ôkö tökētu.

¹⁶Ngaich im raneh chingëṅt, im finën sīön sakāmö ngam chingëṅt, anga-aṅ chingëṅt ngam pāska ngam Mā Tēv.

¹⁷Im tinneui sīön sakāmö ngam chingëṅt anga-aṅ, tökiröng sakāmö min angū-ö; sat sumkam min nyinā-aṅ töt aföhlöng ròtī.

¹⁸Ip raneh min sakāmö, töhet manūlö min angū-ö; öt la-evṙen min yī-ö;

¹⁹Kētö tökētu pöri min yī-ö lökten i kūö tameūyö, töföngö tökētu nö im Mā Tēv; nët nòng kōiny nuā tökūönö hĕng nòng kōiny sīṅp, sat kōiny sīṅp töhĕng höiny samyeūheu; uh anū-ö min nö töpitōtu:

²⁰Öp nyā-aṅ u tökētu, töpahīöya atra kalūöchö tö tavī-i: lūöi i tösöm tī yīö min kē-ĕti i töhĕng nòng kōiny nuā, nët i tösöm inrē i töhĕng nòng kōiny sīṅp;

²¹Ṙōl i tösöm tī meh min kē-ĕti i töhĕng nòng kōiny sīṅp i nup tösat nòng kōiny sīṅp;

²²Hĕng nòng inrē kōiny pököre tökētu kūö tökööl, nö inlām tökööl yīö.

²³Kētö u min yī-ö nö hol nup töföngö tökētu tö peuheū, nup tö-iṙūöhen töföngö tökētu.

²⁴Ngö inlahen yin min kaheuk sakāmö kē-ĕti, sat sumkam, öp nyā-aṅ tökētu lökten i kūö tameūyö, tötahūsa nö i ngam Mā Tēv: kētu min angū-ö nö hol ngam tö-iṙūöhen töföngö tökētu, tö ngam tö-ôkö tökētu inrē.

²⁵Im sinātö sakāmö öp töhet manūlö yīö min; hö-ö yī-ö la-envö.

²⁶Im sakāmö ranehlö ṙòng hē yīö kētö tufömngöre nya-aṅ tökētu im Mā Tēv, ip tökiröng sakāmö nup afta yī-ö min öi im töhet manūlö; hö-ö yī-ö min la-envö:

²⁷Kētö töföngö pöri min yī-ö i ngam Mā Tēv nö tötahūsa; nët nòng tökūönö kōiny nuā, hĕng nòng kōiny sīṅp, sat nòng kūön sīṅp töhĕng höiny samyeūheu;

²⁸Nup nyā-aṅ u tökētu, töpahīöya atra kalūöchö tö tavī-i, lūöi i tösöm ṙôken i töhĕng nòng kōiny nuā, nët i tösöm ṙôken i töhĕng nòng kūön sīṅp,

²⁹Ṙōl i tösöm ṙôken i töhĕng nòng kūön sīṅp nup tösat nòng kūön sīṅp;

³⁰Hĕng nòng kōiny pököre, vanī inlām tökööl yīö.

³¹Hol ngam tö-iṙūöhen töföngö tökētu, tö ngam nyā-aṅ töföngö tökētu inrē, kētö u min yī-ö, (nö töt pitōtu,) tö nup tö-ôkö tökētu inrē.