Read Car_Nicobarese KINṘEŪKÖ 35 Bible Online

KINṘEŪKÖ 35 - Car_Nicobarese bible

KINṘEŪKÖ 35

¹Ngaich ngam Mā Tēv nö ngö ṙô nö vë-ekūö Môsös nö el nup töṙā-akūö panam Mô-āp röhta nö i Yôtön i Yerikö,

²Chöngu tö yip kūön Israĕl, hòṅ cha nö kē-ĕkūö yip Lēvī tö elpinnāmen, chūök cha nö iyöng nö el nup amin cha; tuhēt nup elpinnāmen inrē, kētu min nö i yip Lēvī nö havīlen cha.

³Chūök cha min nup elpināmen nö iyöng; chūök nuā cha min inrē nup tuhēt, chūök chehen cha; chūök nup töṙeūla chehen cha inrē.

⁴Nup tuhēt nup elpanam, nup tö kētu tö yīö min nö in Lēvī, löktökūö ngam kinlōngö ngam elpanam nö kū-ö tö elkahôyö, nö hĕng köny tum mikëlö nö vinngö.

⁵Kalah ṙôkti öp lā elkahôyö töm panam, nö lā chuhöt, nët köny tum mikëlö, lā lòhngö, nët köny tum mikëlö, lā lòhngö, nët köny tum mikëlö, lā sūng nët köny tum mikëlö, lā kapā inrē nët köny tum mikëlö, elmilūkö min ngam elpanam: tuhēt nup elpanam cha nun min anū-ö.

⁶Nup elpanam nup kahëtö yīö min in yip Lēvī, tafūöl nup min elpanam chūök innyatlö, kahëtö yīö nup min nö chūök fanalngö öp tökapahatī tö tarik: hol u inrē nup elpanam töfën anāi nët kahëtö yīö.

⁷Ngaich nup elpanam nup kahëtö yīö in Lēvī, nö fën anāi hevhöre: anū-ö min tī yīö holre tö nup tuhēt.

⁸I inlahen nup elpanam nup kahëtö yīö min nö amin yip kūön Israĕl, pōyen kahë yin in yip töpōyen aṅ-in; kūönen kahë in yip tökūönen aṅ-in: sā ṙôken amin ngòh töhĕng tak ngati tī anga-aṅ nö kētö aṅ elpanam re nö in yip Lēvī.

⁹Ngaich ngö ṙô ngam Mā Tēv nö vë-ekūö Môsös,

¹⁰Vë-ekūö yip kūön Israĕl, ngö ṙô tö cha, Yē yīö havāngngöre lā muh tö Yôtön ip panam Kanā-an,

¹¹Ngaich yī-ö min chööngu tö elpanam yīö, nö elpanam in-nyatlö yīö; hòṅ öp tarik min tö-amāhaiṙen nö kapāha tī tö tarik, ngaich faltöre nö in e.

¹²Ngaich nup elpanam min nö chūök yīö hanyatlöre töp mahavahalvah; hòṅ öp tökapahatī nö öt kapah, hanöng saha ò nö sökhaka nö ikūö yip ṙôngö tarik nö kahòkkaṙen.

¹³Ngaich nup elpanam kahëtö yīö min, nö innyatlö yīö min nö tafūöl.

¹⁴Lūöi nup elpanam kahëtö yīö min lā muh tö Yôtön, ngaich lūöi inrē elpanam tö kētu tö yīö im panam Kanā-an; innyatlö min anū-ö nö elpanam

¹⁵Inlēnten yip kūön Israĕl, tö yip aṅ tahëng inrē mi-iyöng in cha, innyatlö cha min në tö tafūöl elpanam: hòṅ öp tökapahatī tö tarik, nö amāhaiṙen, nö faltöre nö umuh.

¹⁶Yē ò pöri nö aṅtī tö vët nö fëlngen ò, tö lökten ò nö kapah, famëlngö tarik ngaich anga-aṅ: ngaich ngam famëlngö tarik min nö kumpahaivah.

¹⁷Yĕn aṅtī tö ihong anga-aṅ nö fëlngen ò, töp lökten ngam tarik nö kapah, ngaich kapah anga-aṅ, ngaich famëlngö tarik anga-aṅ: kumpahaivah min ngam famëlngö tarik.

