Read Car_Nicobarese MAIKA 7 Bible Online

MAIKA 7 - Car_Nicobarese bible

MAIKA 7

¹Ötkôlò chin chū-ö! Pò chu höng sā cha hē cha nö hamūl nupṙòng sikehgö, sā nup angkūr pintu-en kamrān angkūr: öt nyā-av in tö tökupōkhaka; yīkölōn chin töp raneh tököinyṙòng anychīr.

²Lëlngö tölöök tarik nö i kūö ngam tumlat, ngaich öt hĕng tak töchiplö nö in yip tarik: ṙòkhöre cha-a nö hayun finëlngö tarik; kö chöhlöre yip tö hol re nö aṅtī tö inhāṅl.

³Ip tötlöök nup eltī cha nö la-evṙen tö e nö pētngen; havë-a öp kūön rācha, höngöre inrē öp kamhôka tö raneushöre; öp mā tarik inrē, ṙô tö tötlöök anga-aṅ nö ellōn re: ngatī tī cha-a nö holṙen re nö löinyö e.

⁴Öp tölngö tölöök tö cha höng sā öp chōn tö chökhu kaha. Öp tölngö töchiplö tö cha höichngen tö nup kinlōngö töchökhu kaha: yih an ngam sakāmö öp amahten meh, ngam chinöhkö meh; ngaich an min angū-ö nö kinlūöch ngö elkui cha.

⁵Uh yin hayönglenre i holre, ui nyattö i mahachōkūö: haköp kūö minë elvāng re in ò öp töröhta nö in meh töminyôiny-aṅ.

⁶Pò ngam kikōnyö kūön nö öt milēḵṙen tö ngam kikōnyö yöng re, choholre ngam kikānö kūön nö lā-al ngam yöngre kikānö, ngam kankūön inrē nö lā-al ngam kan yöng re; höng aṅ el patī ò yip min tökunyaha elmat tö ò.

⁷Ngëchkökūö ngam Mā Tēv pöri chū-ö min; hökkö ngam Tēv chin min ngam inyööken chu: hangṙô chu an min ngam Tēv chu.

⁸Ō me-eṅ tökunyaha elmat tö chu, uh man ṙāmölōn lā-al chu: chōholre chin min, yē chu fukngö; ngam Mā Tēv min ëāṅvö chu yē chu ūichhak el sinngūlö.

⁹Keun ngam lanīnö ngam Mā Tēv chin min, pò chu ngaich köölö fālen in ò; hanöng saha ò nö vë-elkui chu akah fālen chu inrē: kēnyen chu an min i kūö ëāṅvö, ngaich chū-ö min hatīönkö ngam lanöökö ò.

¹⁰Ngaich meūkö e min ngam tökunyaha elmat tö chu, ngaich öp sinrōngkūö min nö hanyatngen ò; ök tö ngö ṙô tö chu, Isuh ap mā Tēv ap Tēv meh? Hatīöken ò min në mat chu; ngaich an min tö ngamuh nö rööntu kui sā tilin el talöökö.

¹¹Sakāmö hē man katöplö ngam kinlōngö ihong! Ip sakāmö angū-ö min öp kūöngö nö kē-ĕyö.

¹²Ip sakāmö angū-ö cha-a min nö yih nö in meh, ṙāngö Asiriā i nup elpanm Aikup inrē, ṙāngö Aikup inrē söl ngö nö ip Tahël löktökūö im töhĕng mai inrē söl im tahëng mai, löktökūö im töhĕng rôngö söl im tahëng ṙôngö.

¹³Sönngenre min ngam panam nö öt kôlò kūö cha yip mī-iyöng in e, tö kūö ṙòng nuk la-en cha.

¹⁴Ha-aṅlö më tarik re man tö ngam tinkung meh, më amin meh pököre, më tölip nö iyöng, nö el inchōn nö ellōn Kārmel: hökngen u nö nyā-avkūö nö i Pasān, Kilīöt, inrē nö sā hē nuk sakāmö misī:

¹⁵Sā nuk sakāmö yanīhih meh ṙā-ang panam Aikup hameukhömat ò chū-ö min tö nup pinngangkūö.

¹⁶Meuk min yip pumnāmö tarik ngaich sirōngkūö tö nup kumlēḵ cha: tilup kūö elvāng re min cha-a, tö eltī re, öt hang min nup elnang cha.

¹⁷Kurak tumlat min cha-a sā kūö pēch: sā töṙeūla aṅ el tumlat cha-a min nö kichëyöre nö meutlö nö ṙā-ang nup tö öphakkūö chūök re: holtö pinhe-eṅkūö re cha-a min nö yihtöre nö im Mā Tēv ngam Tēv hī, ngaich kūö meh min cha-a inrē nö pa-ekūö.

¹⁸Achīö öp Tēv nö tösā meh, öp ma-aṙē-ĕl tökööl, chamööḵngö tötôchngen fālen yip chööḵṙen yip amin ò? Hö-ö an nö örheūheu nö haköp lanīnö re, pò ò nö tökuchīkölōn nö i miṙēlōn.

¹⁹Havöötökūöre an min nö hēk nö aṙē-ĕlōn tö hī; rööntö kui nup tökööl hī an min nö elröönre: ngaich me-eṅ min inrē kavalngö nup tökööl cha nö lā taṙeū tö mai.

²⁰Ngaich me-eṅ min hameuktö ngam kanô-en re in Yāköp, ngam miṙēlōn meh inrē in Aprahām, ngam kinlēḵngô meh chūökuṙô i yip muvöhngö ih löktökūö i nuk misī sakāmö.