Read Car_Nicobarese NAHOM 3 Bible Online

NAHOM 3 - Car_Nicobarese bible

NAHOM 3

¹Ötkôlò ön ngih famël tarik elpanam, tööḵlö an tö minyôiny-aṅ tö inpamhanga inrē: öt kiröönköre ngam pôḵ e.

²Ngam ṙô öp fanòh, ngam ṙën ṙô kalröön inröl inrē; vanāngö röön kōra inrē, tinsôkö röön inröl inrē;

³Yôklö ngam aṅ uk kōra tarik,pachāla kūö ngam fël inrē, amëla kūö ngam vöi inrē maṙôngö ngaich töfëliyö, fônghak inrē kupah: öt chūöku nö rö-ö alaha kupah; fukngö cha-a nö i kui yip kupah cha:

⁴Tökūö ṙôken yip mī-inyihköre kikānö aṅ in yip tövai mī-inyihköre, yip kikānö mākūö vinī-angen, mī-inyihngö pumnāmö tarik re lökten i tī ò nö inyihköre, inyihkö mupīhö inrē nö lökten i tīre nö vi-angen.

⁵Yĕh meuk, lā-al meh chin, ṙô ngam Mā Tēv yip tömaṙôngö, hameuktö nup kinhôi meh chin min inrē nö i kūö meh; hameukten meh chumlal inrē i vē pumnāmö tarik sumrōngkūö meh inrē ngam pūlngö meh.

⁶Ngaich chū-ö minkavaltö mum sin-òkkūö i kui meh, ngaich vīten meh töchōich, asöklen meh inrē öm ngam mat mameuk.

⁷Ngaich ngö inlahen angū-ö min, tö cha yip mahatīönken meh min nö ṙòkhöre nö falngöre tö meh, nö ngö ṙô, Piyāyö ök Ninēvö nö ngaich: chiāp min mahaṙivhen ò? Ṙeū-eung yih öich min chöh mahaṙamkölōn meh?

⁸Ĕhten öm me-eṅ tö Nô-amòn, ök mī-ikui nuk Tahël, öp töhavīlöng tö nup mak; öp tö ranangkūö tö ngam mai, kinlonglö tö ngam mai inrē?

⁹Kumlēḵ ò Itīōpia tö Aikup inrē, timtöre kūö inrē angū-ö; hamòlṙen meh inrē Put tö Lipyā inrē.

¹⁰Sönngenre anga-aṅ nö halāyi, kiröönngöre ngaich aga-aṅ nö el inkövö; pinyāchö yip kūön ò inrē nö panyeny nö i kui nup talöökö: kalah taneūngen re cha-a inrē tö yip mā tarik ò, ṙòkhöre inrē yip tökiröng tarik ò nö halökö tö sayōk.

¹¹Hiyōi man min inrē, nyatngö man min; chöh töngëḵ chūökö me-eṅ min inrē tökūö ap lā-al meh.

¹²Ṙòkhöre min nup chūök kumyung in meh nöng sā anychīr chōn töṙôngu tö nup raneh tököiny ṙòng anychīr: yē u nö kiyintu, ngaich fuk elvāng nyamā-aṅre anū-ö.

¹³Yĕh meuk, tö yip tarik in meh nöng kikānö; ngaich nup inkūp ngam panam meh nö pōitikūö nö luvë-akkūö nö lökhöt yip lā-al meh: ṙāpngö kūö ngam tameūyö nö ngaich tö nuk kālkūö meh.

¹⁴Tūökgö mak re man hanöng ap kinyīngö, hangëkö nup chūök meh kiyung; kuṙòh chuh el tilin, kirāch ël ap chūök vinī-i tilin, vī ap chūök inrang īt nö ngëḵ.

¹⁵In e min ap tameūyö nö haṙāpngen meh; rökngen meh min ngam fël. Keuheūt an min tö meh sā kūö nup kata-ëm. Vī-ire man pōyen sā kata-ëm, vī-ire man pōyen sā hāyö.

¹⁶Ngaich man ṙūölö ṙôken mī-inyihkö chehen nö lātulöng tö minë taneūsömat ngam halīöngö: yëḵngen tī ngam kata-ëm, ngaich kiteūngöre.

¹⁷Sā nup hāyö an ngam kui meh, yip kamūich inrē in meh sā ṙôken mufākö, nup mī-iyöngtöre nö i kaha kinlōngö meh ip töleuch sakamö, yē ngam tavūöi pöri nö meutlö kīteūgöre ngaich anū-ö, ngaich öt akahakūö ayī-ö tök chūök tit u.

¹⁸Haṙòh yip yōm pököre meh, Ō me-eṅ rācha aṅ Asiriā: heūheure yip tökalēḵ in meh: parāti më tarik meh nö i kui minë rôngö, Ngaich öt hĕng tak mahamūlö cha.

¹⁹Öt minfōvtukūö ngam pinlāngen meh; pōitikūö an ngam nyaha meh. Ṙòkhöre yip hamang ineūkö meh nö fatāk eltī re nö i kui meh. I kui chīö ṙöng öng nö rö-ö ngam ötlanöökö meh nö iṙūöhö-röön nö kirööngöre.