Read Car_Nicobarese MAIKA 4 Bible Online

MAIKA 4 - Car_Nicobarese bible

MAIKA 4

¹Ngaich ngö inlahen pöri min angū-ö i nup lā unôich sakāmö, ngam rôngö patī ngam Mā Tēv min haköpiyö nö el chalòng kui minë rôngö, ngaich hapōilöng min angū-ö nö tulöng tö kui minë rung; ngaich chahīömköti min yip tarik nö in e.

²Ngaich maṙôngö min yip pumnāmö tarik nö kiröönngöre ngaich ngö ṙô, Tā-a ihih yin töi chuh kui ngam rôngö ngam Mā Tēv, im patī ngam Tēv Yāköp inrē; ngaich min anga-aṅ nö haköpten hī tö nup talöökö ò, ngaich ayī-ö min lök el nup kanröönö ò: pò ngam chöngö min nö kunyī-inyre nö löknyö Sīyôn, ngam ṙô ngam Mā Tēv inrē nö löknyö Yērusalem.

³Ngaich anga-aṅ min nö akah fālen nö in yip töpōyen tarik vëken yip tökalēḵ pumnāmö tarik min anga-aṅ yip tömarôvat; ngaich cha-a min nö röm nup fël re nö kunköh tumlat, nup vöi cha inrē nö kinmöp elkui chōn: hö-ö yip min pumnāmö tarik nö hachônglö fël nö lā-al pumnāmö tarik, öt rēhĕn cha-a min nö hēk nö haköp kinyungö.

⁴Kö ūichhakṙen pöri min cha-a nö el katòh vāin re el katòh anychīr re inrē; öt hĕng tak min pumnëken cha: pò e nö ṙô elvāng ngam Mā Tēv yip tömaṙôngö.

⁵Pòṅ ṙòkhöre vē tarik min nö kö lök i minë-eny ngam Mā Tēv min ayī-ö ngam Tēv hī höng örheūheu.

⁶Ip sakamö angū-ö, ṙô ngam Mā Tēv, chū-ö min hamūlan ngam tökaròk, hamūlan chū-ö min inrē ngam tö-ahōṙiyö, anga-aṅ inrē ap töhakihtuṙen tö chu.

⁷Ngaich chū-ö min vīten ò öp tökaròk nö chööḵṙen, anga-aṅ inrē öp tökavalīyö nö maṙôvat nö pumnāmö tarik tökalēḵ: ngaich ngam Mā Tēv min nö hayöng nö i kui cha i kui öp Rôngö Sīyôn hēten tö e höng örheūheu.

⁸Me-eṅ inrē, Ō chūök chamônga i nup pököre, rung öp kikānö kūön Sīyôn, löö in meh ap min nö yih: hôṅ, yih ap min lamā-urĕh pūlngö, öp pūlngö ap kikānö kūön Yērusalem.

⁹Kūöyòh öm töngamuh pōitô peuny? Öt rāchavö hòng in meh, lëlngö ök mahalēnö meh, töp lökten meh salòklöng chanöökö sā kikānö chamööku?

¹⁰Chök man yĕh, halöinyöre inrē öm kayôḵnyö nyīö, Ō me-eṅ kikānö kūön Sīyôn, sā öp kikānö kamyôḵ: pò meh ngaich töngamuh kunyī-inyre ṙāngö ngam elpanam, ngaich iyöng el kahôyö min, ngaich yih min inrē i Pēpilön; in e man min hayöökaṙen; in e an min ngam Mā Tēv nö ṙānyen meh ṙā-ang eltī yip lā-al meh.

¹¹Maṙôngö yip töngamuh pumnāmö tarik hamūlöre nö lā-al meh, yip tö ngö ṙô, Hökngen ò nö hachōichiyö, hökngen në mat hī inrē nö meuk nup lōn hī öi i kui Sīyôn.

¹²Hö-ö pöri cha-a nö akahalōn tö nup lōn ngam Mā Tēv, öt rēhĕn cha-a nö akaha elmat töp inlēnö aṅ in ò; pòn hamūlö cha anga-aṅ nö sā tönyëkö afō nö el chūök pinṙōngö sāiny.

¹³Chōholre yin piṙōngnyö ṙòng sāiny, Ō me-eṅ kikānö kūön Sīyôn: tön vī vët chin min sinrōl meh, vī mās min inrē nö kinsòh kunröön meh: ngaich me-eṅ min panyënyö tī pong tömaṙôngö tarik: ngaich me-eṅ min kētö nup taneūngen im Mā Tēv, nup chehen cha inrē kētu im Mā në panam.