Read Car_Nicobarese SAKARIĀ 7 Bible Online

SAKARIĀ 7 - Car_Nicobarese bible

SAKARIĀ 7

¹Ngaich ngö inlahen angū-ö ik finën samyeūheu ök rācha Tērīös, ngam ṙô ngam Mā Tēv nö yih nö in Sakariā im finën sumkam ngam minchūötöre chingëṅt, Kisliv.

²Ngaich yik aṅ Pētĕl nö tīnten Sāresar Rīkĕmelek inrē, tö yik tarik cha, nö havëkö kumchiklōn ngam Mā Tēv,

³nö vë-ekūö yik kūönṙô ngam patī ngam Mā Tēv yip tömaṙôngö, yip pròfĕt inrē nö ngö ṙô, Peuiny öich min ip tinneūyö chingëṅt, öich haköhngenre, öich sā re ṙung i në töṙōl samyeūheu?

⁴Ngaich yih ngam ṙô ngam Mā Tēv yip tömaṙôngö nö in chu, nö ngö ṙô;

⁵Vë-ekūö yip tarik ngam panam nö ṙòkhöre, tö yip kūönṙô, ngö ṙô, Hē yīö misī ahik haṙīvölōn inrē im tinneūyö ane inrē sinatö chingëṅt, i në tösat anai samyeūheu, kô-en öi ahik in chu, chū-ö takô?

⁶Ngaich hē yīö nyā, hē yīö òk inrē, röh öyih höng kahang kūöre nyā höng kahang kūöre òk inrē?

⁷Hö-ö öyih hòṅ hang në ṙô në ṙô ngam Mā Tēv nö hū-a nö lökten in yik mu-urĕh pròfĕt, hē Yērusalem misī nö āṅhavkūö kôlò inrē, nup elpanam inrē in e mahavīlen e, aṅhaṅvkūö inrē ngam lòhngö töṙā-akūö panam?

⁸Ngaich yih ngam ṙô ngam Mā Tēv nö in Sakarīa nö ngö ṙô,

⁹Ngö ṙô an ngam Mā Tēv yip tömaṙôngö, Kēken tökô-en inkaha fālen, hameuktö neūkölōn re miṙēlōn re inrē kö i holre tarik:

¹⁰Un kirāchtu kui tafīösi un rēhĕn kūönyōich, un rēhĕ aṅ tahëng, un rēhĕn yāich; un hĕng tak tö yīö inrē töchōichö ellōn nö i holre.

¹¹Sōḵ pöri misī cha-a nö hang, ngaich hapung tö kūö hanīöng re, tilup ngö elngang re inrē, pò cha nö sōḵ nö hang.

¹²Hòṅ vīngö ellōn re cha-a nö sā töngëḵ ihong, pòn sōḵ nöhang ngam chöngö, minë ṙô ngam Mā Tēv yip tömaṙôngö inrē tötīntu tö ngam Fanöinylö nö löktö eltī yik mu-urĕh pròfĕt: lökten nö yih nö umuh ök yöng lanīnö aṅ im Mā Tēv yip tömaṙôngö.

¹³Ngaich ngö inlahen angū-ö, ik hē ò nö hū-a, ngaich hö-ö cha-a nö hòṅ hang; lökten cha min nöng hū-a, ngaich hö-ö chū-ö hòṅ hang, ṙô ngam Mā Tēv yip tömaṙôngö;

¹⁴Ngaich pöri chū-ö min pirātngen cha aṅtī tö lamfeui kuföt i vē pumnāmö vē tötmikah kūö cha. Ngatī lökngen ngam panam ngaich nö payāyi unôichrit cha, tö lökten nö öt lökö tö tarik öt rēhĕn nö havan: pò cha nö ngaich nö piyāingö ngam tölöök panam.