Read Car_Nicobarese KINṘEŪKÖ 34 Bible Online

KINṘEŪKÖ 34 - Car_Nicobarese bible

KINṘEŪKÖ 34

¹Ngaich ngö ṙô ngam Mā Tēv nö vë-ekūö Môsös,

²Tölṙô yip kūön Israĕl, ngö ṙô tö cha, Yē yīö pöchö min i ngam panam Kanā-an; (angū-ö ön ngih panam famuk in yīö min nö amin yīö, ngam panam Kanā-an ip sölö nup kūöngö e).

³Ngam lā lòhngö min elyöngö yīö, löktökūö ngam el tönyaṅlnyi i Sin, lök i kaha Itöm, ngaich ngam kūö panam yīö lā lòhngö nö löktö manā-angkūö ngam Sāl Mai kū-ö tö lā chūhöt:

⁴Ngaich ngam kūö panam yīö min nö havööṙikūö nö kū-ö tö lā lòhngö ap paneūlö Akrappim, ngaich lök taseū Sin: ngaich ngam kunnyī-iny e min nö kū-ö tö lā lòhngö Katĕsparnea, ngaich chuh i Hasör-attör, ngaich lök taseū Asmòn:

⁵Ngaich ngam kūö panam min nö havööngökūöre nö ṙā-ang Asmòn söl ip töhëm mak Aikup, ngaich meutnyi min öp talöökö e nö im mai.

⁶Ngam lā sūng kūö panam, ngam tökiröng mai an min kūö panam yīö in e: angū-ö an min kūö panam yīö nö lā sūng.

⁷Ngaich ngih min kūö panam yīö lā kapā: löktökūö ngam tökiröng Mai tī yī-ö min mikahngö e söl ip rôngö Hōr:

⁸Löktökūö ip rôngö Hōr tī yī-ö min mikahngö e söl im kunhëthöt i Hāmat, ngam maneutnyi kūö panam inrē i Sētat min:

⁹Ngaich ngam kūö panam min nö lök Sifròn, ngam maneutnyö e min inrē nö i Hasörēnan: angū-ö an min kūö panam yīö nö lā kapā.

¹⁰Ngaich mikahngö kūö panam re yī-ö lā chuhöt löktökūö Hasörēnan söl Sēfam:

¹¹Ngaich ngam kūö panam min nö kū-ö tö lā taṙeūḵ löktökūö Sēfam söl i Riplah lā chuhöt tö kaha Ain; ngaich ngam kūö panam min nö kū-ö tö lā taṙeūḵ, ngaich sölta min nö i kaha ap mai Kinēret kū-ö tö lā chuhöt:

¹²Ngaich ngam kūö panam min nö kū-ö tö lā taṙeūḵ söl Yôtön, in öp Sāl Mai min öp maneutnyö e. Angū-ö ön ngih min panam yīö sā minë kūö panam mahavīlen e.

¹³Ngaich ngö ṙô Môsös nö tölṙô yik kūön Israĕl, Angū-ö ön ngih panam amin yīö min nö lökten i kinlah taneūngen, ngam chöngö ngam Mā Tēv nö kētū nö i yip tömachūötör miyöngö, ip töròngti miyöngö inrē:

¹⁴Pò öp miyöngö kūön Rūpön sā mitī-i patī yik yöng cha, miyöngö kūön Kāt inrē sā mitī-i patī yik yöng cha, nö ngaich nö teūngen tö amin re, ròngti miyöngö inrē Manasē nö ngaich nö teūngen tö amin re:

¹⁵Ngaich yin më tönët miyöngö ròngti nö teūngen tö amin re lā muh tö Yôtön, i Yerikō kū-ö tö lā chuhöt, lā maneutlö ngam tavūöi.

¹⁶Ngaich ngö ṙô ngam Mā Tēv nö vë-ekūö Môsös,

¹⁷Në nun minë-eny yip tarik yip mumchööḵngö ngam panam min nö in yīö, nö amin yīö: öp kūönṙô Ēliasör, Yôsuā inrē öp kikōnyö kūön Nön.

¹⁸Hĕng tak kahë yī-ö min tö mākūö i töhĕng miyöngö, nö michööḵngö ngam panam nö amin yīö.

¹⁹Në nun minënyö kūön Yĕfuneh aṅ i miyöngö Yūtā.

²⁰Sēmuĕl ök kikōnyö kūön Ammihöt, aṅ i miyöngö yik kūön Sīmōn.

²¹Ēlitāt ök kikōnyö kūön Kislòn, aṅ i miyöngö Penyamin.

²²Pukki ök kikōnyö kūön Yòklī mākūö aṅ i miyöngö kūön Tën.

²³Hannīĕl ök kikōnyö kūön Efòt, aṅ i miyöngö kūön Yôsĕf; mākūö aṅ i miyöngö yik kūön Manasē:

²⁴Kĕmūĕl ök kikōnyö kūön Sitān, mākūö aṅ i miyöngö yik kūön Ifrēm.

²⁵Ēlisafan ök kikōnyö kūön Parnak, mākūö aṅ i miyöngö yik kūön Sepulön,

²⁶Paltiĕl ök kikōnyö kūön Assan, mākūö aṅ i miyöngö yik kūön Isakār.

²⁷Ahihöt ök kikōnyö kūön Sēlōmī, mākūö aṅ i miyöngö yik kūön Asör.

²⁸Pĕtahĕl ök kikōnyö kūön Ammihöt, mākūö aṅ i miyöngö yik kūön Naftalī.

²⁹Cha-a yin vē tö tölô tö ngam Mā Tēv nö michööḵngö amin yip kūön Israĕl im panam Kanā-an.