Read Car_Nicobarese HAPAKŪK 1 Bible Online

HAPAKŪK 1 - Car_Nicobarese bible

HAPAKŪK 1

¹Ngam lumngan tömeūkö tök pròfĕt Hapakūk.

²Ō Mā Tēv, i ṙôktören ṙô öich hū-a, ngaich rö-ö me-eṅ hōḵ hang? In meh ṙô chin hūkö chanökhuṙen, ngaich rö-ö me-eṅ hōḵ hayööken?

³Kūöyòh ömeh hameukhömat chu tö ötlanöökö ngaich hōten chu meuk inhôngen? Pòn I kūö chu kinīlö chehen chanökhuṙen inrē: kinlöönö ngaich ap umuh, sīöplö inrē linā-alkūö.

⁴Lökten an ngam chöngö nö hāṅaṅröön, ngam inkaha fālen inrē nöng öt kanô-òṅvö; pò ngam tötlöök; lökten ngam inkaha fālen nö hachōchi röön.

⁵Yĕh meuk yin yī-ö mī-i në pumnāmö tarik, milēḵṙen inrē, kiröngen pinngangkūö inrē: tön la-evṙen chin tö la-en i në sakāmö yīö, öp tö pòrô nö vënyu nö in yīö ngaich rö-ö yī-ö ṙatö ellōn re.

⁶Yĕh meuk, tö chu hachohlö yip aṅ Kāltī, yip tötainy tökurāten inrē nö pumnāmö tarik; yip kumröön nö lök ṙôktāk ngih tumlat, nö kē amin re tö nup elyöngö chūökö nup töt kanahngen cha.

⁷Nganāng alaha yip pinhe-eṅ kūö inrē: löknyö in cha nup inkaha fālen minā-aṅ inrē.

⁸Veut nup inrē kōra cha tö leōpāt, mötlö tanānyö inrē tö am el-inchōn tö harap; pirātngöre yip tarik cha aṅ uk kōra; hôṅ, ṙameū-eung tömarôvat yip tarik cha aṅ uk kōra; kiteū yip sā matēṙö tökurātö kūö nö mīktö nya-aṅkūö re.

⁹Ṙòkhöre yip nö yih nö töhòṅ chökhuṙen; ngë-eṅkūö yip nö kū-ötö lā chuhöt; hamūl töhakövö cha-a inrē sā ṙôken kuyāyö.

¹⁰Hôṅ, mināch an tö yip rācha, ngaich yip kūön rācha inrē nö hayë-e tö ò: ahūöngö töngëḵ an chūök; pò ò nö afônglö tumlat, ngaich kē-ĕ e.

¹¹Ngaich anga-aṅ inrē nö kumröön ngam kuföt, ngaich fālūṙen, kôti inrē nö fāluṙen: anga-aṅ ngam tö im Tēv re kumlēḵ.

¹²Röh öm me-eṅ ṙameū-eung im töt chanūhvṙen, Ō Mā Tēv, Tēv chu, me-eṅ Töhet öm in chu? Hö-ö in min kapah. Ō Mā Tēv, hachöngten meh an nö inkaha fālen; me-eṅ inrē, Ō ihong, vamīten ò nö chanökṙen.

¹³Me-eṅ tö mötlö hanëtö elmat öm tötkô meuk tötlöök, töt kô inrē öm meuk inhôngen, kūöyòh öm hatīönken cha yip mahachīlngö vah tī re, ngaich öm höng öt ṙô-òv hē ngam tötlöök nö ngeūṅktö ngam tarik tö mötlö lanöökö tö ò?

¹⁴Ngaich öm vīten tarik nö sā kāḵ el mai, sā töṙeūla chehen, nup töt mahayönguvö?

¹⁵Keuheūtlöre tī an nö ngaich tö cha nö nyaha tö vòk, kē-ĕ cha an nö el inhāṅlre, hamūlö cha inrē nö ël tötūökö inhāṅl: lökten an nö haṙamlōn re nö ṙāmölōn.

¹⁶Lökten an nö hakāḵ ngam inhāṅlre, föng tötahūsa inrē nö im tö tūökö inhāṅl re; pòn lökten in u nö pōyen minchööḵö, pōyen kāḵ inrē.

¹⁷Lökten an min nö chapngö aṅ inhāṅl re, ngaich inrē nö öt aṙē-ĕl tī re nö fëlngö vē pumnāmö tarik nöng iṙūöhö tī?