Read Car_Nicobarese SAKARIĀ 12 Bible Online

SAKARIĀ 12 - Car_Nicobarese bible

SAKARIĀ 12

¹Ngam lumngan ngam ṙô ngam Mā Tēv tö inlahen Israel. Ngö ṙô an ngam Mā Tēv, ngam mahanyāknyö minë halīöngö ṙātö chūök rööntö machööḵlö ngam tumlat inrē, vamī ma-alaha tarik nö lā tuhēt nö in ò:

²Yĕh meuk, vīten Yērusalem chin min nö kōp tökahööka nö in yip tarik, nö ṙòkhöre mahavīlen ò, i kui Yūtā inrē min angū-ö ip kinyīngö nö lā-al Yērusalem.

³Ngaich ngö inlahen min angū-ö ip sakāmö angū-ö, öich vīten Yērusalem min nö ihong tölanganhu nö in vē tarik nö ṙòkhöre; ṙòkhöre min yip lumngānöre tö ò nö pōihangṙen min nö nyāhavö; ngaich ṙòkhöre vē pumnāmö tarik ngih tumlat minnö hamūlöre nö lā-al e.

⁴Ip sakāmö angū-ö, ṙô ngam Mā Tēv, Öich hachök nup kōra min aṅtī tö unṙehe, aṅtī tö kintūöyen inrē ip mī-i uk ò: milaklö matre chū-ö min inrē i kui ngam patī Yūtā, ngaich chū-ö min inrē i kui ngam pati Yūtā, ngaich chū-ö min inrē kö hachök nup kōra yip tarik aṅtī tö ötmaneūkö.

⁵Ngaich yip mākūö Yūtā min nö ngö ṙô nö ellōn re, Yip aṅ Yērusalem yip kumlēḵ chu im Mā Tēv yip tömaṙôngö ngam Tēv cha.

⁶Ip sakāmö angū-ö chū-ö min vīten yip mākūö Yūtā nö sā kunrālö i kūö tameūyö nö i nup chōn, sā tanyukngö tameūyö nö in nup afō sāiny; ngaich cha-amin nö keuheūtngöre vahtī tö yip tarik mahavīlen cha lāhāmö lā tavē inrē: Ngaich Yērusalem min nö hēk nö iyöng im chūök re, nö i Yērusalem.

⁷Ngaich ngam Mā Tēv min inrē nö hayööken nup inrūkui Yūtā nö urĕh, hòṅ ngam kanôlò ngam patī Tāvit tö ngam kanôlò yip aṅ Yērusalem inrē nö hapōilö-ngö nö i kui Yūtā.

⁸Ip sakāmö angū-ö min ngam Mā Tēv nö laklö yip aṅ Yērusalem; ngaich anga-aṅ öp tötkalē-en in cha ip sakāmö angū-ö min nö sā Tāvit; ngaich ngam patī Tāvit min inrē nö sā ngam Tēv, sā öp ma-ahānga aṅ im mā Tēv nö i kūö cha.

⁹Ngaich ngö inlahen angū-ö min ip sakāmö angū-ö, öich lukkenre min piyāingö yip pumnāmö tarik nö ṙòkhöre yip yamih nö lā-al Yērusalem.

¹⁰Ngaich chū-ö min ṙöstö kui ngam patī Tāvit, ṙöstö kui yip aṅ Yērusalem inrē tö ngam ma-alaha inkôlò vine-elkui inrē; ngaich cha-a min nö hatīönkö kūö ò öp tösāpi tö cha: ngaich cha-a min nö haṙivhen ò, sā öp töhaṙivlōn töp töng hĕng maneuk kūön re kikōnyö, ngaich min inrē nö kiröngö miṙivlōn tö ò, sā kinröngö miṙivlōn tö lanòhre.

¹¹Ip sakāmö angū-ö min öp yöng miṙivlōn i Yērusalem sā miṙivlōn Hatatrīmòn el öp achāṙö Mekitō.

¹²Haṙivlōn min ngam panam kö köhngen min töhĕng mupīhö tö höö; köhngen min töhĕng mupīhö aṅ patī Tāvit köhgen inrē yip pīhö cha; köhngen inrē öp mupīhö aṅ patī Nāta, köhngen yip pīhö cha inrē;

¹³Köhngen inrē mupīhö aṅ patī Lēvi, köhngen inrē yip pīhö cha; köhngen öp mupīhö Sīmi, köhngen inrē yip pīhö cha;

¹⁴ngaich yip mupīhö tö-ōtren, kö köhngen tö mupīhöre, köhngen inrē yip pīhö cha;