Read Car_Nicobarese KINṘEŪKÖ 31 Bible Online

KINṘEŪKÖ 31 - Car_Nicobarese bible

KINṘEŪKÖ 31

¹Ngaich ngö ṙô ngam Mā Tēv nö vë-ekūö Môsös,

²Havāhal vah yip kūön Israĕl man in yip aṅ Mītiā: ngaich unôich min më-eṅ hamūltöre i yip tarik meh.

³Ngaich vë-ekūö yik tarik ang Môsös, nö ngö ṙô, Kētö aṅtī yip tarik yip in yīö nö kiyung, hòṅ cha nö kiröönngöre nö lā-al yip aṅ Mītiā, nö keuheūtngen ngam invāhal tī ngam Mā Tēv nö in yip aṅ Mītiā.

⁴I töhĕng miyöngö hĕng köiny, tahīntö yīö min nö kiyung, i nup miyöngö Israĕl nö ṙòkhöre.

⁵Ngaich kētu nö umuh aṅ i yip tökönyu i Israĕl, hĕng köny i töhĕng miyöngö, nët sīön köny yip tö kētu aṅtī nö kiyung.

⁶Tīni cha-a ngaich tö Môsös, nö im kinyūngö, hĕng köny i töhĕng miyöngö, cha-a Finehas, inrē ök kūönṙô kikōnyö, hol tö nup chūökṙen ngam töhet chūök tö nup römpet eltī ò inhangkö kanihngen.

⁷Kiyung cha-a ngaich nö lā-al yik aṅ Mītiā, sā chöngö ngam Mā Tēv nö in Môsös; keuheūtngöre vah tī cha-a ngaich tö yik kikōnyö.

⁸Anòngngö vah yik töfëli tö cha yik rācha aṅ Mītiā, nö kupāha tö cha: Ēvī, Rēkem, Sūr, Hör, Rēpā inrē, yik tö taneui tak rācha aṅ Mītiā: fëli tö cha inrē Pēlām ök kikōnyö kūön Pī-ōr nö nyāhaṅv tö sanët.

⁹Ngaich yik kūön Israĕl nö kēḵ yik kikānö aṅ Mītiā nö tökē-ĕ tö yik kun kūön cha inrē; ṙòkhöre nuk nuā cha, ṙòkhöre inrē nuk chehen cha, kē-ĕ tö cha nö pôḵ cha.

¹⁰Ṙòkhöre nuk elpinnāmen cha inrē nup chūök cha nö iyöng, tö nuk elyöngö cha, nö haṙāpi tö cha.

¹¹Keuheūtlöre tī cha-a ngaich tö nuk kahil cha hĕnghöre tarik hĕnghöre tōṙeūla nuk pôḵ cha.

¹²Ngaich kētö yik tökē-ĕ cha-a, tö nuk pôḵ cha, tö nuk kahil cha inrē nö in Môsös, in ök kūönṙô inrē ang Eliasör, i yik ṙôngö kūön Israĕl inrē nö ip elyöngö töṙā-akūö panam Mô-āp, öp töröhta nö i Yôtön i Yerikō.

¹³Ngaich Môsös, ök kūönṙô inrē Ēliasör, ṙòkhöre inrē yik mākūö ṙôngö tarik, nö kiröönngöre nö höngkūö cha, nö lā uk ök elyöngö.

¹⁴Ngaich tainy ang Môsös tö yik yöngṙen tököṅnyu, yik yöngṙen töṙôngö inrē, yik yamih nö ṙeū-eung im kinyūngö.

¹⁵Ngaich Môsös nö ngö ṙô tö cha, Ṙòkhöre yik kikānö nö hayöölöngṙen tö yīö nö aṅ?

¹⁶Yĕh meuk achā-a yin töpô-òvkūö tö yik kūön Israĕl, nö lökten i tī Pēlām, nö köölö fālen nö im Mā Tēv, i tö ngatī nö i Pī-ôr, ngaich lökten ök invah in yik ṙôngö tarik ngam Mā Tēv.

