Read Car_Nicobarese KINṘEŪKÖ 4 Bible Online

KINṘEŪKÖ 4 - Car_Nicobarese bible

KINṘEŪKÖ 4

¹Ngaich ngam Mā Tēv nö vë-ekūö Môsös, Āròn inrē, nö ngö ṙô,

²Kē ṙôken yip kikōnyö kūön Kōhat nö ṙeū-eung in yip kikōnyö kūön Lēvī, i mupīhö cha i mitī-i yöng cha tö kikōnyö,

³Löktö kūö tölūöi anāi samyeūheu ṙēti söl tulöng tölngö tö taneui anāi samyeūheu ṙēti, ṙòkhöre yip kamëhötre nö el kinyūngö, nö la-evṙen tö la-en ngam rūkui manūlö.

⁴Angū-ö ön ngih la-en yik kikōnyö kūön Kōhat nö el ngam rūkui manūlö, nö i minë chehen e tölngö töhet.

⁵Hē ngam elyöngö nö hòṅ kiröönngöre, kuhēthötre min Āròn tö yip kikōnyö kūön ò inrē, ngaich cha-a min nö ṙòngtö öp ranupkui ngam rananglö, ngaich haṙungngö öp kasòng chöngö tö e:

⁶Kahultö kui e min inrē tö uk kapëông, ane inrē haṙĕh tö kui e tö hilā tölingūṅ mat nö ṙòkhöre, ane inrē kuṙōlhöt nup kaneun e.

⁷Ane inrē i kui ngam mīs nup töhet rôtī, haṙĕhtö öp hilā cha-a min tölingūṅ mat, ngaich töönglö nup töchilū pingāṅl ël e, tö nup lanòk, tö nup tökiröng töchilū pingāṅl, tö nup kōp nö insëṙö: ngaich nup tö iṙūhen rôtī nöng töönghak nö ël e:

⁸Ngaich cha-a min nö haṙĕhtö öp laturë hilā nö i kui u, ane inrē kahultö kui u tö uk kapëông ngaich kuṙōlhöt nup kaneun e.

⁹Ngaich cha-a min nö kē hilā tölingūṅ mat, ngaich haṙung ngam chūökrööntö manyaṅk eāṅvö, tö nup eāṅvö u, tö nup tanôp u, tö nup pingāṅl chūök öktit, ṙòkhöre nup chūök tavī-i inrē nup chūök tī cha nö la-evṙen nö in e.

¹⁰Ngaich cha-a min nö chaphöt e nup chūökṙen inrē nö ṙòkhöre nö el öp uk kapëông inṙung, ngaich töönglö e nö i nup kāl.

¹¹Haṙĕhtö hilā cha-a inrē tölingūṅ mat nö i-kui öp humlum tahāklö, ngaich kahul tö kui e tö uk kapëông ngaich hakeunlö e nö i nup kaneun e:

¹²Ngaich cha-a min nö keuheūtlöre tī tö nup chūökṙen mameukṙen, nup chūökṙen nö meukṙen el ngam töhet chūök, ngaich chaphöt u nö el hilā tölingūṅ mat, ngaich haṙūngö u tö uk kapëông, ngaich töönglö u nö el ngam kāl:

¹³Ngaich cha-a min inrē nö kēngö nup tisum nö ṙā-ang im tahāklö, ngaich haṙĕhtö öp tököinyö nganāṅvö mat hilā i kui e:

¹⁴Ngaich i kui e tī cha-a min nö tööngngö nup chūökṙen, nup chūökṙen cha nö meukṙen, kunrālö, kinvòk alaha, sanël tameūyö, pēsön ṙòkhöre nup chūökṙen aṅ im tahāklö; ngaich cha-a min nö haṙĕhtö kui e tö uk kapëông, ngaich kuṙōlhöt kaneun e.

¹⁵Ngaich hē Āròn tö yip kikōnyö kūön ò inrē nö keuheūten nö kahultö kui ngam töhet chūök, tö nup chehen ngam töhet chūök inrē nö ṙòkhöre, pò ngam elyöngö nö ngaich nö hòṅ kiröönngöre; keuheūthëṙen angū-ö yihtöre ngaich yip kūön Kōhat nö keūnö e: hö-ö pöri cha-a nö lūölkö nup töhet pòn sōtu nö kapah. Anū-ö nun në chehen el ngam rūkui manūlö kum yip kikōnyö kūön Kōhat.

