Read Car_Nicobarese SAKARIĀ 6 Bible Online

SAKARIĀ 6 - Car_Nicobarese bible

SAKARIĀ 6

¹Ngaich hēk chū-ö môklökūöre, ngaich meuk, yĕk meuk, fënnòng nup inröl yamih nö löknyö hôi nuk tönët rôngö; ngaich nup rôngö nö mās nö ṙôngö.

²Tangāṅv nuk kōra ik raneh inröl; ngaich töhuṙing nuk kōra ik innëtö inröl;

³Tö-isoh nuk kōra ik linūöyö inröl: ngaich ik finënö inröl tötukāṙö kaha tökalēḵ kōra.

⁴Ngaich chū-ö sapṙô ök ma-ahānga ök vamë-eṅkūö chu öich ngö ṙô, Asuh ön në, mā chu?

⁵Ngaich ök ma-ahānga nö sapṙô chu ngö ṙô, Anū-ö nun në töfën kuföt ngam halīöngö, në kumröönngöre nö ṙā-ang i sinökhaka i kūö ngam Mā në taṙòkhöre tumlat.

⁶Ngam inröl i minë töhuṙing kōra kiröönngöre nö kū-ötö im panam lā kapā; ngaich minë tö-isoh inrē nö tömrit u; kiröönngöre inrē minë tötukāṙö kaha nö kū-ötö ngam panam lā lòhngö.

⁷Kiröönngöre minë tökalēḵ inrē nö lukkenre nö kiröönngöre pòn hòṅ keuheūt kū-ö re nö im tumlat: ngö ṙô ngaich anga-aṅ, Ṙeū-eung ihih man, kiröönngöre keuheūt kū-ö re im tumlat, Kiröönngöre ngaich anū-ö nö keuheūt kūö ngam tumlat.

⁸Ngaich hūken chu anga-aṅ ngaich vë-ekūö chu, nö ngö ṙô, Yĕh meuk, cha-a më kumröönngöre tökū-ötö ngam panam la kapā ngaich yin nö pichöömtö ngam Fanöinylö chu im panam lā kapā.

⁹Ngaich yih ngam ṙô ngam Mā Tēv nö in chu, nö ngö ṙô,

¹⁰Kē aṅ in cha yip töhakövö, aṅ in Heltai, aṅ in Tōpīchā aṅ in Yētiyā; yih me-eṅ inrē ip sakāmö angū-ö, ngaich chuh el patī Yôsiyā öp kikōnyö kūön Sefaniā, ip lööṙö cha nö yih nö ṙā-ang Pēpilön;

¹¹Hôṅ, in cha man kē rupīö humlum inrē, ngaich vī nup sapīöv rācha, sumpīövlöng ngaich i kui, Yôsuā öp kikōyö kūön Yēhōsatak, öp makūö kūönṙô;

¹²Vë-ekūö ò, ngö ṙô, Ngö ṙô-an ngam Mā Tēv yip tömaṙôngö, Yĕh meuk, öp tarik öp tö minenyuvö tö Pak; sīöplö ap min nö löklö ip chūökre, ngaich anga-aṅ min nö mānlö ngam töhet chūök ngam Mā Tēv:

¹³Anga-aṅ ap min mamānlö ngam töhet chūök ngam Mā Tēv; ngaich anga-aṅ min tö-īnu tö kanôlò, ūichhak min inrē nö hayöng nö el kantēra re kūön ṙô ap min inrē nö el kantēra re: ngaich ngam tölām inlēnö min nö ihôi cha nö nët re taka.

¹⁴Ngaich nup sapīöv rācha min nö in Heltai in Tōpīcha, in Yētīya, in Yôsiyā inrē öp kikōnyö kūön Sefaniā, nö inköpkölōn nö el ngam töhet chūök ngam Mā Tēv.

¹⁵Ngaich cha-a min yip tömarôvat nö yih ngaich mānlö ngam töhet chūök ngam Mā Tēv, ngaich akahalōn yī-ö min tö ngam Mā Tēv yip tömaṙôngö nö tīnten chu nö in yīö. Ngaich teungtökūö angū-ö min, yē yīö min haṙēmngenre hangṙô ngam Mā Tēv ngam Tēv yīö.