Read Car_Nicobarese SEFAINIĀ 1 Bible Online

SEFAINIĀ 1 - Car_Nicobarese bible

SEFAINIĀ 1

¹Ngam ṙô ngam Mā Tēv ngam yamih nö in Sefaniā ök kikōnyö kūön Kusī, ök kikōnyö kūön Kētalia, ök kikōnyö kūön Amariā, ök kikōnyö kūön Hēsikiā, hē nuk sakāmö Yôsīyā ök kikōnyö kūön Amön, rācha aṅ Yūtā.

²Keuheūtngö taṙòkhöre chin min chehen ṙā-ang i kūö ngih tumlat öich mīkhöti, ṙô ngam Mā Tēv.

³Mīktö tarik chin min töṙeūla inrē; mīktö në chehenchōn ngam halīöngö chin min, tö nup kāḵ el mai, tö nup lökngen kinvē-ĕre i tötlöök; rökngen tarik chin min inrē, ṙā-ang i kūö ngam tumlat, ṙô ngam Mā Tēv.

⁴Hateutnyö këlre chin min inrē i kui Yūtā, I kui yip aṅ Yērusalem inrē nö ṙòkhöre; rökngen öp chööḵṙen Pē-al chin min inrē nö ṙā-ang i ngih chūökö,öp minë-eny Kīmarim nö anòngngen yip kūönṙô.

⁵Cha-a inrē yip samlām nup aṅ el taṙul nö i kui patī; cha-a inrē yip samlām, yip töchūökuṙô nö i ngam Mā Tēv chūökuṙô inrē nö in Milkòm;

⁶Cha-a inrē yip mahavöötö uk re nö ṙā-ang i tinömörit ngam Mā Tēv; cha-a inrē yip töt chamöh ngam Mā Tēv, öt rĕhĕn nö hatönken ò.

⁷Um ṙô-òvö i kūö ngam Mā Tēv: tön röhta an ngam sakāmö ngam Mā Tēv: pò ngam Mā Tēv nö halēnlö tökētu, ngaich an nö ahetlö yip havëköre.

⁸Ngaich ngö inlahen min angū-ö ip sakāmö ngam tökētu tö ngam Mā Tēv, tö chu min chöhkö yip kūön rācha, yip kikōnyö inrē kūön rācha, ṙòkhöre inrē cha-a yip mahayūtöre tö inyut aṅ tahëng panam.

⁹Ip sakāmö angū-ö min chū-ö chöhken cha nö ṙòkhöre yip tumsôköre nö elmilūkö chūök pinṙōngö sāiny yip mahatööḵlö patī yip yöng re tö chanökhuṙen inchīlö inrē.

¹⁰Ip sakāmö inrē angū-ö, ṙô ngam Mā Tēv, öp ṙënṙô min umuh hinū-a nö löknyökūö ngam Inkūp Kāḵ, inyôṙö ṙô inrē löknyö im Innëtö Chūök, ane inrē tökiröng ṙô linrāvö ṙeū-eung i kui minë rung.

¹¹Ayôṙa yin yī-ö aṅ Mōrtar pòn ṙòkhöre yip tarik aṅ Kanā-an nö ngaichngen: ṙòkhöre cha-a yip tö kumtö rupīö nö rökiṙen.

¹²Ngaich ngö inlahen angū-ö min ip hē-e, tö chu min öich kiluhu Yērusalem öich ëāṅvö tö manyak; ngaich chū-ö min chöhken yip tarik yip töfônghaka nö kintūörit, yip tö ngö ṙô ellōn re, Öthō an ngam Mā Tēv nö lööktö tī, öt rēhĕn nö hōḵ nö ötlöökö tī.

¹³Ngaich nup kanôlò cha min nöng tökīlö, öt aṅhaṅv nup patī cha inrē: hôṅ, mānlö patī yip min, öt iyöng ël u pöri min; teūichtö vāin yip min, hö-ö pöri min nö òk vāin nö in u.

¹⁴Röhta an ngam tökiröng sakāmö ngam Tēv, röhta an veūtö yanīhih inrē, ngam ṙënṙô ngam sakāmö ngam Mā Tēv,kalē-ĕṙô ap tökalēḵ tarik nö hū-a nö umuh.

¹⁵Sakāmö laninö ap sakāmö angū-ö, sakāmö kanihngen, chanökö inrē, sakāmö minëchhanga inhatngö inrē, sakāmö singūlö anū-unglōn inrē, sakāmö taṙul tökufëi sinngūlö inrē.

¹⁶Sakāmö römpet inhangkö kanihngen inrē, i minë tökalonglöng elpanam i minë tömarô-òl kui chūök chamônga inrē.

¹⁷Kētö chanökö chin min i kui tarik, hòṅ cha nö sā röön tötmeuk tarik nö kiröönngöre, pò cha nö köölö fālen nö im Mā Tēv; ngaich nup mahām cha min nö vōknyu sā pitung, nup alaha cha inrē sā isôḵ.

¹⁸Öt rēhĕn rupīö cha min nö kô nö ṙānyen cha öt rēhĕn humlum cha inrē ip sakāmö lanīnö ngam Mā Tēv: keuheūtngöre vah pöri min ngam panam nö ṙāpngö tökūö tameūyö kumlēḵlōn ò: pò ò min nö keuheūtngen e, hôṅ, veūtö kinheūtngen an, yip mī-iyöng impanam nö ṙòkhöre.