Read Car_Nicobarese SAKARIĀ 11 Bible Online

SAKARIĀ 11 - Car_Nicobarese bible

SAKARIĀ 11

¹Ō Lëpanön, löpnyökūö minë inkūp re man, hòṅ ngam tameūyö nö haṙāpngö minë sītör chōn meh.

²Ō yī-ö för chōn, ayôṙa yin, tön funkgö an ngam sītör chōn, pò ngam tövai nö ngaich nö öthakôlöng ṙô. Ayôṙa yin, Ō yi-ö aṅ Pasān ōk, pò ngam tökalēḵ chūök chōn nö taṙöliyö.

³Hāngö ṙô yip yōm pököre nö ayôṙa, pò ngam kanôlò cha ngaich nö hayë-eiṙen! Ṙô-òv öp ṙālö lāyön nö pōitô, pò ngam inkeūlen Yôtön nö öthakôlöng ṙô!

⁴Ngö ṙô An ngam Mā Tēv ngam Tēv chu: Ha-aṅlö minë pököre töṙatnyu likeun;

⁵Ṙatnyö likeun u yip töchehevṙen, ngaich rö-ö cha-a nö töfāluṙen; ngaich ngö ṙô cha-a inrē yip mī-inyihkö u, Tökôlò an yēḵ ngam Mā Tēv, pò chu ngaich kôlò: ngaich rö-ö yip yōmpököre cha nö aṙē-ĕlōn tö u.

⁶Pò chu min öt ngöhören aṙē-ĕlōn tö aṅ ngam panam, ṙô ngam Mā Tēv. Yĕh meuk, kētö tarik chin min nö kö eltī holre, eltī öp rācha ò inrē: ngaich cha-a min nö hachök ngam panam, ngaich hö-ö chū-ö min ṙānyen cha nö ṙā-ang eltī cha.

⁷Ngati tī chin ha-aṅlö nup pököre töṙatnyu likeun, nup tökô-òngrit nö yāichkūö nup pököre. Ngaich chū-ö nët nòng kahë inrē tö tinkung; hĕng nòng kahë inrē tö tinkung; hĕng nòng ök tökaheūkö tö chu nö Tövai, kaheūkö tö chu inrē öp tahëng nö Nyanëk; ngaich ha-aṅlö nup pököre chū-ö.

⁸I töhĕng chumngëṅtö chū-ö rökngen yip tölūöitak yōmpököre; pò chu uhā-alōn in cha, ngaich ap nômö cha inrē nö sa-òkkūö tī tö chu.

⁹Ngö ṙô ngaich chū-ö, Hö-ö chin hòṅ ha-aṅlen meh: öm tökapah, hökngen ò nö kapah; anga-aṅ inrē ngam törökiṙen, hökngen ò nö rökiṙen; ngaich hökngen cha yip tö-ōtre nö kö kā alaha höö.

¹⁰Kē ngam tinkung re chū-ö ngam Tövai, rökngen ò chū-ö ngaich pò chu hòṅ piyāingö ngam kinlēḵngô re ngam vahītö chu nö in yip tarik nö ṙòkhöre.

¹¹Ngaich liköli anga-aṅ ik sakāmö angū-ö: ngaich nuk yāichkūö nuk pököre nup töchumkūöṙen tö chu nö akahalōn tö e nö ṙô ngam Mā Tēv.

¹²Ngaich ngö ṙô chū-ö tö cha, Yĕn tölöök tölōn meh, kētö ṙāi alaha chu; ngaich yĕn rö-ö, hökngen e. Ngaich cha-a nö kalah lumngan ṙëhe alaha chu lūöi anāi tum tāk rupīö.

¹³Ngaich ngö ṙô ngam Mā Tēv tö chu, Kavalngö e ip chūök rupīö, ngam tölöök ṙôken ṙāi ngam ṙāi chu in cha. Ngaich chū-ö kē nuk tölūö anāi tum tāk rupīö, ngaich kahal tö u im chūök rupīö, el patī ngam Mā Tēv.

¹⁴Rökngö ngam tahëng tinkung chū-ö ngaich, Ngam Nyanëk, pò chu hòṅ litòkngen ngam mak alaha ihôi Yūtā tö Israel.

¹⁵Ngaich ngö ṙô ngam Mā Tēv chu, Hēk man kē minë chehetī ap tökulō-ov yōm pököre.

¹⁶Yĕh meuk, tön hachohlö öp yōm pököre chin min hĕng tak im panam, ngam töt chamöhken cha min yip tö rökiṙen, öt rēhĕn min nö chöh yik töpirāti, öt rēhĕn nö lööken tī töp tö laköliyö; öt rēhĕn min anga-aṅ nö ha-aṅlen cha yip tölööken, ngaich pöri min anga-aṅ nö kāḵ alaha öp tösangöö, ngaich inrē min nö panyënyö tī nö chiṙes nup kinsòh kunröön.

¹⁷Tötkôlö ana ngam tötkanôlu- ṙô yōm pököre ngam ṙamā- ngö nuk pököre i takeun kël ò ap min fël, lāhāmö mat ò inrē: keuheūtngöre ap min takeun kël ò nö nyôngö, ngaich ap lāhāmö mat ò min nö keuheūtngöre nö sangūla.