Read Car_Nicobarese SAKARIĀ 5 Bible Online

SAKARIĀ 5 - Car_Nicobarese bible

SAKARIĀ 5

¹Ngaich chū-ö môklökūöre, ngaich meuk, yĕh meuk hĕng ök kumteū tölömhakṙen.

²Ngaich gö ṙô anga-aṅ tö chu, Suāp maheuṅk meh? Sapṙô chū-ö ngaich öich ngö ṙô, Meuk kumteū chin tölömhakṙen; nët anāi sumkôngö rôtòng ana, söm sumkôngö ṙôkti inrē.

³Ngö ṙô ngaich anga-aṅ tö chu, Rinôichngen an nö kiröönngöre nö keuheūtkūö ngih panam: pòn ṙòkhöre min yip mu-ulāya nö ahetlöngö nö ṙā-ang im töhĕng lā nö asā-a e; ṙòkhöre min inrē yip töchūökuṙô nö ahetlöng im tahëng lā nö asā-a e.

⁴Tinī-iv chin min tö e nö kiröönngöre, ṙô ngam Mā Tēv yip tömaṙôngö, ngaich el patī öp mu-ulāya min angū-ö nö kuhēthötre, el patī ò inrē öp töminyôiny-aṅ nö chūökuṙô nö i minë-eny chu: ngaich köpngö min angū-ö nö ellōn öp patī ò, ngaich keuheūt min angū-ö tö nup savach e tö nup ihong e inrē.

⁵Ngaich ök ma-ahānga ök vamë-eṅkūö chu nö kiröönngöre, ngaich ngö ṙô tö chu, Môklökūöre man, öm meuk ngih kumröönngöre.

⁶Ngaich ngö ṙô chū-ö Asuh ön? Ngö ṙô ngaich anga-aṅ, Ëfah an ngam kumröönngöre. Ngö ṙô inrē anga-aṅ, Ötlanöökö an angū-ö i në panam nö ṙòkhöre.

⁷Yĕh meuk, hĕng tāk ap tömitāk pirum töhatāilöng: kikānö an anga-aṅ ngam amūichhak nö ellōn ngam kinlah lumngan.

⁸Ngö ṙô ngaich anga-aṅ öt lanöökö-an angū-ö sukten ò ngaich anga-aṅ nö ellōn ök Ëfah: suktö ök pirum inrē anga-aṅ kinlah lumngan nö elvāng ò.

⁹Ngaich môklökūöre chū-ö, ngaich meuk, yĕh meuk, nët tak nak kikānö yamihtöre,ngaich ngam kuföt nö i rōi sanëòk cha; sanëôku cha-a tö tösā sanëôk istôk: ngaich cha-a nö chātlö ök kinlah kumgan nö ihôi ngam tumlat tö ngam halīöngö.

¹⁰Ngö ṙô chū-ö ngaich tök ma-ahānga ök vamë-eṅkūö chu, Kū-ö töyih aich nö chāt ngam Ëfah?

¹¹Ngö ṙô ngaich anga-aṅ tö chu, Hòṅ vīlö patī re an nö ip panam Sīnar: ngaich yē e nö lēn, ngaich ha-ūichlöng min anga-aṅ nö in e nö el chūök re takô.