Read Car_Nicobarese HAKAI 2 Bible Online

HAKAI 2 - Car_Nicobarese bible

HAKAI 2

¹Im sinātö chingëṅt, im tönët anāi kahuk sakāmö ngam chingëṅt, ngam ṙô ngam Mā Tēv nö yih nö lökten ik pròfĕt Hakai, nö ngö ṙô,

²Vë-ekūö Sērūpāpĕl töngamuh öp kikōnyö kūön Sialti-ĕl, mahayöng i Yūtā, in Yôsuā inrē ök kikōnyö kūön Yēhōsatak, ök mākūö kūönṙô, in yip chööḵṙen yip tarik inrē, ngö ṙô,

³Achiāp in yīö tö-ōtren öp mameuk ngih patī ik urĕh lanöökö e? Sitih mat öi meūkö e töngamuh? Röh öng nö I mat yīö nö sā töng rö-ö?

⁴Sön pöri yĕh töngamuh hangëṅ-eṅre, Ō Sērupāpĕl, ṙô ngam Mā Tēv; hangë-eṅre inrē, Ō Yôsūa, kikōnyö kūön Yēhōsatak, ök mākūö kūönṙô; hangë-eṅnre in re, ṙòkhöre yī-ö tarik ngam panam, ṙô ngam Mā Tēv, la-evṙen inrē: tön holtöṙah yīö chin, ṙô ngam Mā Tēv, yip tömaṙôngö,

⁵Köpölōn tö ngam ṙô ngam kinlēḵngô chu in yīö hē yīö ṙā-ang Aikup, ngam fanöinylö chu inrē nö köpngö nö in yīö: uh yin pa-ekūö.

⁶Tön ngö ṙô an ngam Mā Tēv yip tömaṙôngö: Hĕngtöreheuh, rahëchtören an, ngaich chū-ö min kiyin minë halīöngö, tumlat inrē, mai el tanyô inrē;

⁷Ngaich chū-ö min kiyin yip pumnāmö tarik nö ṙòkhöre, ngaich mīnö nup lōn vē pumnāmö tarik nö ṙòkhöre nö yih, ngaich chū-ö min hatööḵlö ngih patī tö kanôlò, ṙô ngam Mā Tēv yip tömaṙôngö.

⁸Rupīö chu ana, humlum chu inrē, ṙô ngam Mā Tēv yip tömaṙôngö.

⁹Öp mu-unôich lanöökö ngih patī min nö mötlö tök mu-urĕh, ṙô ngam Mā Tēv yip tömaṙôngö: kētö lanāmö chin inrē i ngih chūökö, ṙô ngam Mā Tēv yip tömaṙôngö.

¹⁰Im tönët anāi fën sakāmö ngam minchūötöre chingëṅt,im innët samyeūheu Tērīös,ngam ṙô ngam Mā Tēv nö yih lökten ik pròfet Hakai, nö ngö rô,

¹¹Ngö ṙô an ngam Mā Tēv yip tömaṙôngö: Hatön yip kūönṙô tö inlahen ngih chöngö, ngö ṙô,

¹²Yĕn hĕng tak tö-aṅhavmat kinhôi tö töhet alaha nö ip hilā ò, ngaich aṅtī tö ngam kinhôire anga-aṅ nö lūölkö ngam rôti, hēk lūölkö el tanīöyö töhòk nya-aṅkūö, hēk vāin, hēk tavī-i, hēk alaha tökā-a, vītöre öng min nö het? Ngaich ngö ṙô yik kūönṙô nö sapṙô, Hö-ö.

¹³Ngaich ngö ṙô Hakai, Yĕn hĕng tak öp tökuvīö tökūö alaha kupah nö lūöltöre nö I në, kūvīö öng min angū-ö? Ngaich ngö yik kūönṙô nö sapṙô, Kuvīö an min angū-ö.

¹⁴Ngaich ngö ṙô ang Hakai nö sapṙô, Ngatī yin vē tarik, ngatī inrē ngih pumnāmö tarik i kūö chu, ṙô ngam Mā Tēv; kö ngatī-i inrē nup la-en kuntī cha; kūvīö inrē nup tökētu tö cha.

¹⁵Yĕh pöchö, vë-ekūö yīö chin, ngëicha yin löktökūö ngih sakāmö söl môkö inrē. Urēhĕkūö öp ihong nö ṙātu nö i kui öp töhĕng ihong ngam töhet chūök ngam Tēv: sitih tī öi hē e?

¹⁶Löktökūö i nup hē angū-ö, hē ök töhĕng tak nö yihtöre nö ik töfônghaka tönët anāi kinlaha ṙôken höng sömtit pöri nuk umuh; hē öp töhĕng tak nö yihtöre nö ik tökôlò vāin nö kē nuk tö taneui anāi neū-euṅ, ngaich höng nët tit anāi pöri nuk umuh.

¹⁷Hachökö yīö chin aṅtī tö nganehngö pëpchööḵ inrē holtö tökënngöre kumṙah inrē i nup taṙòkhöre la-en minë kuntī yīö, sönngenre yī-ö öt havöötökūöre in chu, ṙô ngam Mā Tēv,

¹⁸Ngëicha yin, vë-ekūö yīö chin, löktökūö ngih sakāmö söl môkö inrē löktökūö im tö nët anāi fën sakāmö ngam minchūötöre chingëṅt. Hēten tö ök sakāmö ngam chūök rööntö machööḵlö ngam töhet patī ngam Mā Tēv nö ṙātu, ngëichken e.

¹⁹Ṙòngmö el sök ap kulöl? Hôṅ, töp vāin töm anychīr chōn inrē,töp anār,töm ôliv chōn inrē nö öt sīöpnyi ṙòng; löktökūö ngih sakāmö chin min hakôlò yīö.

²⁰Ngaich im innët heuh ngam ṙô nö yih nö in Hakai im tönët anāi fën sakāmö ngam chingëṅt, nö ngö ṙô,

²¹Vë-ekūö Sērupāpĕl, öp mahayöng i Yūtā, ngö ṙô Kiyin në halīöngö chin min töngih tumlat:

²²Ngaich chū-ö min kuringngö kantēra në pūlngö, ngaich chū-ö inrē min piyāingö kumlēḵ nup pūlngö pumnāmö tarik; kuringngö nup inröl chin min inrē, cha-a inrē yip me-ël u; ngaich nup kōra tö yip aṅ uk u inrē min nö fukngö, tö kūö fël; hanöng kisānöre,

²³Ip sakāmö angū-ö, ṙô ngam Mā Tēv yip tömaṙôngö, öich kē-ĕ meh, Ō Sērupāpĕl, tarik chu, kikōnyö kūö Sī-alti-ĕl ṙô ngam Mā Tēv, ngaich chū-ö min vīlen meh sā minkahngö: pò chu chū-ö kamtöllen meh, ṙô ngam Mā Tēv yip tömaṙôgö.