Read Car_Nicobarese HAKAI 1 Bible Online

HAKAI 1 - Car_Nicobarese bible

HAKAI 1

¹Im innët samyeūheu ök rācha Tērīös,im tinfūöl chumngëṅtö, im raneh sakāmö ngam chingëṅt, ngam ṙô ngam Mā Tēv nö yih lökten ik pròfĕt Hakai nö in Sērupāpĕl ök kikōyö kūön Sī-altī-ĕl, mahayöng nö i Yūtā, löö in Yôsuā inrē ök kikōnyö kūön Yēhōsatak, ök mākūö kūöṙô, nö ngö ṙô,

²Ṙô-òvö an ngam Mā Tēv yip tömṙôngö, nö ngö ṙô,Ngö ṙô yin vē tarik öt hē hī ön ngih yih, ngam hē ngam patī ngam Mā Tēv nö mānlöngö.

³Ngaich yih ngam ṙô ngam Mā Tēv nö lökten ök pròfĕt Hakai, nö ngö ṙô,

⁴Hē yīö öng ngih iyöng el kun urôhò nup patī yīö, ngaich ngih patī ngih nö hulalhaka nö payāya?

⁵Yĕh lökten ngam Mā Tēv yip tömaṙôngö nö ngö ṙô: Ngëichkö minë talöököre yin.

⁶Pōihata yin teūich, kūöṅnen kumṙen pöri; nyā-aṅvkūö yin, hö-ö pöri öi kô-òrkūö; òk yin, hö-ö pöri öi tööḵngen tö òk; kahūmöre yin, hö-ö pöri ṙāich; ngaich anga-aṅ ngam mahayih raneushöre hayih reneushöre anga-aṅ nö chaplöng nö el inyul öp tömëngö rit.

⁷Ngö ṙô an ngam Mā Tēv yip tömaṙôngö: Ngëichkö minë talöököre yin.

⁸Peūlöre i kui ngam rôngö, kē-ĕre chōn inrē, ngaich mānlö ngam patī; ngaich chū-ö min kuchīkölōn in e, ineūö-euṅvö min chū-ö inrē, ṙô ngam Mā Tēv.

⁹Hòṅ meuk töpōyen yin, ngaich yĕh meuk, yih angū-ö nöng kūöṅnen; ngaich hē yīö kumtö e i patī, ngaich chū-ö fööngö kui e. Kūöyòh? ṙô ngam Mā Tēv yip tömaṙôngö. Kūö ngam patī chu ngam töpayāyi nö hulalhaka, ngaich yī-ö tarik kö falhötre el patī re.

¹⁰Lökten pòkūö yīö an ngam halīöngö nö hangöhngö tacham, ngam tumlat inrē nö hangöhngö ṙòng re.

¹¹Ngaich chū-ö inrē havëtö nyanôngö i kūö ngih panam, i kui në rôngö inrē, i kui sāiny, I kui vāin, i kui tavī-i, i kui nup samīöp inrē nö löklö el tumlat, i kui tarik, i kui nuā, i kui nup la-en kuntī tarik nö ṙòkhöre inrē.

¹²Ngaich Sērupāpĕl ök kikōnyö kūön Sī-altī-ĕl, Yôsuā inrē ök kikōnyö kūön Yēhōsatak, ök mākūö kūöṙô, holtö yik chööḵṙen yik tarik nö ṙòkhöre, nö hangṙô ngam Mā Tēv ngam Tēv cha, nuk ṙô ök pròfĕt inrē Hakai, sā nuk tö söömtu tö ngam Mā Tēv ngam Tēv cha nö in ò; ngaich yik tarik nö i kūö ngam Mā Tēv nö pa-ekūö.

¹³Ṙô-òvö ngaich Hakai ök kūönṙô ngam Mā Tēv töp inhānga aṅ im Mā Tēv nö in yik tarik, nö ngö ṙô, Holtöṙah yīö chin, ṙô ngam Mā Tēv.

¹⁴Ngaich ngam Mā Tēv nö haruhlö ellōn Sērupāpĕl ök kikikōnyö kūön Sī-alti-ĕl mahayöng i Yūtā, haruhlö ellōn Yôsuā inrē ök kikōnyö kūön Yēhōsatak, ök mākūö kūönṙô, haruhlö ellōn yik chööḵṙen yik tarik inrē nö ṙòkhöre; ngaich cha-a nö yih ngaich la-evṙen nö im patī ngam Mā Tēv yip tömaṙôngö, ngam Tēv cha,

¹⁵Im tönët anāi fën sakāmö ngam chingëṅt, im tinfūöl chumngëṅtö, im innët samyeūheu ök rācha Tērīös.