Read Car_Nicobarese KINṘEŪKÖ 32 Bible Online

KINṘEŪKÖ 32 - Car_Nicobarese bible

KINṘEŪKÖ 32

¹Ngaich yik kūön Rūpön, tö yik kūön Kāt inrē, nö kiröngen aṅ-in tö nuā: ngaich hē cha nö meuk öp panam Yāsör, öp panam Kilīöt inrē, meūkö e cha-a ngaich nö chūök nuā.

²Yihtöre ngaich yik kūön Kāt, tö yik kūön Rūpön inrē nö vë-ekūö Môsös, tök kūönṙô inrē Ēliasör, tö yik mākūö ṙôngö tarik inrē, nö ngö ṙô.

³Atarōt, Tipòn, Yāsör, Nimrah, Hespòn, Eleāleh, Sēpam, Nēpō, Pē-òn,

⁴Në panam töpiṙāpi tö ngam Mā Tēv nö i kūö yik ṙôngö Israĕl, nö panam nuā, ngaich vē tarik meh nö aṅhaṅv in tö nuā:

⁵Ngaich ngö ṙô cha-a, Yē ih aheukhuvö i kūö meh, hökngen ngih panam nö kētu nö amin vē tarik meh, uh īhö havāngi lā muh tö Yôtön.

⁶Ngaich ngö ṙô Môsös tö yik kūön Kāt, kūön Rūpön inrē, Höng yip hol yīö yip min kumyung, ngaich höng ūichhakṙen yī-ö min ihih?

⁷Sitih öyih öi öt kumlē-ĕng ellōn vē kūön Israĕl öi im invāngngöre lā muh im panam ngam kahëtö ngam Mā Tēv nö in cha?

⁸Ngatī yik muvöhngö yīö misī, hē chu tīnngen cha nö ṙā-ang Katĕsparnea nö ngëichkö ap panam.

⁹Ngaich hē cha nö chuh el achāṙô Eskòl, ngaich meuk ngam panam, ngaich öt kumlēngö ellōn yik kūön Israĕl cha-a, pòn sōtu cha-a nö chuh im panam ngam kahëtö ngam Mā Tēv nö in cha.

¹⁰Ngaich ngam tanāinyö ngam Mā Tēv nö hūlökūö ik sakāmö angū-ö, ngö ṙô anga-aṅ nö chūöku ṙô,

¹¹Öt hĕng tak tö yip tarik yip kumnyī-inyre nö ṙā-ang Aikup, löktökūö tönët anāi samyeūheu ṙēti söl tulöng, kô-òngrit min nö öt meuk ngam panam ngam kahëtö Chu in Aprahām, Isak, Yāköp inrē Öich chūöku ṙô, pò cha nö öt keuhūtlöre nö tömrit Chu:

¹²Höng keuheūtlöre nö tömrit Kalĕp, ngam kikōnyö kūön Yĕfuneh ök aṅ Kēnis, Yôsuā inrē ök kikōnyö kūön Nön; pò cha nö keuheūtlöre nö tömrit ngam Mā Tēv.

¹³Ngaich ök tanāinyö ngam Mā Tēv nö hūlökuö nö in Israĕl, ngaich vīten cha anga-aṅ nö fën anāi samyeūheu nöng havöktöre nö el inchōn hanöng saha yip tumkölchap nö ṙòkngöre vah, yik tököölö fālen nö i kūö ngam Mā Tēv.

¹⁴Yĕh meuk yin, chōholre yin yī-ö ngaich ṙënngen yik yöng re öi ṙānūölö tarik tököölö fālen, öi hēk ṙūölö tanāinyö ngam Mā Tēv nö lā in Israĕl.

¹⁵Yē yīö havööngökūöre ṙā-ang im tinöömörit ò, ngaich anga-aṅ min nö hēk nö ṙāngen cha nö el inchōn, ngaich yī-ö min keuheūtngöre vah tī tö vē tarik.

¹⁶Ngaich cha-a nö haröhtöre nö in ò, nö ngö ṙô, Vīlö kinlōngö sīṅp in min ihih chūök në chehen re, elpinnāmen inrē chūök vē kūön ih:

¹⁷Ngaich halēnöre pöri min īhö kē aṅtī re öi kiröönngöre urēhĕkūö yip kūön Israĕl, hanöng saha ih taichngö tī tö cha ip chūök cha; ngaich yip kūön ih min nö iyöng ël nup tökinlōnguvö elpinnāmen tökūö yip aṅkūö ngih panam.

¹⁸Hö-ö in min havah i patī re, hanöng saha vē kūön Israĕl nö kö amīnu tö amin re.

¹⁹Pò ih öt hòṅ in cha, amīnu lā muh tö Yôtön lā kūö inrē; pò öp amin ih nö ngaich nö fuk in ih nö lā hih tö Yôtön lā chuhöt.

