Read Car_Nicobarese SEFAINIĀ 2 Bible Online

SEFAINIĀ 2 - Car_Nicobarese bible

SEFAINIĀ 2

¹Hamūlöre yin hĕngre chūök, hôṅ hamūlöre Ō yī-ö pumnāmö tarik töt maheūṅkkuvö;

²Urēhĕkūö öp chöngö nö kēnyu, urēhĕkūö ök sakāmö nö sā chanūhu uk nëlö, urēhĕkūö ngam tökalēḵ tanānyö ngam Mā Tēv nö yih nö i kui yīö, urĕh tö ngam sakāmö tanānyö ngam Mā Tēv nö yih nö i kui yīö.

³Chöh ngam Mā Tēv yin, ṙòkhöre yī-ö ing tumlat töyāichö ellōn,yī-ö töla-evṙen tö ngam inkaha fālen aṅ in ò; chöh lanöökö, chöh in yāichngö: amahtuṙen yin min nyatngö ip sakāmö tanānyö ngam Mā Tēv.

⁴Pò Kasā min nö ṙā-ayö, öt aṅhavkūö inrē Askēlòn: i ranònglö ngam tavūöi ap min Astòt nö ahōnyuvö, holtö ṙĕhre min inrē Ĕkròn nö teuklöngö.

⁵Tökôlò yip aṅ lākūö mai, yip pumnāmötarik aṅ Chērit! La-al meh an ngam ṙô ngam Mā Tēv, Ō me-eṅ Kanā-an, panam aṅ Filistain, piyāingen meh chin min, tö lökten meh min öt aṅhaṅvkūö.

⁶Ngaich an min ngam lākūö mai nö chūök kiyôp, kiluhu yōmpököre chūök pököre inrē.

⁷Ngaich ngam lākūö mai min nö lumnööṙö yip chööḵ aṅ patī Yūtā; in e cha-a min nö ha-aṅlö nup pököre cha: ṙōlhak min cha-a tö harap nö el nup patī Askēlòn; pò ngam Mā Tēv ngam Tēv cha nö chöhken cha min, ngaich kēten cha nö hēk im inkövö.

⁸Ngaich chin hang ṙô Mô-āp nö sumrōngngökūö, hang ṙô yip kūön Amön inrē nö ötlēkôre, tö nup ṙô cha nö miṙēngö vē tarik, ngaich hapōilöre inrē nö lā-al kūögö panam cha.

⁹Lökten, ngö ṙô ngam Mā Tēv yip tömaṙôgö, Sā chu öich tö-aṅ, ngam Tēv Israel, kô-òngvah ap min Mô-āp nö sā Sôtöm,yip kūön Amön inrē nö sā Kômòra, chūök töchökhu chōn, anūlö sāl inrē tö-urāngen min inrē nö öt aṅhavkūö. Kē inlānen cha yip min chööḵṙen tarik chu, yip chööḵṙen pumnāmö tarik chu inrē min nö amīnu tö cha.

¹⁰Angū-ö min in cha tökūö inkeūlen cha, pò cha nö miṙē-anga ane inrē hapōilöre nö lā-al vē tarik ngam Mā Tēv yip tömaṙôngö.

¹¹Pinhe-eṅkūö an min ngam Mā Tēv nö in cha: pò ò min nö mitākngö nup tēv ngih panam; ngaich tarik min nö salāman, köṙeū-eung i chūök re, ṙòkhöre nup ellōn mai kun panam pumnāmö tarik.

¹²Yī-ö inrē aṅ Itiōpiā, fëli yin min tökūö öp fël chu.

¹³Ngaich anga-aṅ min nö hateutnyö këlre nö lā-al aṅ kapā, piyāyi min inrē Asīriā; vītu min Ninëvē nö öt aṅhaṅvkūö, ngaich nyôngö min sā el tönyalnyi.

¹⁴Ellōn e min nup pököre nö hulalhaka, ṙòkhöre inrē nup töṙeūla chehen pumnāmö tarik: hĕnghöre pëliken pôrkupain inrē min nö iyöng el nup ihong kui machööḵlö e: ṙënuṙô anū-ö min nö tikökṙôre nö i kūö lökhöt kuföt inkūp; nyôngö min el chūök pinṙōngö sāiny: pò ò nö leūchngö uk nup sītör chōn tövītu.

¹⁵Angū-ön ngih töṙāmölōn elpanam töt mahakūökö inlahenre nö iyöng, tö ngö ṙô nö ellōn re, Chū-ö chin, öthōlu chin tö tahëng: sitih öng pökeh nö öt aṅhaṅvkūö, chūök töṙeūla chehen nö ṙōlhaka! Ṙòkhöre yip chamöö-öng min nö sihngen ò ngaich aṅtī tö eltī re nö vë-eny törö-öv.