Read Car_Nicobarese KINṘEŪKÖ 36 Bible Online

KINṘEŪKÖ 36 - Car_Nicobarese bible

KINṘEŪKÖ 36

¹Ngaich yik yöngkūö yik yöng nuk patī mupīhö yik kūön Kilīöt, ök kikōnyö kūön Mākīr, ök kikōnyö kūön Manasē, yik mupīhö yik kikōnyö kūön Yôsĕf, nö yihtöre, ngaich ngö ṙô nö i kūö Môsös, i kūö yik mā inrē, yik yöngkūö, yik yöng nuk patī yik kūön Israĕl;

²Ngaich ngö ṙô cha-a, Tölṙô ngam mā chu an ngam Mā Tēv nö kētö ngam panam nö amin yip kūön Israĕl nö lökten i kinlah taneūngen: ngaich ngam mā chu nö tölô tö ngam Mā Tēv nö kētö ngam amin Selōfehat ök hanöngkisānö ih nö i yip kūön ò kikānö.

³Ngaich yē cha nö pīhövö tö yip kikōnyö tahëng miyöngö aṅ in yip kūön Israĕl, ngaich ngam amin cha min nö kē-ĕyö nö ṙā-ang i amin yik yöng ih, ngaich hamūltu min nö i amin öp miyöngö chūök cha min nö mūlhöt: ngaich kē-ĕyö min angū-ö nö ṙā-ang i ngam amin ih.

⁴Ngaich hē öp samyeūheu ṙināḵnyö yik kūön Israĕl nö vintakūö, ngaich min öp amin cha nö hamūltu nö i amin öp miyöngö öp chūök cha min nö mūlhöt: ngaich ngam amin cha min nö kē-ĕyö nö ṙā-ang i amin öp miyöngö yik yöng cha kikōnyö.

⁵Ngaich Môsös nö tölṙô yik kūön Israĕl nö asā ṙô ngam Mā Tēv, nö ngö ṙô, Huveū-eu ṙô an ngam miyöngö yip kikōnyö kūön Yôsĕf.

⁶Ngih ön chöngö ngam Mā Tēv nö i yip kikānö kūön Selōfehat, nö ngö ṙô, Hökngen cha nö pīhövö tö yip töng lōnre; höng i mupīhö öp miyöngö ök yöng cha kikōnyö cha-a min nö pīhövö.

⁷Hòṅ ngam amin vē kūön Israĕl nö öt kē-ĕyö nö ṙā-ang im töhĕng miyöngö: pò vē kūön Israĕl min nö kö haköpngöre nö i amin öp miyöngö yik yöng cha kikōnyö.

⁸Öp kikānö kūön inrē, tö-amīnu nö i töng miyöngö yip kūön Israĕl, nö töpīhövö min tö aṅ i mupīhö öp miyöngö öp yöng ò kikōnyö, hòṅ yip kūön Israĕl tarik nö kö amīnu tö amin yip yöng re kikōnyö.

⁹Hòṅ ngam amin nö öt kē-ĕyö nö ṙā-ang im töhĕng miyöngö nö im tahëng miyöngö; hòṅ yip miyöngö kūön Israĕl nö kö haköpngöre nö ip amin re.

¹⁰Sā tinöölô Môsös tö ngam Mā Tēv, ngaich ngati yik kikānö kūön Selōfehat:

¹¹Pòn pīhövö Mahlah, Tirsah, Hòklah, Milkah, Nō-a inrē, yik kikānö kūön Selōfehat, tö yik kikōnyö hanöngkisānö ök yöng cha kikōnyö:

¹²Pīhövö cha-a nö i mupīhö yik kikōnyö kūön Manasē ök kikōnyö kūön Yôsĕf, ngaich ök amin cha nöng ngöh nö i miyöngö mupīhö ök yöng cha kikōnyö.

¹³Anū-ö nun në chöngö inkāha fālen inrē, hachöngten ngam Mā Tēv nö lökten eltī Môsös nö in yik kūön Israĕl nö el nup töṙā-akūö panam Mô-ap röhta nö i Yôtön i Yerikō.