Read Car_Nicobarese MAIKA 6 Bible Online

MAIKA 6 - Car_Nicobarese bible

MAIKA 6

¹Hangihtöre yin töngamuh tö ṙô ngam Mā Tēv: Chōholre, i kūö minë rôngö man lā-al u, hökngen minë rung nö hang ṙô meh.

²Hangihtöre, Ō yī-ö rôngö tö ngam kinlaha aṅ im Mā Tēv, yī-ö inrē tököp chūökrööntö machööḵlö ngam tumlat: pò ngam Mā Tēv nö aṅhaṅv-in tö kinlaha nö lā-al vē tarik re, mileūchô an min inrē nö vë-ekūö Israel.

³Ō yī-ö tarik chu, asuh ap tö ngaich tī chu in meh? Isuh chūök tī öich inrē hachëiken meh? Vë-eny e nö fālen chu.

⁴Tön kēnyen meh chin ngaich ṙā-ang ap panam Aikup, ṙāyen meh inrē ṙā-ang el patī inkövö; urēhĕkūö meh chū-ö inrē tīnten Môsös, Āròn, Miriām inrē.

⁵Ō yī-ö tarik chu, köpölōn tö ngamuh tö inlahen Pēlak ök rācha aṅ Mō-ap nö hatöntöre, tö ṙô Pēlam inrē ök kikōnyö kūön Pī-ōr nö sapṙô ò; köpölōn löktökūö Sītim söl i Kilkāl hòn akahalōn tö nuk tölöök tī ngam Mā Tēv.

⁶Tö lökten chin min yih i kūö ngam Mā Tēv, öich sōntöre inrē i kūö ngam lātulöng Tēv? Yih öich kòh min i kūö ò kumtö töföngö tökētu, kumtö kun nuā töhĕng höiny samyeū ṙēti?

⁷Ṙāmölōn ang min ngam Mā Tēv tö up tököṅnyu kūön sīṅp, hēk tö nup tösöm köiytahël tavī-i? Kētö öp lanòhre öich min tökūö fālen chu, öp ṙòng ngih alaha chu tökūö tökööl ngih nômö chu?

⁸Ō më-eṅ tarik, ngaich an nö hameukhömat meh töp tölöök; ngaich asuh lōn ngam Mā Tēv nö in meh, höng la-en tölöök, tö ngam hanāngenlōn nö miṙēlōn, lök inyāichngö inrē im Tēv meh?

⁹Ngam ṙô ngam Mā Tēv nö hūkö ngam elpanam,öp tarik tö-akaha min inrē nö meuk ngam minë-eny meh: hang ṙô ngam tinkung yin,ngam mahachöngten ò inrē.

¹⁰Ōtre nup töpōiṙāi chehen aṅ im ötlanöökö el patī ngam tötlöök, öp töt tööḵlö inrē nyanūmö öp tösa-òkhuvö?

¹¹Het öich min öich holtö tötlöök kinlah lumngan, holtö sāk inchūḵngen lumngan inrē?

¹²Pò vē tökôlò tarik nö tööḵlö tö chanökhuṙen, yip aṅ e inrē nö ṙô tö miyônyaṅ, elvāng cha nup litāk cha inrē nö michīl ṙô.

¹³Lökten chin inrē chökhutī tö meh öm pōihangṙen nyaṅhavö; vīten meh chin ngaich payāyi kūö nup tökööl meh.

¹⁴Nya-avkūö man min, hö-ö pöri tööḵngen; ngaich ngam töt aṅhavö min in meh nö elṙôngö meh: kē-anga man min, hö-ö pöri öm kūmuṙen öm öt pinlānguṙen ngaich nup kumṙen meh min nö kētu tö chu nö kūö fël.

¹⁵Teūch man min hö-ö pöri hamūl ṙòng; röönnyö ṙòng ôliv man min, hö-ö pöri min hachāmöre tö tavī-i; karānnyö vāin inrē, hö-ö pöri min öm òk vāin.

¹⁶Kūö nup insātēv Omri nö haköpka, nup la-en aṅ patī Āhap inrē, ngaich yī-ö inrē lök i nup inlēnö tö cha: angū-ö chööḵnyö chu piyāingen meh, yip aṅ meh inrē min nö töhīsiyö; ngaich yī-ö min keun miṙē-ĕv yip tarik chu.