¹⁸Hēk inrē yĕn aṅtī tö chōn anga-aṅ nö eltī re töp lökten ngam tarik nö kapah, ngaich kapah anga-aṅ: kumpahaivah min ngam famëlngö tarik.

¹⁹Ngam mahavāhalvah ngam mahām anga-aṅ min kumpāhangvah ngam famëlngö tarik: yē ò nö meuk kūö ò, ngaich kumpāhangvah ò min anga-aṅ;

²⁰Yē ò nö kūö kumnyah elmat re nö kuringngen ò, hēk kulëhan, hēk hayūnan, pòn hōtu nö kapah anga-aṅ;

²¹Hēk yĕn kūö kumnyah elmat re anga-aṅ nö aṅtī tö eltī re nö fëlan ngaich kapah anga-aṅ: ngaich ngam famëlan min nö kumpāhaivah: famëlngö tarik an anga-aṅ, ngaich ngam mahavāhalvah mahām min nö kumpāhangvah ngam famëngö tarik, yē ò nö meuk kūö ò.

²²Yē ò pöri nöng hayahtö tīre nö kuringngen ò nö öt kunyahaṅ elmat, hēk inrē kulëhan tö yô-òv nö öt hayuntö tīre;

²³Hēk inrē nö aṅtī tö ihong, töp lökngen ngam tarik nö kapah, öt meuklöre tö ò, ngaich fuk in ò tī tö e, lökten ò nö kapah, ök kumnyah elmat ò inrē anga-aṅ, öt rēhĕn nö lamukkenre nö hachökan:

²⁴Ngaich min yip ṙôngö tarik nö akah fālen cha töm famël töm mahavāhalvah mahām inrē nö asā në inkāha fālen:

²⁵Ngaich min yip ṙôngö tarik nö ṙānyö ngam famëlngö tarik nö ṙā-ang eltī ngam mahavāhalvah mahām, ngaich më ṙôngö tarik min nö havanten ò nö ip elpanam chūök innyatlö ò, öp chūök ò sin nö afalngöre: ngaich iyöng in e min anga-aṅ hanöng saha kinpāha öp mākūö kūönṙô, öp tö hachāmö kui tö töhet tavī-i.

²⁶Yē ngam famëlngö tarik pöri min nö amahaiṙen nö kiröönngöre nö vāngngö röön tö kūöngö ngam elpanam innyatlö ò ngam chūök ò nö afalngöre;

²⁷Ngaich ngam mahavāhalvah mahām tö kôtökūö tö ò nö lā uk tö kūöngö ngam elpanam chūök innyatlö ò, ngaich ngam mahavāhalvah mahām nö fëlngö ngam famëlngö tarik; ngaich rö-ö anga-aṅ min nö chōichö fālen i kinpāhangvah ò:

²⁸Pòn töng ngöh öre anga-aṅ nö im elpanam chūök innyatlö ò, hanöng saha kinpaha öp mākūö kūönṙô: unôichrit kinpaha öp mākūö kūönṙô ngaich möl ngam famëlngö tarik nö havan nö ip amin ò panam.

²⁹Anū-ö nun në min chöngö inkaha fālen i tumkölchap yīö i nup elyöngö yīö nö ṙòkhöre.

³⁰Öp töng kapahatī tö tarik, fëlī min ngam famëlngö tarik nö i ṙô yip mameuk: ötkô pöri min nöng hĕng tak ṙô öp vamënyö öp tarik nö kapah.

³¹Hēk inrē ötkô anga-aṅ nö kē ṙāi nômö öp famëlngö tarik, öp töfāluṙen nö i kinpāha: kumpahaivah pöri min anga-aṅ.

³²Uh yī-ö min kē ṙāi ò öp ma-afalngöre ip elpanam chūök innyatlö, nö pòn hōtu anga-aṅ nö yih nö hēk nö iyöng ip panam, hanöng saha kinpāha öp kūönṙô.

³³Ngatī yī-ö min ui kumvīöngö ngam panam chūök yīö: pò ngam panam nö kuvīö, tökūö mahām: ngaich öt hĕng töteung tökô nö inlām tökööl nö im panam tökūö ngam mahām tökitaktu nö in e, höng öp mahām ò pöri öp kumtaknyö e.

³⁴Uh yī-ö min inrē hachōichngö ngam panam tö-iyöngö kūö tö yīö, ngam chūök chu iyöng: tön iyöng ellōn vē kūön Israĕl Chin Chū-ö Mā Tēv.