²⁰Ngaich ngö ṙô Môsös tö cha, Yē yīö hòṅ ngatī, yē yīö hòṅ kē aṅtī re öi kiröönngöre urēhĕkūö ngam Mā Tēv im kinyūngö,

²¹Ngaich kö havāngngö kui Yôtön min yip tö-aṅhaṅvtī tarik nö urēhĕkūö ngam Mā Tēv, hanöng saha tī ò nö ahōngö yip lā-al re nö ṙā-ang i kūö Ò,

²²Ngaich ngam panam nö i kūö ngam Mā Tēv nö hang chöngö: ngaich möl yī-ö min unôich havan, öi öt fāluṙen lā im Mā Tēv, lā in Israĕl inrē; ngaich ngih panam min nö amin yīö i kūö ngam Mā Tēv.

²³Yē yīö pöri min öt ngatī, yĕh meuk, köölö fālen yī-ö ngaich im Mā Tēv: köpölōn töp tökööl yīö nö kôḵti ti min tö yīö.

²⁴Vīlö elpinnāmen re yin chūök yip kūön yīö, kinlōngö sīṅp yīö inrē; ngaich kēken öp lamöknyö elvāng yīö.

²⁵Ngaich yik kūön Kāt tö yik kūön Rūpön, nö ngö ṙô nö vë-ekūö Môsös, Ngaich vē tarik meh nö ngatī sā hinôtöre tö ngam Mā.

²⁶Vē kūön ih, vē pīhö ih, në töṙeūla chehen ih ṙòkhöre nuā ih inrē, nö umuh min elpīnnāmen i Kilīöt;

²⁷Havāngngöre pöri min vē tarik meh vē tö-aṅhaṅvtī nö kiyung, nö i kūö ngam Mā Tēv im kinyūngö, sā ṙô ngam Mā chu.

²⁸Ngaich Môsös nö kētö ngam inchöngten cha ik kūönṙô Ēliasör, in Yôsuā inrē ök kikōnyö kūön Nön, yik mākūö patī miyöngö yik kūön Israĕl inrē.

²⁹Ngaich ngö ṙô Môsös tö cha, Yē yip kūön Kāt min tö yip kūön Rūpön inrē nö hol yīö nö havāngngöre nö lā muh tö Yôtön, nö ṙòkhöre yip tarik nö aṅhaṅvtī nö im kinyūngö, urēhĕkūö ngam Mā Tēv, hē ngam panam min nö hang chöngö yīö; ngaich möl yī-ö min kētö ngam panam Kilīöt nö amin cha:

³⁰Yē cha pöri min nö öt hòṅ havāngngöre nö kumtö aṅtī re nö in yīö, ngaich in yīö cha-a min nö amīnu im panam Kanā-an.

³¹Ngaich ngö ṙô yik kūön Kāt tö yik kūön Rūpön inrē nö sapṙô, Sā ṙô ngam Mā Tēv nö ngaich nö i vē tarik meh, ngati min īhö.

³²Havāngngöre in min kumtö aṅtī re i kūö ngam Mā Tēv im panam Kanā-an, ngaich köpsören pöri min nö in ih ap amin ih lā muh tö Yôtön.

³³Ngaich Môsös nö kē-ĕkūö cha, yik kūön Kāt, tö yik kūön Rūpön, ròngti inrē i miyöngö Manasē ök kikōnyö kūön Yôsĕf, tö ngam pūlngö Sihòn ök rācha aṅ Amôr, tö ngam pūlngö Ôk ök rācha aṅ Pāsān, ngam panam asā nup elpinnāmen tö nuk kūöngö u, nuk el pināmen ngam panam nö vinngö.

³⁴Ngaich yik kūön Kāt nö vīlen Tīpòn; Atarōt, Arō-ĕr inrē;

³⁵Atōt, Sōfān, Yāsör, Yòk pihah inrē:

³⁶Pĕtnimrah, Pĕtharan inrē: tökalonglöng nö el panam, kinlōngu sīṅp inrē.

³⁷Ngaich yik kūön Rūpön nö vīlen Hespòn, Eleāleh, kiriatēm inrē;

³⁸Nēpō, Pē-ālmēon, (haṙī-iyö minë-eny nun anū-ö,) Sipmah inrē: ngaich nup elpinnāmen vahī cha nö kētu minë-eny tö tahëng.

³⁹Ngaich yik kūön Mākīr ök kikōnyö kūön Manasē nö chuh Kilīöt, kē-ĕ e ngaich, ngaich öt panāmu yik Amôr, yik mī-iyöng in e.

⁴⁰Ngaich Môsös nö kēten Kilīöt nö in Mākīr ök kikōnyö kūön Manasē; ngaich iyöng in e anga-aṅ.

⁴¹Ngaich Yāhir ök kikōnyö kūön Manasē nö kiröönngöre nö kē nuk elpinnāmen umuh, ngaich kaheūköre nö Hāvòtyāir.

⁴²Kiröönngöre Nōpah ngaich kē-ĕ Kēnat, tö nuk tuhēt in e inrē, ngaich kaheūkö e nö Nōpah, nö sā minë-eny ò.