Read Car_Nicobarese SAKARIĀ 3 Bible Online

SAKARIĀ 3 - Car_Nicobarese bible

SAKARIĀ 3

¹Ngaich aga-aṅ nö hameukhö-mat chu tö Yôsuā ök mākūö kūönṙô nö sökhaka nö i kūö ök ma-ahānga aṅ im Mā Tēv, sökhak inrē satān nö lā hāmö nö lā-al ò.

²Ngö ṙô ngaich ngam Mā Tēv tö satān, Ō Satān, vëka man tö ngam Mā Tēv; hôṅ, ngam Mā Tēv ngam ma-atöllen Yērusalem nö vëken meh: röh öng angū-ö nö hanūkūö tameūyö tötöknyu nö ṙā-ang i kūö tameūyö?

³Ngaich ang Yôsuā nö hayūtöre tö tömūmu mat inyut, nö sökhaka nö i kūö ngam ma-ahanga.

⁴Sapṙô ngaich anga-aṅ vë-ekūö cha inrē yik tösökhaka nö i kūö ò, nö gö ṙô, Kēngö minë tömūmu inyut ṙā-ang in ò. Ngaich ngö ṙô anga-aṅ tö ò, Yĕh meuk, tinī-iv chin tö ngam tökööl meh nö ṙāngen meh, ngaich chin hayūtö meh min tö töpōiṙāi hilā.

⁵Ngö ṙô chū-ö ngaich, Hökngen cha nö sumpīövlö tövai sapīöv rācha nö i kui ò. Lökten cha nö sumpīövlö tövai sapīöv rācha nö i kui ò, ngaich hayūtan tö tökiröng inyut; sökhaka inrē ök ma-ahanga ngam Mā Tēv nö ranghen ò.

⁶Ngaich ök ma-ahānga ngam Mā Tēv nö asah ṙô Yôsuā, nö ngö ṙô,

⁷Ngö ṙô an ngam Mā Tēv yip tömaṙôngö: Yē meh min lök el në talöökö chu, yē meh min inrē haköp chöngö chu, ngaich me-eṅ min inrē ma-akah fālen el patī chu, ngaich min inrē öm hayōm në elmilūkö, ngaich chū-ö min inrē kētö chūök meh in cha vē samökhaka.

⁸Ō Yôsuā me-eṅ mākūö kūönṙô, hangihtöre, me-eṅ tö më holmeh inrē më amūchhaka nö i kūö meh; tön tarik yin nö minkahngö; yĕh meuk, pò chu min kēnyö öp tarik re öp Pak.

⁹Yĕh meuk, ngam ihong ṙahātö chu nö i kūö Yôsuā; sat nun minë mat nö im töhĕng ihong: yĕh meuk, ka-iphöt öp töka-iphötvö chin min in e, ṙô ngam Mā Tēv yip tömaṙôngö, ngaich min inrē i ël töhĕng sumkam öich kēngö tökööl ngam panam.

¹⁰Ip sakāmö angū-ö, yi-ö min kö holrevö ṙô öi havëken höö elkatòh ngam vāin elkatòh ngam anychīr chōn inrē, ṙô ngam Mā Tēv.