Read Car_Nicobarese KINṘEŪKÖ 9 Bible Online

KINṘEŪKÖ 9 - Car_Nicobarese bible

KINṘEŪKÖ 9

¹Ngaich ngam Mā Tēv nö vë-ekūö Môsös nö el inchōn i Sināi, ip raneh chingëṅt ngam innët samyeūheu unôichrit cha nö ṙāḵngö ngam panam Aikup, nö ngö ṙô,

²Hökngen yip kūön Israĕl inrē nö haköpken ngam Chinööḵngö ip hē ṙētak e.

³Im finën sīön sakāmö ngòh chingëṅt, tö harap, yī-ö min haköpken e, ip hē ṙētak e: sā nup chöngö in e nö ṙòkhöre, sā nup töngaich chöngö inrē nö ṙòkhöre, ngatī inlahen yī-ö haköpken e.

⁴Ngaich Môsös nö vë-ekūö yik kūön Israĕl, nö haköpkö ngam Chinööḵngö

⁵Im raneh chingëṅt cha-a ngaich nö haköpken ngam Chinööḵngö, im finën sīön sakāmö ngam chingëṅt, töharap, el inchōn Sināi: sā tinöölô Môsös nö ṙòkhöre tö ngam Mā Tēv, ngatī yik kūön Israĕl.

⁶Ngaich rīkre yik tarik umuh yik tökuvīö tökūö alaha tökapah tarik, lökten cha nö öt haköpken ngam Chinööḵngö im sakāmö angū-ö: ngaich yihtöre cha-a, im sakāmö angū-ö, nö i kūö Môsös, i kūö Āròn inrē:

⁷Ngaich ngö ṙô yik tarik tö ò Kuvīö in īhö kūö alaha tökapah tarik: lökten öi ngaich ha-uknyöre, öi öt kētö tökētu im Mā Tēv ip hē ṙētak e, nö in yip kūön Israĕl?

⁸Ngaich ngö ṙô Môsös tö cha, Ngöh yin; hòṅ chu hang chöngö ngam Mā Tēv tö inlahen yīö.

⁹Ngaich ngam Mā Tēv nö vë-ekūö Môsös, nö ngö ṙô,

¹⁰Vë-ekūö yip kūön Israĕl, ngö ṙô, Yĕn Tariku in yīö hēk inrē in yip tumkölchap yīö min tökuvīö tökūö alaha tökapah, hēk inrē marô-òlkūö kinröönngö, sönen anga-aṅ nö haköpkö ngam Chinööḵngö ngam Mā Tēv:

¹¹Im innëtö chingëṅt im finën sīön sakāmö tö harap cha-a min nö haköpkö e; nyā-aṅ e cha-a min nö holkūö tö töt aföhlöng rôtī tö-angūṅövö inrē rōi chōn:

¹²Uh cha-a min nö ṙāngö chööḵṙen e söl im peuheū, un rēhĕn nö likölngö tangëḵ ò: sā nup chöngö ngam Chinööḵngö nö ṙòkhöre cha-a min nö haköpkö e.

¹³Öp tarik pöri töt kuvīö, öt kinröönngu inrē, ngaich rö-ö nö haköpkö ngam Chinööḵngö, anga-aṅ min tarik törökiṙen nö ṙā-ang i yip tarik ò: pòn öt kētö ngam tökētu anga-aṅ nö i ngam Mā Tēv im hē ṙētak e, keun tököölre min ngam tarik anga-aṅ.

¹⁴Yĕn hĕng tak öp aṅ tahëng tarik min nö iyöng in meh, ngaich haköpkö ngam Chinööḵngö ngam Mā Tēv min; ngaich sā ngam chöngö Chinööḵngö ane inrē sā ngam inchöngten e, ngatī inlahen anga-aṅ: höng hēngö chöngö yī-ö min, töp aṅ tahëng, töp töfötnyu inrē nö im panam.

¹⁵Im sakāmö ngam inrūkui nö asöklöng ngaich öp taṙul nö hayattö kui ngam inrūkui, ngam rūkui minkahngö kanô-en: ngaich im harap angū-ö nö i kui ngam inrūkui nö sā mineūkö tameūyö, tölngö peuheū.

¹⁶Ngatī angū-ö nö örheūheu: hanyattö kui e ngam taṙul, ngaich sā mineūkö tameūyö tö hatööm.

¹⁷Ip hē ngam taṙul nö kē-ĕyö nö ṙā-ang i kui ngam rūkui, ngaich unôichrit e yik kūön Israĕl nö kiröönngöre: ip chūök ngam taṙul nö sökngöre, in e yik kūön Israĕl nö iyöngtöre.

¹⁸I chöngö ngam Mā Tēv yik kūön Israĕl nö kiröönngöre, ane inrē i chöngö ngam Mā Tēv nö iyöngtöre: sā rô-òten ngam taṙul nö i kui ngam inrūkui höngngöh cha-a nö iyöng.

¹⁹Yē ngam taṙul nö ṙōl sumkam nö ngöh nö i kui ngam inrūkui, ngaich yik kūön Israĕl nö haköp chöngö ngam Mā Tēv, nö öt kiröönngöre.

²⁰Hēkpī ngam taṙul nöng haroh tum sumkam nö i kui ngam inrūkui; ngaich sā chöngö ngam Mā Tēv cha-a nöng ngöh nö iyöng, sā chöngö ngam Mā Tēv inrē cha-a nö kiröönngöre.

²¹Hēkpī inrē ngam taṙul nö löktökūö harap söl peuheū; ngaich yē ngam taṙul im peuheū nö kē-ĕyö, kiröönngöre cha-a ngaich: hēk inrē yĕn inṙūöhen tö sakāmö tö hatööm inrē, kiröönngöre cha-a hē ngam taṙul nö kē-ĕyö.

²²Yĕn nët sumkam öre, hēk hĕng chumngëṅtö, hēk hĕng samyeūheu, ngam taṙul nö ngöh nö i kui ngam inrūkui, köp nö i kui e, ngaich yik kūön Israĕl nöng ngöh nö iyöng, öt kiröönngöre inrē: yē e pöri nö kē-ĕyö, ngaich kiröönngöre cha-a.

²³I chöngö ngam Mā Tēv cha-a nö iyöng, i chöngö ngam Mā Tēv inrē cha-a nö kiröönngöre: haköp chöngö ngam Mā Tēv cha-a ngam chöngö ngam Mā Tēv lamöktö eltī Môsös.