¹⁷Lökten kumpah yik kikōnyö in yip kun nyīö, kumpah yip kikānö inrē yip tö ngaich nö akahakūö tö kikōnyö nö töngaich nö hulalhaka nö in ò.

¹⁸Ṙòkhöre pöri yip kikānö nyīö, yip töt akahakūö tö kikōnyö nö hulalhaka nö in ò; nö haköpö nö aṅ nö in yīö.

¹⁹Ha-uknyen cha yin nö sat sumkam nö lā uk ngam elyöngö: öp tö ngaich nö kapāha tī tö töng tarik, ane inrē öp töng lamūölkö ök töfëli, im linūöi sumkam yī-ö ahetlöre, im sinātö inrē sakāmö, yī-ö tö yip tökē-ĕ inrē tö yīö.

²⁰I töhĕng inrē hilā, ṙòkhöre inrē nup tövī-i aṅ i uk, ṙòkhöre inrē nup tövī-i sanôi pököre, ṙòkhöre inrē nup tövī-i aṅ i chōn, ahetlöre yī-ö tö u.

²¹Ngaich ök kūönṙô Ēliasör nö ngö ṙô tö yip tarik kumyung yik kumröönngöre nö i kumyung, Ngih ön chöngö aṅ im chöngö ngam hachöngten ngam Mā Tēv nö in Môsös.

²²Humlum pöri, rupīö inrē, mās, vët kôpöre, pirum inrē.

²³Ṙòkhöre nup tökô tö tameūyö, lök i kūö tameūyö tī min yī-ö, ngaich het min angū-ö; sön pöri angū-ö min nö ahetlöngö tö ngam mak inrēvngö: nup tökô inrē nö i kūö tameūyö lök el mak tī yī-ö tö u.

²⁴Söich nup hilā re yī-ö min im sinātö sakāmö, ngaich möl yī-ö min im sinātö sakāmö, ngaich möl yī-ö min het, unôichrit e min yī-ö ngaich kuhēthötre el ngam elyöngö.

²⁵Ngaich ngam Mā Tēv nö vë-ekūö Môsös, nö ngö ṙô,

²⁶Kaheuk ṙôken nup pôḵ re man nup tökē-ĕ nö ngaich, hĕnghöre tarik töṙeūla inrē, më-eṅ, ngam kūönṙô inrē Ēliasör, tö yip mākūö patī ṙôngö tarik:

²⁷Nët tit tī michööḵ nup pôḵ; in yip tarik töhuveū nö i kinyūngö:

²⁸Kē-ĕti im Mā Tēv in yip tarik kumyung yip tökô-òng röön nö i kinyūngö: hĕng tak tarik i tö taneūyòng, hĕnghöre tarik, hĕnghöre kōiny nuā, köttö inrē, töṙeūla inrē:

²⁹Kē öp töròngti in cha, ngaich kētö e in öp kūönṙô Ēliasör, nö tökētu nö töhatāilöng nö im Mā Tēv.

³⁰Kē më-eṅ inrē hĕng ip töròngti aṅ i yip kūön Israĕl, öp tötūöknyu nö ṙā-ang i nup tö taneui anāi, tarik, kōiny nuā, köttö, töṙeūla, nuā, ngaich kētu nö in yip Lēvī, yip mahayōm ngam inrūkui ngam Mā Tēv.

³¹Ngaich Môsös, ök kūönṙô inrē Ēliasör nö ngatī, sā inchöngten Môsös tö ngam Mā Tēv.

³²Ngaich nuk pôḵ nö tafūölòng sat anāi taneui köny sīṅp, nö mötlö ṙôken tö nuk pôḵ yik tarik tökē-ĕ tö yik kumyung tarik,

³³Nët sīön köny tafūöl anāi köiny nuā.

