Read Car_Nicobarese SEFAINIĀ 3 Bible Online

SEFAINIĀ 3 - Car_Nicobarese bible

SEFAINIĀ 3

¹Tötkôlò an yēḵ anga-aṅ ngam ma-ahôhangen mahachōichngöre inrē nö im töhakihtuṙen elpanam!

²Öt hang ngam ṙô an; öt kē minkahtere an; öt hayönglenre an nö im Mā Tēv; öt ṙūötöre an nö röhta nö im Tēv ò.

³Sā ṙô lāyön yik kūön rācha ël e; yip ma-akah fālen in e höng sā am aṅ el inchōn tö harap; öt chöö-övkūö anū-ö nö söllö peuheū.

⁴Hanātö yip pròfĕt ò, tarik inrē mahachīlngövah: hachōichi an ngam töhet chūök tö yip kūönṙô ò, chökhuṙen yip nö ngaich tö ngam chöngö.

⁵Tölöök an ngam Mā Tēv nö ellōn e öthō an nö la-evṙen tö tötlöök; kaheuk peuheū an nö kēnyö ngam inkaha fālen aṅ in ò nö el hanātö, öthō an nö öt teung; öt akahakūö pöri ngam töt chiplen tö sumrōngkūö.

⁶Ngaich tī chin rökngen pumnamö tarik, ngaich nup nö öt aṅhaṅvö chūök chamông in cha; ngaich tī chin piyāingö nup talöökö cha, hòn öt lamökūvö umuh: tiṙōli nuk elpanam cha, lökngen nö öt tarīkuvö umuh, lökngen e nö öt aṅhavkūö.

⁷Ngö ṙô chū-ö ngaich, Kô-en man min pa-ekūö tö chu, hōḵ man min kē minkahtenre; lökten ngam elyöngö ò nö ötrökiṙen, nö sā nup töhalēnlöng nö ngaich tö chu nö in ò: ka-euilö chanòhlö pöri cha-a ngaich hachōichngö nup la-enre.

⁸Lökten yin hökken chu, ṙô ngam Mā Tēv,hanöng saha ngam sakāmö chu chōholre i nup nyā-aṅkūö; pò ngam kumlēḵlōn chu hamūl pumnāmö tarik, hòṅ chu hamūl në pūlngö, öich vōktö kui u tö ngam lanīnöre, në tökiröng tanānyö chu; pòn ṙòkngöre vah min ngih tumlat nö ṙāpngö tökūö tameūyö öp kumnyahlōn chu.

⁹Pò chu min möl havöötö öp töhet ëlô inrē tarik, hòn ṙòkhöre cha-a nö havëkö minë-eny ngam Mā Tēv, nö lök la-en ò nö hĕngòng ellōn.

¹⁰Löktökūö nup tahël lamuh tö Itiōpiā cha-a min nö kumtö nup mileūchen chu havë-a in cha, öp kikānö kūön yip töpirātiyö tö chu, kumtö tökētu min nö in chu.

¹¹Ip sakāmö angū-ö min me-eṅ öt sirōngkūö tökūö nuk la-en meh, nuk lökngen meh köölö fālen lā-in chu; pò chu min möl kēngö yip mahakeūlen minā-aṅre nö ṙā-ang in meh, ngaich me-eṅ min öt ōtren kanësen im töhet rôngö chu.

¹²Ël meh tī pöri chū-ö min ṙātö töhakihtuṙen yāich inrē, ngaich cha-a min nö hayönglenre nö i minë-eny ngam Mā Tēv.

¹³Öt la-evṙen yip min chööḵṙen Israel tö tökööl, öt rēhĕn nö minyôiny-aṅ; öt rēhĕn min nö kôti nö elvāng cha öp litāk minyôiny-aṅ: pò cha min nö nya-aṅvkūö ṙōlngöre inrē, ngaich öt hĕng tak min tö pa-ekūö tī tö cha.

¹⁴Tikökṙôre, Ō Me-eṅ kikānö kūön Sīyôn; hū-a, Ō Israel; ṙāmölōn man yēḵ keuheūtnyö ellōn re inrē ṙāmölōn, Ō Me-eṅ kikānö kūön Yērusalem.

¹⁵Ngaich ön ngam Mā Tēv nö kēngö minë inkaha fālen nö ṙā-ang in meh, ngaich an nö kavalngö ngam lā-al meh: ngam rācha aṅ Israel ngam Mā Tēv, ellōn meh ana; ngaich man öt ōtren pinhë-eṅkūö tö tötlöök.

¹⁶Ngö ṙô öp min nö i Yērusalem ip sakāmö angū-ö, Um pa-ekūö: Ō Sīyôn un hökiṙen minë kël meh nöng kilölhaka.

¹⁷Ellōn meh an ngam Mā Tēv ngam Tēv meh, tökalēḵ an mahayööken meh min: ṙāmölōn an min nö in meh, im hanāngenlōnre anga-aṅ min nöng chēvhakṙen, tinkökuvö min anga-aṅ nö I kui meh i ṙanāmölōn re.

¹⁸Hamūlö cha chin min yip töhaṙīvölōn tö ngam manūlö tö-ūnngen nö kē-ĕyö nö ṙā-ang in cha tö chu: yip kameun lumngan ngam sinṙōngkūö.

¹⁹Yĕh meuk, hē e chin min lök alaha cha yip mahakihten meh: ngaich chū-ö min hayööken ò öp tökaròk, hamūlan inrē öp tö-ahōṙiyö; ngaich vīten cha chū-ö min nö ineū-euṅ minë-eny inrē, yip mī-ing tumlat nö ngaich tösirōngkūö.

²⁰Hē e chū-ö min kēhĕtnen meh, ip hē e inrē min chū-ö hamūlö meh: pò chu min vīlö minë-eny meh ineū-euṅ meh inrē in vē tarik aṅ kūö ngih tumlat, hē chu min hēk kētö ngam inkövö meh nö i kūö minë mat meh, ṙô ngam Mā Tēv.