¹⁶Në tavī-i eāṅvö, tö nup tötahūsa lōpān, tö nup tö iṙūhen nyā-aṅkūö tökētu, tö nup incham tavī-i, inyōmö ngam inrūkui nö keuheūtlöre, tö nup aṅ in e inrē nö ṙòkhöre, ngam töhet chūök, tö nup chehen e inrē hayōm Ēlīsör min öp kūönṙô kikōnyö kūön Āròn.

¹⁷Ngaich ngam Mā Tēv nö vë-ekūö Môsös, Āròn inrē, nö ngö ṙô,

¹⁸Un röökiṙen tö yīö ngam miyöngö mupīhö yip lamökngörit Kōhat, nö ṙā-ang in yip Lēvī:

¹⁹Ngö tī pöri tö cha, hòṅ cha nö aṅ, nö öt kapah, ip hē cha nö haröhtöre nö i nup tölngö töhet: kuhēthötre min Āròn tö yip kikōnyö kūön ò inrē, ngaich halēnö cha nö ṙòkhöre i nup la-en ò i nup kum ò inrē:

²⁰Uh pöri cha-a nö kuhēthötre nö ngëichkö nup töhet chehen pòrô nöng rahëichtaṙen, hòṅ cha nö öt kapah.

²¹Ngaich ngam Mā Tēv nö vë-ekūö Môsös, nö ngö ṙô,

²²Kē ṙôken yip kikōnyö kūön Kĕrsön inrē, i mitī-i yöng cha tö kikōnyö i mupīhö cha;

²³Löktö kūö tö lūöi samyeūheu ṙēti tulöng inrē söl tö taneui anāi samyeūheu ṙēti ṙô më-eṅ kaheūkö cha; ṙòkhöre yip tö mūlhöt nö höng öp la-en, nö la-en tö la-en öp rūkui manūlö;

²⁴Angū-ö ön ngih la-en yip mupīhö aṅ in Kĕrsön, nö la-evṙen, keun nup tö keūnö inrē:

²⁵Keun nup ranangkūö ngam inrūkui min cha-a, tö ngam rūkui manūlö, töp uk e, öp uk kapeông inrē uk e lamātulöng tö e, tö nup ranangkūö inkūp ngam rūkui manūlö;

²⁶Tö nup ranang öp elmilūkö, tö nup ranangkūö inkūp lökhöt ngam elmilūkö; öp mi ip inrūkui nö havīlö öp tahāklö tö nup tökuvaha u, tö nup chehetī i la-en u, ip chūök u nö vītu, in u min anū-ö nö vītu.

²⁷I chöngö Āròn tö yip kikōnyö kūön ò inrē min nö ṙòkhöre yip kikōnyö kūön Kĕrsön nö la-evṙen, i nup tö keūnö tö cha, i nup la-en cha inrē: vīlö yōm nup kum cha min yī-ö aṅ in cha.

²⁸Angū-ö ön ngih la-en yip mupīhö yip kikōnyö kūön Kĕrsön nö el ngam rūkui manūlö: ngaich cha-a min nö elkatòh Itamār öp kikōnyö kūönṙô kūön Āròn.

²⁹Yip kikōnyö pöri kūön Mērārī, kaheūkö cha më-eṅ i mupīhö cha, i mitī-i yöng cha tö kikōnyö;

³⁰Löktö kūö tö lūöi anāi samyeūheu ṙēti söl tö taneui anāi samyeūheu ṙēti ṙô më-eṅ kaheūkö cha, ṙòkhöre yip tömūlhöt nö höng öp la-en, nö la-en tö la-en ngam rūkui manūlö.

³¹Angū-ö ngih chöngö i nup tö keūnö tö cha, sā nup la-en cha nö el rūkui manūlö: nup savaich ngam inrūkui, nup kāl inrē, tö nup machööḵlö, tö nup löp inrē;

³²Nup machööḵlö ngam elmilūkö nö vinngö, tö nup löp u, tö nup tumnôkö, tö nup tökuvaha, ṙòkhöre nup chehetī inrē, nö i nup vahīṙen u: minënyu ṙô yī-ö tö nup chehetī i nup tö keūnö.