³⁴Hĕng köny tafūöl anāi köttö,

³⁵Lūöi anāi nët köny tarik nö ṙòkhöre, yip kikānö töt akahakūö tö kikōnyö nö ṙōlhak nö in ò.

³⁶Öp töròngti inrē, öp kintölö cha yip kumrööngöre nö im kinyūngö, nö lūöi yòng, lūöi anāi sat köny, taneūyòng sīṅp:

³⁷Tafūölòng sat anāi taneui sīṅp kinë-ekūö ngam Mā Tēv.

³⁸Lūöi anāi tafūöl köny nuā; ngaich sat anāi nët kinë-ekūö ngam Mā Tēv.

³⁹Lūöi anāi köny, taneūyòng köttö, tafūöl anāi hĕng nòng nup kinë-ekūö ngam Mā Tēv,

⁴⁰Tafūöl sīön köny yik tarik inrē; lūöi anāi nët tak tarik aṅ in cha kinë-ekūö ngam Mā Tēv.

⁴¹Ngaich Môsös nö kētö yik kinë-ekūö ngam Mā Tēv, töhatāilöng tökētu, in ök kūönṙô Ēliasör, sā tinöölô Môsös tö ngam Mā Tēv.

⁴²Yip töròngti aṅ in yip kūön Israĕl, yip michööḵlö Môsös nö aṅ i yip tarik kumyung,

⁴³(Lūöyòng lūöi sat köny taneūyòng sīṅp töròngti aṅ in yik ṙôngö tarik,

⁴⁴Lūöi anāi tafūöl köny nuā,

⁴⁵Lūöi anāi köny,taneūyòng köttö,

⁴⁶Tafūöl sīön köny tarik;)

⁴⁷I nup töròngti in yip kūön Israĕl, hēngö tahūöknyi Môsös tö aṅ i tö taneui anāi, hĕnghöre tarik, töṙeula inrē, ngaich kētö u nö in yik Lēvī, yik mahayōm ngam inrūkui ngam Mā Tēv; sā tinöölô Môsös tö ngam Mā Tēv.

⁴⁸Ngaich yik yöngṙen tököṅnyu kumyung, yik yöngṙen töhĕng köny, yik yöngṙen töhēngòng inrē, nö yih nö haröhtöre nö in Môsös:

⁴⁹Ngaich ngö ṙô cha-a tö Môsös, Kaheuk tum tak tarik yin vē kūön meh, yip kumyung nö elkatòh ih, ngaich öt hĕng tak hanātökūö aṅ in ih.

⁵⁰Ngaich īhö kumtö tökētu im Mā Tēv, nö taneūngen töhĕng tak tarik humlum yanöötö, sayōk kalröön, merkul kël inrē, kinlong minkahngö, nang, hanūöt inrē, nö vanī inlām tökööl ih i kūö ngam Mā Tēv.

⁵¹Ngaich Môsös, ök kūönṙô inrē Ēliasör, nö kēḵ nuk humlum nö in cha,

⁵²Keuheūtlöre inrē nuk humlum töhatāilöng tökētu, nuk tökētu tö cha nö i ngam Mā Tēv, aṅ i yik yöngṙen tököṅnyu, aṅ i yik yöngṙen tököiṅnyu, aṅ i yik yöngre töṙôngu inrē, nö tafūöl sīön köny, sātòng taneui anāi sīön köny, sātòng taneui anāi siköl.

⁵³(Pò yik kumyung tarik nöng kö kēḵ taneūngen re tö chehen re.)

⁵⁴Ngaich Môsös töp kūönṙô inrē Ēliasör nö kēḵ nup humlum aṅ i yik yöngṙen tököṅnyu, aṅ i yik yöngṙen töṙôngu inrē, ngaich kēhöt u nö el rūkui manūlö, nö inköpkölōn tö yik kūön Israĕl nö i kūö ngam Mā Tēv.