Read Car_Nicobarese HAPAKŪK 2 Bible Online

HAPAKŪK 2 - Car_Nicobarese bible

HAPAKŪK 2

¹Sökhak chin min öich aṅhaṅti, i kui öp chūök chamônga chin ūichhaka inrē, môknyökūöre chū-ö min öich ngëichkö öp ṙô ò min nö vë-ekūö chu, öp ṙô chu min inrē sapṙô ngam miṙivlōn re.

²Ngaich sapṙô chu ngam Mā Tēv, nö ngö ṙô, Kūich ngam tömeūkö, vī-i e nö löökö mineūkö, vī-i e nö löökö mineūkö nö el tömitāk, hòṅ öp famal nö vë-ekūö e.

³Pò ngam tömeūkö nö mī-ip ṙētak re, veūtö röön an inrē nö kū-ötö öp manāngen, öthō inrē nö minyôiny-aṅ: pòrô anū-ö nö öl, hökken e; tön öthō an min nö öt yih öt ahāṅkenre an min.

⁴Yĕh meuk, hakeūlenre öp ellōn ò hö-ö ap nö chiplö nö in ò: aṅ pöri min yip tölöök nö lökten i kanô-en re.

⁵Hôṅ, hēk inrē ngam vāin nö mahachīlngövah pôḵre, mahakeūlenre nö tarik,tötköp inrē nö i patī re; ṙamūönyö ṙôktö lōn re sā anūlö kupah, sā kinpaha an inrē, nö töng öt hantööḵngenṙen, in re tī pöri nö hamūl pumnāmö tarik nö ṙòkhöre, afônglö yip tarik inrē nö in re.

⁶Hö-ö aich min vē nö kēḵ inchō-oṙô re tö inlahen ò, öp inhūöngö inrē inchō-oṙô tö inlahen ò, nö ngö ṙô, Tötkôlò an yēḵ ngam ṙamūhöl kui re tö töt inlīnen re i ṙôktöre? Anga-aṅ inrē mahakeunlöre? Anga-aṅ inrē mahakeunlöre tö kinlēḵngô!

⁷Hö-ö yip min nöng lūk nö chōholre yip kamāpö meh, aṅhen inrē min yip mahakihten meh, ngaich me-eṅ min inrē tökīlö tö cha?

⁸Pò meh ngaich pōyen hayëḵngen tö pumnāmö tarik, ṙòkhöre yip min chööḵṙen pumnāmö tarik nöhayëḵngen meh; kūö mahām tarik, kūö chanökhuṙen tī tö panam, tö elpanam tö yip mī-iyöng ël e inrē.

⁹Tötkôlò an yēḵ ngam töteūngen nö löklen i michīl nö hakôlò patī re, pò ò nö hòṅ lātulöng tī tö ngam chūök re, pò ò nö öt hòṅ lökngöre tö tī ngam tötlöök!

¹⁰Ngaich man i sinrōngkūö hatöntöre im patī meh, i rinökngen tömaṙôngö tarik, ngaich köölö fālen im nômö re.

¹¹Pò ngam ihong min nö löknyö kaha ngam kinlōngö ṙô nö hū-a, ngaich ngam mikeūnö min nö löknyö im savach ṙô nö sapṙô e.

¹²Tötkôlò an yēḵ ngam vamīlö elpanam nö aṅtī tö mahām, ngaich köpötī tö ngam elpanam nö lökten i öt lanöökö!

¹³Yĕh meuk, röh öng nö aṅ im Mā Tēv yip tömaṙôngö töp lökten vē tarik nö la-evṙen tö inmeui tameūyö, ngaich vē pumnāmö tarik inrē nö hacheīköre nö i chanök alaha?

¹⁴Pò ngih tumlat min nö tööḵlö tö inkaha kanôlò ngam Mā Tēv, sā minë mak nö lökngöre tī tö ngam mai.

¹⁵Tökôlò an yēḵ ngam ma-asënyö òk hol re, ngaich katēhĕ e tö kinpahangvah, mihiyōyan inrē, pò meh hōtu mat meūkö cha nö chumlal?

¹⁶Tööḵngen man ngaich tö ngam ineū-eu meh nö sumrōngkūö: ka-eūt man yĕh me-eṅ inrē, ngaich hameuknyö ngam tunnyinyngöre: havāngtu an min ngam kōp ngam Mā Tēv lā hāmö ò nö in meh ngaich öp ineū-eūṅ meh min nö aṅhavkui tö ngam töchōich sumrōngkūö!

¹⁷Kūö ngam chanökhuṙen tī meh tö Lëpanön nö kahultö kui meh min; ngam inlëlngö nuk töṙeūla inrē, ngam lökngen u nö pa-ekūö kūö mahām tarik, chanökhuṙen tī inrē tö ngam panam, tö elpanam tö yip mī-iyöng ël e inrē nö ṙòkhöre.

¹⁸Asuāp kanôlò tī töka-īpö insātēv, tö lökten öp vamī nö ka-īpö e; ngam töhaṙöichö insātēv, tö ngam töminyôiny-aṅ mahaköphöti? Ngam chūök ngam vamī-i ò nö hayönglen re, nö vī nup töt ṙô-òvö insātēv?

¹⁹Tökôlò an yēḵ ngam tö ngö ṙô tö ngam chōn, Aṅhen man; tö ngam ihong tötkô nö ṙô-òv, Chōholre man! Haköphöti öng angū-ö min? Yĕh meuk, lūöpö alaha an tö humlum rupīö inrē, ngaich rö-ö nö rēhĕn nö unhômu nö ellōn e.

²⁰El ngam töhet chūök pöri ngam Mā Tēv; ṙòkhöre an yēḵ ngam tumlat nö unṙô-òvö nö i kūö ò.