Read Car_Nicobarese SAKARIĀ 2 Bible Online

SAKARIĀ 2 - Car_Nicobarese bible

SAKARIĀ 2

¹Ngaich môklökūöre chū-ö, ngaich meuk, yĕhmeuk, hĕng tak ök tarik tö-āṅhaṅv eltī tö tökuvaha kinlah rôtòng.

²Ngaich ngö ṙô chū-ö, Chuh yih ömeh? Ngö ṙô ngaich aga-aṅ tö chu, Kalah ṙôkti Yērusalem chin, öich hòṅ meuk ṙôktāk e, rôta e inrē.

³Yĕh meuk, kiröönngöre ngaich ök ma-ahānga ök vamë-eṅkūö chu, ngaich kiröönngöre inrē ök tahëng ma-ahānga nö höngkūö ò.

⁴Ngaich ngö ṙô tö ò, Fal man, ve-ekūö ngòh ṙāltarik, ngö ṙô, Aṅhaṅvö an min Yērusalem nö sā tuhēt nö öt kinlōnguvö tö ihong, tökūö ṙôken tarik ṙôken nuā inrē nö ël e.

⁵Pò chu min chū-ö tameūyö kinlonglö ò öich vinngö, ṙô ngam Mā Tēv, ngaich chū-ö min inrē ellōn ò öich kanôlò ò.

⁶Mah! mah! Falngöre yin ṙāngö ngam panam lā kapā, ṙô ngam Mā Tēv: tön pirātngen yīö chin marôvat sā në töfën lā kuföt ngam halīöngö, ṙô ngam Mā Tēv.

⁷Mah Sīyôn! Falngöre man, me-eṅ mī-iyöng im kikānö kūön Pēpilön.

⁸Tön ngö ṙô An ngam Mā Tēv yip tömaṙôngö: Unôichrit ngam kanôlò anga-aṅ nö tīngen chu in yip pumnāmö tarik yip kamil inlānen meh: pò ò ngam lamūölken meh nö lūölngöre tī tö ngam tö-isoh elmat ò.

⁹Yĕh meuk, pò chu min hateut kël re in cha, ngaich cha-a min nö pôḵ cha yip kūön alaha cha sin: ngaich yī-ö min akahalōn tö ngam Mā Tēv yip tömaṙôngö nö tīnten chu.

¹⁰Tikökṙôre yik inrē haṙamlōn re, Ō me-eṅ kikānö kūön Sīyôn: yĕh meuk, pò chu yih ngaich i yöng ellōn meh min, ṙô ngam Mā Tēv.

¹¹Ngaich maṙôngö min pumnāmötarik nö hamūltöre nö im Mā Tēv ip sakāmö angū-ö, ngaich nö tarik chu min inrē: ngaich chū-ö min iyöng ellōn meh, ngaich akahalōn min me-eṅ tö ngam Mā Tēv yip tömaṙôngö nö tīnten chu in meh.

¹²Ngaich ngam Mā Tēv min nö amīnū tö Yūtā nö min-chöö-ö ò nö im töhet panam, ṙòngmö sönen an min nö atöllen Yērusalem.

¹³Uh yin ṙô-òv i kūö ngam Mā Tēv, ṙòkhöre yī-ö tarik: tön aṅhen an nö ngaich nö ṙā-ang im töhet chūök re.