Read Car_Nicobarese SAKARIĀ 13 Bible Online

SAKARIĀ 13 - Car_Nicobarese bible

SAKARIĀ 13

¹Ip sakāmö angū-ö hĕng min öp löklö mak tö löpnyukūö nö i patī Tāvit in yip aṅ Yērusalem inrē, kūö tökööl kūö töthet inrē.

²Ngaich ngö inlahen angū-ö min ip sakāmö angū-ö, ṙô ngam Mā Tēv yip tömaṙôngö tö chu min rökngen nup minënyö insātēv nö ṙā-ang im panam, ngaich öt ngöhören min angū-ö nö fēkaṙen: ngaich chū-ö min inrē vīten yip pròfĕt, tö yip tötlöök sī-ö inrē nö ṙāngö ngam panam.

³Ngaich ngö inlahen min angū-ö, yĕn hĕng tak min tö ōtren vamënyö yanīhih mu-unôich, ngaich ngö ṙô min tö ò ap yöng ò kikōnyö töp yöng ò kikānö inrē ap kamyôḵnyen ò, Hö-ö man aṅ; pò meh höng ṙô tö minyôiny-aṅ i minë-eny ngam Mā Tēv: ngaich min öp yöng ò kikōnyö töp yöng ò kikānö inrē nö kuringngen ò yē ò nö ṙôtö yanīhih mu-unôich.

⁴Ngaich ngö inlahen min angū-ö ip sakāmö angū-ö, tö yip pròfĕt min nö sumrōngikūö tö nup maheuṅkre, yē ò nö ṙôtö yānihih mu-unôich; öt rēhĕn cha-a min nö kahūmöre tö tösanôyu mat kinṙum nö hachīl;

⁵Ngö ṙô pöri aga-aṅ min, Hö-ö chin; pròfĕt, amul tumlat chin; pò chu ngaich vītuṙen töhakövö tarik löktökūö i myinī-öṅ chu.

⁶Ngaich hĕng tak min öp tö ngö ṙô tö ò, Asuh ön në vah meh kūö fanël ihôi minë kël meh? Ngaich ngö ṙô min anga-aṅ nö sapṙô, Nyāha chu nun kūö fanël i patī yip holchu.

⁷Ō fël, chōholre man lāḵlö öp yōm pököre chu, lāḵlö öp tarik inrē öp hol chu, ṙô ngam Mā Tēv yip töma- ṙôngö. Hachök ap yōm pö- köre, ngaich parātiyö min nup sīṅp; ngaich chū-ö min havāngtö këlre i nup kuöṅnö.

⁸Ngaich ngö inlahen agū-ö min, tö nup panam nö ṙòk- höre nö nët tit min nö rökiṙen ngaich kapah, ṙô ngam Mā Tēv; ṙālöng pöri min ngam linūöi mi-ëlö in e.

⁹Ngaich chū-ö min kētö ngam linūöi mi-ëlö nö löknyö kūö tameūyö, ngaich halöök tit u min sā inlöök tit rupīö, ngaich kalahten u min inrē nö sā kinlahten humlum: ngaich cha-a min nö havëkö minënyö chu, ngaich hang ṙô cha chū-ö min: Ngö ṙô chin min, tarik chu yin; ngaich ngö ṙô min cha-a, Tēv chu An ngam Mā Tēv.