Read Car_Nicobarese KINṘEŪKÖ 8 Bible Online

KINṘEŪKÖ 8 - Car_Nicobarese bible

KINṘEŪKÖ 8

¹Ngaich ngam Mā Tēv nö vë-ekūö Môsös, nö ngö ṙô,

²vë-ekūö Āròn, ngö ṙô tö ò, Hē meh tōttökūö nup ëāṅvö, ngaich nup tö sat ëāṅvö min nö yangtakūö nö lā kūö ngam chūökröön tö manyaṅk.

³Ngaich ngatī Āròn; tōttökūö nup ëāṅvö anga-aṅ nö hayang tö kūö u lākūö ngam chūökröön tö manyak, sā tinöölô Môsös tö ngam Mā Tēv.

⁴Angū-ö ön ngih vinī-i ngam chūökröön tö manyak töröömö nö humlum; töp tanöönglö e, tö nup pūl in e inrē nö töhanrôn: sā nuk inchō-otī hameuk tö ngam Mā Tēv nö in Môsös, ngatī tī anga-aṅ nö vī chūökröön tö manyak.

⁵Ngaich vë-ekūö Môsös ngam Mā Tēv, nö ngö ṙô,

⁶Kē yip kūön Lēvī nö ṙā-ang in yip kūön Israĕl ahetlen cha inrē.

⁷Ngö tī pömchö tö cha, öm ahetlen cha: kicheny öp mak inlāmö nö i kui cha, ngaich kuhākö ngam alaha cha nö keuheūtngöre, hökngen cha inrē nö söich nup hiā re, nö ahetlöre.

⁸Ngaich hökngen cha nö kē ṙālö kōiny nuā, töp nyā-aṅ ò tökētu, töfaṙëcha atra kalūöchö tö tavī-i, ngaich më-eṅ inrē kē öp tahëng nòng ṙālö kōiny nuā, tökētu kūö tökööl.

⁹Ngaich më-eṅ min kētö yip kūön Lēvī: i kūö ngam rūkui manūlö: ngaich hamūl yip ṙôngö tarik min më-eṅ aṅ i yip kūön Israĕl:

¹⁰Ngaich më-eṅ min kētö yip kūön Lēvī i kūö ngam Mā Tēv: Ngaich yip kūön Israĕl min nö ṙātö eltīre nö i kui yip kūön Lēvī:

¹¹Ngaich Āròn min nö kētö yip kūön Lēvī nö tökuvāyö tökētu nö ṙënngen yip kūön Israĕl, hòṅ cha nö töla-evṙen tö la-en ngam Mā Tēv.

¹²Ngaich min yip kūön Lēvī nö ṙātö eltīre nö i kui nup kōiny nuā: ngaich hĕng nòng kahëti më-eṅ tökūö tökööl, ngaich ngam tahëng inrē töföngö tökētu, nö im Mā Tēv vanī inlāmö yip kūön Lēvī.

¹³Ngaich më-eṅ min asöklö yip kūön Lēvī i kūö Āròn, i kūö yip kikōnyö kūön ò inrē, ngaich kēten cha nö im Mā Tēv nö tökuvāyö nö tökētu.

¹⁴Ngati tī më-eṅ haköhngen yip kūön Lēvī nö ṙā-ang i yip kūön Israĕl: ngaich min yip kūön Lēvī nö Chū-ö Chu.

¹⁵Ngaich möl min nö unôich yip kūön Lēvī nö kuhēthötre nö la-evṙen tö nup la-en ngam rūkui manūlö: ahetlen cha inrē më-eṅ min, ngaich kēten cha nö tökuvāyö tökētu.

¹⁶Tön keuheūtlöre yin nö kētu nö in Chu nö ṙā-ang i yip kūön Israĕl; nö ṙënngen yip taṙòkhöre lamöpnyökūö chūökkanūönö, yip lanòh nö i yip kūön Israĕl nö ṙòkhöre, ngaich Chin kē-ĕ cha nö Chū-ö.

¹⁷Pòn ṙòkhöre yip lanòh kūön Israĕl nö Chū-ö Chu, hĕnghöre tarik töṙeūla inrē: ik in sakāmö Chu fëlngö yik lanòh nö ṙòkhöre im panam Aikup ngaich ahetlen cha Chū-ö nö Chū-ö.

¹⁸Kē yip kūön Lēvī Chin nö ṙënngen yip lanòh kūön Israĕl nö ṙòkhöre.

¹⁹Ngaich kētö yip kūön Lēvī Chū-ö inlōnti nö in Āròn in yip kikōnyö kūön ò inrē, nö ṙā-ang in yip kūön Israĕl nö la-evṙen tö la-en yip kūön Israĕl nö el rūkui manūlö, ane inrē vī inlām tökööl yip kūön Israĕl: hòṅ öp invah tölëlngökūö tī nö öt in yip kūön Israĕl, yē yip kūön Israĕl nö haröhtöre nö im töhet chūök.

²⁰Ngati ngaich Môsös, Āròn inrē, ṙòkhöre inrē yip ṙôngö kūön Israĕl, tö yip kūön Lēvī: sā nup tinöölô Môsös tö ngam Mā Tēv nö i inlahen yip kūön Lēvī, ngaich ngati tī yik kūön Israĕl tö cha.

²¹Ahetlöre ngaich yik kūön Lēvī nö ṙā-ang i nuk tököölre, ngaich söich nuk hilā re cha-a; ngaich kēten cha Āròn nö i kūö ngam Mā Tēv nö tökuvāyö nö tökētu; ngaich Āròn nö vī inlām tökööl nö ahetlen cha.

²²Ngaich unôichrit e yik kūön Lēvī nö chuh ik la-enre nö i kūö Āròn, i kūö yik kikōnyö kūön ò inrē, nö im rūkui manūlö: sā tinöölô Môsös tö ngam Mā Tēv inlahen yik kūön Lēvī, ngati tī cha-a tö cha.

²³Ngaich ngam Mā Tēv nö vë-ekūö Môsös, nö ngö ṙô,

²⁴Angū-ö ön ngih lamöö i yip kūön Lēvī: löktökūö tönët anāi samyeūheu ṙētī söl tulöng inrē cha-a min nö kuhēthötre nö i la-en ngam rūkui manūlö:

²⁵Löktökūö tö taneui anāi samyeūheu ṙēti inrē cha-a min nö ṙāngenre nö i la-enre, ngaich öt hēk nö la-evṙen;

²⁶Holṙen yip holre pöri nö meukṙen nö el ngam rūkui manūlö, nöng hayōm öt la-evṙen pöri. Ngati tī më-eṅ min tö yip kūön Lēvī i nup inyōmö tö cha.