Read Car_Nicobarese SAKARIĀ 14 Bible Online

SAKARIĀ 14 - Car_Nicobarese bible

SAKARIĀ 14

¹Yĕh meuk, yih ap sakāmö ngam Mā Tēv, hē öp pôḵ meh min nö michöö-öyö nö ellōn meh.

²Pò chu min hamūl yip pumnāmö tarik nö lā-al Yērusalem nö kiyung; ngaich kē-ĕ min inrē ngam elpanam, nup patī inrē nö kiluhu aṅ, ötlēkaṙen yip kikānö inrē: ròngti inrē min yip aṅ elpanam nö kiröönngöre nö el inkövö, ngaich yip tarik chööḵṙen min nö öt rökiṙen nö ṙāngö ngam elpanam.

³Ngaich ngam Mā Tēv min nö kiröönngöre,nö kiyung nö lāḵlö yip pumnāmö tarik, nö sā re anga-aṅ nö kiyung hē el sakāmö kinyūngö.

⁴Sökhak min nup elröön ò ip sakāmö angū-ö nö i kui nup Rung Ôliv, ap lā kūö Yērusalem nö lā chuhöt, ngaich min öp Rôngö Ôliv nö lökngö ṙat nö larāki nö kū-ötö lā chūhöt kū-ö tö lā sūng inrē, ngaich umuh min öp tökiröng achāṙö; ngaich ròngti min ngam Rôngö kū-ötö lākapā min nö kē-ĕngre, ròngti inrē angū-ö nö kū-ötö lā lòhngö.

⁵Ngaich yī-ö min falngöre lök el achāṙö minë rôngö chu, pò ngam achāṙô minë Rôngö chu min nö sölngö nö i Asel. Hôṅ, falngöre yin min, sā yīö misī falngöre urēhĕkūö ngam kumyeūnö hē nuk sakāmö Usayā rācha aṅ Yūtā: ngaich ngam Mā Tēv min nö yih ngam Tēv chu, ṙòkhöre min inrē yip töhet nö hol meh.

⁶Ngaich ngö inlahen angū-ö min ip sakāmö angū-ö, tö e min nö öt hanātu laneūichö pöri tacham inrē tökënngöre.

⁷Tö hĕng sumkam pöri min angū-ö nö inkahngen ngam Mā Tēv: öt sakāmö, öt hatöömu inrē: yih pöri min angū-ö, tö öp hanātö min ip harap.

⁸Ngaich ngö inlahen angū-ö min ip sakāmö angū-ö tö nup tö-aṅ min mak nö meutnyi ṙā-ang Yērusalem: ròngti tö u tö kū-ötö el öp mai lā chūhöt, ròngti inrē tö u tö kū-ötö ël öp mai lā sūng: hē sikehngö sūng inrē min angū-ö.

⁹Ngaich ngam Mā Tēv min nö rācha nö i kui ngih tumlat nö ṙòkhöre; ip sakāmö min angū-ö ngam Mā Tēv nöng hĕng, hĕng inrē ngam minënyö ò.

¹⁰Ṙòkhöre min ngam panam nö vītöre nö sā Arapā, löktökūö Kīpā, söl Rīmòn lā lòhngö Yērusalem; ngaich anga-aṅ min nö hatāilöngö, iyöng el chūök re min inrē, löktökūö ngam Inkūp Penyamin söl im chūök ngam raneh inkūp, sölngö im Inkūp Sinkeukngö, löktökūö Hananel ngam chūök chamônga söl nup kinrān vāin ap rācha.

¹¹Ngaich tarik min nö iyöng in e, ngaich öt ōtren min nö umuh öp sinôten; öt pinlānguṙen pöri min ngaich Yērusalem nö iyöng in e.

¹²Angū-ö ön min ngih invah tölëlngö kūö aṅtī ngam Mā Tēv nö chökṙen yip tarik kumyung nö lā-al Yērusalem: keuheūtngöre nup min alaha cha nö kā-ayö i saha cha nö ṙòngmö sökhaka röön, keuheūt nup mat cha min inrē nö ël nup chūök re keuheūt inrē min nup litāk cha nö elvāng cha.

¹³Ngaich ngö inlahen min angū-ö ip sakāmö angū-ö, öp yöng tötkô-òtī ṙameū-eung im Mā Tēv min nö in cha; ngaich cha-a min nö kö kētö tīre nö i kël holre, ngaich hachônglö këlre min anga-aṅ nö lā-al tī ngam holre.

¹⁴Kiyung min inrē Yūtā nö lā-al Yērusalem; ngaich nup kanôlò yip tövinngö min pumnāmö tarik nö hamūliyö, humlum, rupīö, hilā, nö kiröngen ṙôken.

¹⁵Ngatī min inrē öp invah tölëlngökūö nö i kōra, i kūön köttö, i ūṅt, i köttö, i nup töṙeūla min inrē el nup elyöngö, ngih invah tölëlngö kūö.

¹⁶Ngaich ngö inlahen angū-ö min, tö cha yip tö-ōtren aṅ i yip pumnāmö tarik yip yamih nö lā-al Yērusalem nö kaheuk samyeūheu cha-a min nö kiröönngöre nö salām ngam Rācha, ngam Mā Tēv yip tömaṙôngö, haköpken ngam tökiröng nyinā-aṅ inrūki inrē.

¹⁷Ngaich min angū-ö, tö yip mupīhö aṅ ngih tumlat töt chamuh Yērusalem nö salām ngam Rācha, ngam Mā Tēv yip tömaṙôngö, öt aṅhav kui min cha-a tö kumṙah.

¹⁸Ngaich yē öp mupīhö aṅ Aikup nö öt kiröönngöre, öt yih inrē; öt rēhĕn angū-ö min nö i kui cha; höng ap invah tölëlngökūö min umuh, aṅtī ngam Mā Tēv min nö hachök yip pumnāmö tarik yip tötkumröönngöre nö haköpkö ngam tökiröng nyinā-aṅ inrūkui.

¹⁹Angū-ö an min sācha yip aṅ Aikup, sācha yip pumnāmö tarik inrē yip töt chamuh im inköpkö tökiröng nyinā-aṅ irūkui.

²⁰Ip sakāmö min angū-ö nö i alaha nup kungkurū kōra,Töhet nö im Mā Tēv: ngaich nup tanīöyö el patī ngam Mā Tēv min nö sā nup töchilū pingāṅl i kūö ngam tahāklö;

²¹Hôṅ, ṙòkhöre nup tanīöyö i Yērusalem i Yūtā inrē min nö töhet im Mā Tēv yip tömaṙôngö: ngaich ṙòkhöre min cha-a yip kamëtö tökētu nö yih nö kē aṅ u, ngaich sum nö ël u: ip sakāmö angū-ö min öt ōtren min yip aṅ Kanā-an nö el patī ngam Mā Tēv yip tömaṙôngö.