³³Angū-ö ön ngih la-en yip kikōnyö kūön Mērārī, sā nup la-en cha, nö el rūkui manūlö nö elkatòh Itamār öp kūönṙô kikōnyö kūön Āròn.

³⁴Ngaich Môsös tö Āròn inrē tö yik mākūö yik tömaṙôngö nö kaheuk yik kikōnyö kūön Kōhat nö i mupīhö cha, i mitī-i yöng cha tö kikōnyö inrē,

³⁵Löktö kūö tö lūöi anāi samyeūheu ṙēti tulöng inrē söl tö taneui anāi samyeūheu ṙēti, ṙòkhöre yip tömūlhöt nö höng öp la-en, nö la-evṙen nö el rūkui manūlö:

³⁶Ngaich cha-a yip tökaheuklöng in cha, i mupīhö cha, nö nët köny sātòng taneui anāi,

³⁷Cha-a yin vē tökaheuklöng i mupīhö yik aṅ in Kōhat, ṙòkhöre yik tö la-evṙen nö el rūkui manūlö, yip kaheuklö Môsös, Āròn inrē nö sā chöngö ngam Mā Tēv nö löktö eltī Môsös.

³⁸Ngaich cha-a yip tö kaheuklöng kikōnyö kūön Kĕrsön i mupīhö cha i mitī-i yöng cha tö kikōnyö inrē,

³⁹Löktökūö tö lūöi anāi samyeūheu ṙēti, ṙòkhöre yip tömūlhöt nö höng öp la-en nö la-evṙen nö el öp rūkui manūlö.

⁴⁰Cha-a yik tö kaheuklöng aṅ in cha, i mupīhö cha i mitī-i yöng cha tö kikōnyö, nö nët köny tafūölòng lūöi anāi.

⁴¹Cha-a yin vē tö kaheuklöng aṅ i mupīhö yip kikōnyö kūön Kĕrsön, yip tö la-evṙen nö el rūkui manūlö, yip tö kaheuklöng tö Môsös tö Āròn inrē nö sā chöngö ngam Mā Tēv.

⁴²Cha-a yik tö kaheuklöng aṅ i mupīhö yik kikōnyö kūön Mērāri, i mupīhö cha, i mitī-i yöng cha tö kikōnyö.

⁴³Löktö kūö tö lūöi anāi samyeūheu ṙēti tulöng inrē söl tö taneui anāi samyeūheu ṙēti, yip tömūlhöt nö i la-en nö la-evṙen nö el rūkui manūlö,

⁴⁴Cha-a yip tö kaheuklöng aṅ in cha nö i mupīhö cha, nö lūöi köny nëtòng.

⁴⁵Cha-a yin vē tö kaheuklöng i mupīhö yip kikōnyö kūön Mērārī, yik tö kaheuklöng tö Môsös tö Āròn inrē nö sā chöngö ngam Mā Tēv nö löktö eltī Môsös.

⁴⁶Ṙòkhöre cha-a yip tö kaheuklöng aṅ in Lēvī, yik tö kaheuklöng tö Môsös tö Āròn, tö yik mākūö Israĕl inrē, i mupīhö cha, i mitī-i kikōnyö yöng cha inrē.

⁴⁷Löktökūö tö lūöi anāi ṙēti tulöng inrē söl tö taneui anāi ṙēti, ṙòkhöre yip tömūlhöt nö i la-en, ane inrē i la-en kineūnö el ngam rūkui manūlö,

⁴⁸Cha-a yik tö kaheuklöng aṅ in cha, nö hëvhör köny taneūyòng hevhöre anāi.

⁴⁹Sā chöngö ngam Mā Tēv cha-a nö kaheuk nö löktö eltī Môsös, kö kahĕng tak nö kö i la-en re: kö kahĕng tak i nup kineūnö inrē: ngatī cha-a nö kaheuklen ò, sā chöngö ngam Mā Tēv nö tölṙô Môsös.