Read Car_Nicobarese SAKARIĀ 9 Bible Online

SAKARIĀ 9 - Car_Nicobarese bible

SAKARIĀ 9

¹Ngam lumngam ngam ṙô ngam Mā Tēv nö i kui öp panam Hatrak, Tamaskös inrē chūök e min nö ṙātu: hòṅ ngam Mā Tēv nö i tarik mat i kui nup miyöngö Israel inrē:

²Hamat inrē nö öp kūöngö e: Tūrös, Sītōn inrē, pòrô anga-aṅ nö tö-akaha.

³Ngaich ang Tūrös nö mānlö töngëḵ chūökre, afônglö rupīö inrē nö sā tumlat, töpahīöya humlum inrē nö sā tilin i talöökö.

⁴Yĕh meuk, kēngö minë chehen ò an min ngam Mā, ngaich anga-aṅ min nö hachök ngam minā-aṅ ò nö el mai, ngaich anga-aṅ inrē min nö ṙāpngö tökūö tameūyö.

⁵Meūkö e min Askēlòn, ngaich pa-ekūö; Kasā inrē, ngaich kiröngö inlöinyö min; Ĕkròn inrē, pò ò min nö sirōngkūö töp maheūṅkköre: Ngaich ap rācha min nö rö-ö nö i Kasā, öt aṅhaṅvkūö min inrē Askēlòn.

⁶Ngaich öp tötyöngu min tö kikōnyö nö i yöng Astòt ngaich chū-ö min inrē rökngen inkeūlen yip aṅ Filistia.

⁷Löknyö elvāng ò tī chin min kēnyö öp mahām ò meuk sin-òkkūö tī ò löknyö ihôi kanap ò; anga-aṅ min inrē chööḵṙen nö im Tēv hī: ngaich min inrē anga-aṅ nö kun mā nö i Yūtā Ĕkròn inrē sā öp aṅ Yapus.

⁸Ngaich chū-ö min iyöngtöre havīlö ngam patī re lā-al yip kumyung, ngaich öt hĕng tak min lamöknyö umuh hēk öt mahavantörevö: öt lök umuh inrē min öp mahakihten nö hēk pò chu ngaich kôta mat öich meuk.

⁹Ō kikānö Sīyôn, kiröngen inṙamlōn man; hū-a man, Ō kikānö kūön Yērusalem: yĕh meuk, yih an ngam rācha meh nö in meh tölöök an, aṅhaṅv-in inrē tö inyööken; yāich an i uk kötta an, i uk kūön kötta inrē.

¹⁰Ngaich chū-ö min rökngen öp inröl nö i Ifrēm, öp kōra inrē nö i Yērusalem, rökiṙen min inrē ngam linreny kumyung; ngaich anga-aṅ min nö in vē pumnāmö tarik nö ṙôtö lanāmö; ngaich öp pūlngö ò min nö löktökūö im mai söl im tahëng mai, löktökūö im Tahël söl i manā-angkūö ngam tumlat.

¹¹Me-eṅ pöri inrē, kūö ngam mahām aṅ im chöngö meh ngaich chin tīnngörit yip tökē-ĕ tö meh nö ṙā-ang el ap tö-ūlö öp töt aṅhaṅvö tö mak.

¹²Havantöre yin min im töngëḵ chūökö, yī-ö mameūka tökē-ĕ, ṙô-òv chin töngamuh tö chu min nëtö tī inmeh.

¹³Pò chu ngaich yupūtten Yūtā nö in chu, hatööḵlö ngam linreny chin ngaich tö Ifrēm; ngaich inrē chū-ö mi tiṙōl alaha yip kūön meh kikōnyö, Ō Sīyôn, nö lā-al yip kūön meh kikōnyö, Ō Krīs, ngaich inrē min vīlen meh sā fël öp tökalēḵ tarik.

¹⁴Ngaich min inrē ngam Mā Tēv nö meūkö nö i kui cha ap chòk ò min inrē sā röön hanyālö nö kiröönngöre: ngaich min ngam Mā Tēv nö föönyö kūö ngam römpĕt, ngaich kiröönngöre min nö lā lòhngö nö holröön tö lamfeui kuföt.

¹⁵Ngam Mā Tēv yip tömaṙôgö an min lamaklen cha; ngaich cha-a min nö ngeūṅkhöti, rööntö kui nup chinvil ihong inrē òk min cha-a inrē, ngaich pōyen ṙënṙô min tökūö vāin: tööḵlö min cha-a sā tanöölö töchilū pingāṅl, sā nup sinkeukngö öp mīs.

¹⁶Ngaich ngam Tēv min ngam Tēv cha nö hayööken cha ip sakāmö angū-ö nö sā nup pököre yip tarik ò: pò cha min nö sā nup ihong i kui sapīöv rācha, nö pachāla elmat i kui ngam panam ò.

¹⁷Tö i ṙôkö ṙöng öng ngam lanöökö i ṙôkö inrē ngam vanāyö! Kôlò yip min ṙāl tarik tökūö sāiny, yip ṙālö kikānö inrē tökūö tufömngöre vāin.