Read Car_Nicobarese MAIKA 3 Bible Online

MAIKA 3 - Car_Nicobarese bible

MAIKA 3

¹Ngaich ngö ṙô chū-ö, Hangih-töre, vë-ekūö yīö chin, yī-ö yöngṙen Yāköp, ane inrē mahayöng aṅ patī Israel! Röh öi yī-ö töhòṅ akahakūö tö inkaha fālen?

²Yī-ö tösumrīk tö tölöök, töhāngenlōn inrē tö tötlöök; nyamòknyö uk alaha cha nö ṙā-ang in cha, nyamòknyö alaha cha inrē nö ṙā-ang i nup tangëḵ cha;

³Kamā alaha yip tarik chu inrē; līlö nup uk alaha cha inrē cha-a nö ṙā-ang in cha, likölngö nup tangëḵ cha inrē; hôṅ kurökö u cha-a nö pinyënyö, nö sā aṅ tanīöyö, sā öp alaha el öp kaltiròng.

⁴Ngaich cha-a min nö havëkö ngam Mā Tēv, hö-ö pöri min anga-aṅ nö sapṙô cha: hôṅ hanyatngö kūöre an min tö cha ip hē e angū-ö, sā nup tötlöök tī cha i nup vahīṙen cha.

⁵Ngö ṙô an ngam Mā Tēv tö inlahen yip pròfĕt yip mahalōtökūö yip tarik cha; yip tö holkūötö kanap re nö kap ngaich hū-a inrē nö ngö ṙô, Lanāmö; ane inrē öp töt nyamöphöt elvāngre, ngaich halēnöre cha-a nö kiyung nö lā-al ò:

⁶Lökten an min nö hatööm nö in yīö, hòṅ yīö öt maheūṅkuvö sinngūlö an min inrē nö in yīö, hòṅ yīö öt akahakūö töm Tēv; meutti min inrē ngam tavūöi nö i kui yip pròfĕt, ngam sakāmö min inrē nö sah nö i kui cha.

⁷Sirōngkūö min ngaich yip mameuk, kalūöichöre elmat min yip chamöh ngam Tēv; hôṅ ṙòkhöre yip min nö tilup minusre: pòn öt sanāpu ṙô tö aṅ im Tēv.

⁸Kô-en pöri chū-ö tööḵlö tö minhôiṅyö aṅ im töhet Fanöinylö ngam Mā Tēv, inkaha, fālen inrē, kumlēḵ inrē öich vë-enynang Israel inrē tö tökööl ò.

⁹Hangihtöre tö ngih, vë-ekūö yīö chin, yöngkūö patī Yāköp, yī-ö inrē mahayöng patī Israel, yī-ö tösa-òkkūö tö inkaha fālen, mahachōichngö nup töṙong nö ṙòkhöre inrē.

¹⁰Aṅtī tö mahām cha-a nö vīlen Siyôn, aṅtī tö öt lanöökö inrē nö vīlen Yērusalem.

¹¹Yip yöngṙen umuh reushu nö akaha fālen, yip kūönṙô inrē umuh haṙāi inköphöti, yip pròfĕt inrē umuh akah ngam Tēv nö ṙāitö rupīö; sönen cha-a nö hòṅ harônlöre nö im Mā Tēv, nö ngö ṙô, Röh ang ngam Mā Tēv nö el ṙôngö hī? Öt tötlööku min yamih nö in hī.

¹²Lökten an min Siyôn tö pòkūö yīö nö kuköhö ël sā panô-òṅ, ngaich Yērusalem min inrē rôngö ngam patī nö sā nup tömarô-òl chūökö el chūölchōn.