Read Car_Nicobarese SAKARIĀ 10 Bible Online

SAKARIĀ 10 - Car_Nicobarese bible

SAKARIĀ 10

¹Havëkö kumṙah yin in Mā Tēv ip hē öp lā unôich kumṙah im Mā Tēv ngam vamī në hanyālö; ngaich anga-aṅ min nö kē-ĕkūö cha tö tö-aṙöka kumṙah, nö kö i nup i kiyôp el kahôyö.

²Pò nup tēraf nö minyôiy-aṅ ṙô, yip chamòng alaha inrē nö meuk minyôiny-aṅ; mi-nyôiny-aṅ ṙô cha-a inrē nö vë-eny heūvö, chök alaha ṙô nö haṙamlōn: lökten cha nö kiröönngöre nö el talöö-köre nö sā sīṅp, kihten cha-a, pòn öt yōm pökörevö umuh.

³Hūlökūö öp tanānyö chu nö in yip yōmpököre, sācha tī chin min inrē tö nup kōiny pököre: pò ngam Mā Tēv yip tömaṙôngö nö chöhkö nup pököre i patī Yūtā ngaich vīten u min nö sā öp kōra ò tövai i kinyūngö.

⁴Löknyö in ò min öp ihong sinkeukngö, löknyö in ò öp kinsòh, lökyö in ò öp linreny kumyung, löknyö in ò yip mahayöng nö holre.

⁵Ngaich acha-a min nö sā yip tökalēḵ tarik, nö rööntö kui yip lā-al re nö el tilin minë talöökö ip kinyūngö; kiyung min cha-a inrē, pò ngam Tēv nö in cha: yip mī-i-uk kōra inrē min nö kalūöchöre el kui.

⁶Ngaich chū-ö min inrē hangëkö ngam patī Yūtā, hayööken ngam patī Yôsĕf chin min inrē, havanten cha min inrē hēk, pò chu aṙē-ĕlōn tö cha; ngaich cha-a min nö sā töng öt kavāli tö chu: pò chu, chū-ö Mā Tēv, Tēv cha inrē, ngaich hang ṙô cha min chū-ö

⁷Ngaich cha-a yip aṅ in Ifrēm min nö sā öp tökalēḵ tarik, ṙāmö ellōn cha-a min inrē tökūö vāin: Hôṅ, meūkö e yip min kūön cha, ngaich ṙāmölōn; ngaich ṙāmö ellōn cha-a nö im Mā Tēv.

⁸Chū-ö chin min samihlö kui cha, hamūlö cha inrē: pò chu ngaich havaha cha: ngaich cha-a min nö ṙūölöre ṙôken nö sā ṙôken re.

⁹Teūichten cha chū-ö min inrē in yip tarik; ngaich cha-a min nö köpölōn tö chu nö in nup panam tömarôvat: ngaich cha-a min inrē nö holtö yip kūön re nö aṅ, ngaich havan min inrē.

¹⁰Kēnyen cha chin min hēk ṙāngö öp panam Aikup, hamūlö cha inrē ṙā-ang Asīriā; ngaich kēten cha min im panam Kilīöt, Lëpanön inrē; ngaich öt kôtökūö cha-a min tö chūök re.

¹¹Lök el mai kanihngen cha-a min, ngaich foh minë mahūvö ngam mai min, ngaich ṙòkhöre min nup ṙū-uti Nā-il nö nyôlö min: tumṙeūtu min ngaich ngam inkeūlen Asiriā, ngaich ngam tinkung rācha Aikup min nö kiröönngöre.

¹²Ngaich chū-ö min hangëken cha im Mā Tēv; ngaich cha-a min inrē nö kiröönköre nö i minë-eny chu, ṙô ngam Mā Tēv.