Read Car_Nicobarese KINṘEŪKÖ 30 Bible Online

KINṘEŪKÖ 30 - Car_Nicobarese bible

KINṘEŪKÖ 30

¹Ngaich Môsös nö vë-ekūö yik mākūö miyöngö yik kūön Israĕl, nö ngö ṙô, Angū-ö ön ngih hachöngten ngam Mā Tēv.

²Yē tarik nö chūöku ṙô nö kinlēḵngôre nö i ngam Mā Tēv, hēk inrē yĕn chūöku ṙô nö kilēḵngôre nö ṙāngö öp yô-òv ṙahā-angre, un öt hateungngö ṙô re min anga-aṅ; ngatī min anga-aṅ asā nup lamöknyö elvāng re.

³Yē öp kikānö inrē nö chūöku ṙô nö kilēḵngôre nö i ngam Mā Tēv, tö öp ṙahāngöre, i patī ngam yöng re anga-aṅ kikōnyö nö ṙòngmöng ayal:

⁴Ngaich ngam yöng ò kikōnyö nö hang ṙô ò, nö chūöku ṙô nö kilēngôre töp töt kēkaṙen, ngaich nöng öt vëkö ṙô ò ngam yöng ò kikōnyö: köp ngaich nup ṙô ò min nö chūöku ṙô nö kilēḵngôre, nup kinlēḵngô ò tö nup töt kēkaṙen, köp min nö in ò.

⁵Yē öp yöng ò pöri kikōnyö nö sōten ò ik hē ò nö hang ṙô ò; öt hĕng ngaich nuk töchūöku kinlēḵngô ò, hēk inrē nup kinlēḵngô ò tö nup töt kēkaṙen, köp min nö in ò: ngam Mā Tēv an min ma-aṙēlen ò, pò ngam kikōnyö yöng ò nö sōten ò.

⁶Ngaich yĕn hapihtu anga-aṅ nö i pīhöre, nö ṙòngmö aṅhaṅv kui töp töchūöku kinlēḵngôre, hēk inrē öp tö sayah köiny ṙô nö i minuh ò, öp lökngen ò nö köpngö nö im kinlēḵngôre;

⁷Ngaich hāngö angū-ö tö ngam pīhö ò, ngaich öt vëken ò anga-aṅ ik hē ò nö hāngö e: köpngö ngaich min ngam töchūöku kinlēḵngô ngam kinlēḵngô inrē.

⁸Yē ngam pīhö ò pöri nö sōten ò ik sāha re nö hāngö e; ngaich anga-aṅ nö vī an nö öt aṅhaṅv kui tö nup töchūöku kinlēḵngô ò, nup tö sayah köiny ṙô inrē i minuh ò, nup ṙô ò nö kilēḵngôre tö nup töt kēkaṙen: ngam Mā Tēv min ngaich ma-aṙēlen ò.

⁹Sökhakṙen pöri nö köp nö in ò ngam töchūöku kinlēḵngô ngam tafiösi kikānö hēk inrē ngam mayū, keuheūtlöre nup ṙô ò nö kilēḵngôre tö nup töt kēkaṙen.

¹⁰Ngaich yĕn el patī ngam pīhöre anga-aṅ nö chūöku ṙô nö in re tö nup töt kēkaṙen;

¹¹Ngaich hāngö angū-ö töp pīhö ò, ngaich rö-önö vëken ò, öt sōten ò inrē; ngaich köpngö min nö ṙòkhöre nup töchūöku kinlēḵngô ò, ṙòkhöre inrē nö köpngö nup kinlēḵngô ò, tö nup töt kēkaṙen.

¹²Yē ngam pīhö ò pöri nö tahngen u ik hē ò nö hāngö u; ngaich nup töng sitih ṙô lamöknyö elvāng ò töchūöku kinlēḵngô, hēk inrē kinlēḵngô, hēk inrē kinlēḵngô ò tö nup töt kēkaṙen, öt köpngö min: vīten u an min ngam pīhö ò nö öt köp; ngaich ngam Mā Tēv min nö aṙēlen ò.

¹³Ṙòkhöre nup töchūöku kinlēḵngô, ṙòkhöre inrē nup kinlēḵngô ò, tö nup töt kēkaṙen, haköpiyö anū-ö nö kô-òren nö vīten e nö öt köp.

¹⁴Yē ngam pīhö ò pöri nöng öt vëkô ò i tum sumkam; ngaich anga-aṅ nö mahaköpngö nuk ṙô ò töchūöku kinlēḵnô, hēk inrē nuk kinlēkngô ò tö nup töt kēkaṙen nuk mi-el kui ò: mahaköpngö u an nö ngaich, pòn öt ṙô-òvö tö ò ik sakāmö hē re nö hāngö u.

¹⁵Ngaich yē ò pöri min nö vīten u nö öt köp unôichrit re nö hāngö u; ngaich anga-aṅ min nö keun tökööl ngam pīhöre.

¹⁶Anū-ö nun në chöngö, tinöölô Môsös tö ngam Mā Tēv, i tarik töm pīhö ò inrē, i kikōnyö yöng tö ngam kikānö kūön ò inrē, yē ò nö ṙòngmö ayal, nö i patī öp kikōnyö yöng re.