Read Car_Nicobarese MAIKA 2 Bible Online

MAIKA 2 - Car_Nicobarese bible

MAIKA 2

¹Tötkôlò yip cha-a yip maharunten tötlöök ngaich la-evṙen tö tölöök nö el chamam re! Yē ngam peuheū nö hat, harūnöre cha-a tö e, pò e nö minhôiṅyö kuntī cha.

²Yikngö nup taṙeū cha-a, ngaich kē-ĕ u; nup patī inrē ngaich kēngö u: hakihten tarik cha-a töp patī ò inrē, yip tarik nö uroh töp amin ò inrē.

³Lökten an ngam Mā Tēv nö ngö ṙô: Yĕh meuk, vīten tötlöök chin lā-al ngih mupīhö; ngam ṙeūngö yīö min öt kēngö likeun re, ötrēhĕn yin min öi hakeūṙöre; pò e nö tötlöök nö ṙētak.

⁴Ip sakāmö angū-ö min cha-a nö inchō-ovṙô nö hayëḵngen yīö, ngaich harāmöre min nö ngö ṙô, Hatngö in ngaich öi ötkôlò: haṙī-iyö an ngam minchööḵlö yip tarik chu tö ò: yöng tī ò nö kēngö e nö ṙā-ang in chu! I yip ma-ahôngen chöngö tī anga-aṅ nö michööḵngö nuk taṙeū hī.

⁵Lökten man min öt taṙeū-euvö töp tömikahai kūö tö kinlah taneūngen in yip tömaṙôngö tarik ngam Mā Tēv.

⁶Uh yin ahangnyö e ngö ṙô cha-a töng ha-eh an tö ahangnyu-hö-ö yin min nö ahangnyö në: pò nup minṙēngö min nö töt ṙāköre.

⁷Ō patī Yāköp, ngö ineūka öng min, Ngaich öp Fanöinylö ngam Mā Tēv nö kūönngöre? La-en ò ön në? Röh nup ṙô chu nö löökö tī nö in ò öp töchiplö röön nö kiröönngöre?

⁸Ngaich pöri vē tarik chu nöng vahë hölen nö chōholre nö tökunyaha elmat: ngaich yin ṙòngngö ngam lā uk kinṙum nö ṙā-ang im tökiröng hilā in cha yip chamöö-anga nö öt pinlānguṙen sā yip tarik mahavan nö ṙā-ang i kinyūngö.

⁹Ahōṙiyö yik kikānö yik tarik chu tö yīö nö ṙā-ang el nup tövai patī cha; ṙā-ang in yip ṙālö kūön cha yī-ö urāngen tī kēngö ngam kanôlò chu.

¹⁰Chōholre yin, ngaich kiröönngöre; tön rö-ö ön ngih nö haneūheu yīö: pò öp töhuich öp mahalëlhanga, nö uroh nö pöihangṙen tī nö piyāihanga.

¹¹Yē öp tarik nö lök el kuföt i minyôiy-aṅ, nö ngö ṙô, Ahangkö öp vāin chin min in meh tökalēḵ ka-eūt inrē; ngaich nöng sönen anga-aṅ min nö pròfĕt vē tarik.

¹²Ō Yāköp öthō chin min öt hamūlö yīö ṙòkhöre; hamūl yip chööḵṙen Israel chin min; mūl min tö tī chu sā nup sīṅp i Pôsrah; sā nup pököre nö ellōn öp kiyôp u, pōitô min anū-ö tökūö ṙôngö yip tarik.

¹³Urēhĕkūö cha an nö ngaich ngam ṙamānyö: talungköiny yin nö ngaich nö kū-ö tö kūö inkūp, ngaich löknyö in e nö kunyī-inyre: urēhĕkūö cha ngam rācha cha, ngaich ngam Mā Tēv nö yöngkūö cha.