Read Car_Nicobarese MAIKA 5 Bible Online

MAIKA 5 - Car_Nicobarese bible

MAIKA 5

¹Ngaich man hamūlöre sā manūlö kumyung, Ō me-eṅ kikānö kūön yip tömūl kumyung: kayīngö hī an nö lā-al hī; fël ök ma-akah fālen yin min in Israel aṅtī tö tinkung i arëkūö.

²Me-eṅ pöri, Petlihem Efrata, öm tökūöṅnö in yip tököṅnyu i Yūtā, hĕng tak ap min lamöknyö in meh nö yih nö in chu nö mahayöngö Israel; ṙameū-eung i tö misī ap kinröngö ò, nö ṙameū-eung im töt chanūhuvṙen.

³Lökten an min nö ṙāngen cha, hanöng saha ap ṙētak ò ngam kamyôḵ nö kayôḵnyen ò: ngaich möl öp chööḵṙen yip mak alaha ò min nö havan nö in yip kūön Israel.

⁴Söklöre min anga-aṅ, ngaich ha-aṅlö nup pököre i kumlēḵ ngam Mā Tēv, i minā-aṅ ngam minë-eny ngam Mā Tēv ngam Tēv ò: ngaich köp cha-a min nö kiröng söl manā-angkūö ngam tumlat.

⁵Ngaich ngòh min tarik nö lanāmö hī: Hē yip aṅ Asīriā min nö yih nö ing panam hī, ngaich hē ò min inrē nö röönkö ël në patī rācha hī, ngaich ayī-ö min hachohlö lā-al ò tö tösat tak yōm pököre hëvhöre tak inrē yip kūön rācha.

⁶Ngaich cha-a min nö halëlngö ngam panam Asīriā nö aṅtī tö fël, ngam panam Nimrōt inrē i minë lökhöt kūö e: ngaich anga-aṅ min nö ṙānyen hī nö ṙā-ang in yip aṅ Asīriā, yĕn yih min nö ing panam hī, ane inrē hē ò nö rööntö röönre nö lā ël kūöngö panam hī.

⁷Ngaich min yip chööḵṙen Yāköp nö el ṙôngö töpōyen tarik sā tacham ṙameū-eung im Mā Tēv, sā inṙökö kumṙah i kui kiyôp; öp töthamökkö tarik, öt rēhĕn nö hökkö yip kūön tarik.

⁸Ngaich yip chööḵṙen Yāköp min nö in yip pumnāmö tarik nö elṙôngö töpōyen tarik, sā öp lāyön nö in nup töṙeūla el inchōn, sā öp kūön lāyön nö el kiteūm sīṅp: öp ramööntö kui u teūchö u inrē nö pinyënyö, yē ò nö lök umuh, ngaich öt hĕng taka ṙamānyö.

⁹Hachônglö kël re man yēḵ lātulöng tö yip lā-al meh, hökngen yip lā-al meh nö ṙòkhöre nö rökiṙen.

¹⁰Ngaich ngö inlahen min angū-ö ip sakāmö angū-ö, ṙô ngam Mā Tēv tö chu min rökngen nup kōra meh nö ṙā-ang elṙôngö meh, tiṙōlngö nuk inröl meh inrē:

¹¹Ngaich chū-ö min rökngen nup elpanam im panam meh, ane inrē kuringngö nup töngëḵ chūökṙen meh: rökrökngen vinīngen chin min inrē nö ṙā-ang eltī meh; ngaich me-eṅ min öt-ōtren aṅ-in tö chamông alaha:

¹²Öthakôlò nup chehëtī tö milūönö chin min in yīö ngaich hökngen yīö öt chamôngu alaha.

¹³Rökngen nup insātēv meh chin min töka-īpö tö nup machööḵlö ṙā-ang elṙôngö meh ngaich me-eṅ min öt ngöhören salām nup vahīṙen kuntī re.

¹⁴Ngaich chū-ö teuklö öp Asērim nö ṙā-ang elṙôngö meh: piyāingö nup elpanam inrē chū-ö min.

¹⁵Tinī-iv chin min tö invāhalvah i lanīnöre kumlēḵ lanīnöre inrē i kui vē pumnāmö tarik vē töt hamang.