Read Car_Nicobarese MALAKI 1 Bible Online

MALAKI 1 - Car_Nicobarese bible

MALAKI 1

¹Ngam lumngan ngam ṙô ngam Mā Tēv nö in Israĕl nö lökten in Malakī.

²Hāngenlōn chin tö meh ṙô ngam Mā Tēv. Sönen yī-ö gö ṙô, Isuh ap hanāngelōn meh tö ih? Röh ök Isô nö mëm Yāköp? ṙô ngam Mā Tēv: Sönen chū-ö hāngenlōn tö Yāköp.

³Surīkhen Isô pöri chū-ö, ngaich vīten minë rôngö ò nö töt aṅhaṅvkūö, ngaich kēngö ngam amin ò nö i nup am elinchōn el ngam tönyalnyi.

⁴Löknyö ṙô Ētöm nö ngö ṙô, Ngaich in ötkô, havantöre pöri min ayī-ö mānö inrē, i minë töt aṅhaṅvkūö chūökö; ngö ṙô an ngam Mā Tēv yip tömaṙôngö, Mānö yip min, tiṙölhanga pöri chū-ö min: ngaich min yip tarik nö kaheukngen cha nö kūöngö panam öt lanöökö ane inrē tarik chūök lanīnö ngam Mā Tēv nöng örheūheu.

⁵Meuk nun min minë mat yīö, ngaich ngö ṙô yī-ö min, Hapōilöng an yēḵ ngam Mā Tēv nö vāngngö tö kūöngö panam Israĕl.

⁶Milēḵṙen an ngam nyīö kikōnyö tö ngam yöng re kikōnyö, ngam tarik alaha inrē tö ngam yöngṙen re. Ngaich yē chu chū-ö öich yöng, isuh ap minlēken chu? Yē chu chū-ö inrē yöngṙen, isuh ap pinhë-eṅ chu? ṙô ngam Mā Tēv yip tömaṙôngö nö in yīö, Ō yī-ö kūönṙô, maha-āichngen mine-eny chu. Ngaich ngö ṙô yī-ö, Sitih tī öi ha-āichngen mine-eny meh?

⁷Kētö rôti yin tömūmu el ngam tahāklö chu. Ngaich ngö ṙô yī-ö, Sitih tī öi hamumgen meh? Ngö ṙô ngaich yī-ö in e, Töng yô-òv an ngam tahāklö ngam Mā Tēv.

⁸Ngaich yē yīö kētö tötmeuk nö tökētu, ngaich rö-ö hòng angū-ö nö tötlöök? Ngaich yē yīö kētö tökaròk tövahav inrē, ngaich rö-ö hòng angū-ö nö tötlöök? Kēten e yĕh töngamuh ip mahayöng; ṙāmölōn öp öre? Nö in meh ṙô ngam Mā Tēv yip tömaṙôngö.

⁹Vë-ekūö meh chin, yĕh havëkö chinòngkūöre man töngamuh im Tēv, hòṅ ò nö aṙē-ĕlōn tö hī: tö ngatī an nö lökten in meh: hō-o e ang min nö pò meh öm më-eṅ? ṙô ngam Mā Tēv yip tömaṙôngö.

¹⁰Mah hĕng tak öp öre in yīö lamöptökūö minë inkūp, hòṅ yīö öt tōttökūö tameūyö öi höng tötöl el ngam tahāklö chu! Hö-ö chin kuchīkölōn in yīö, ṙô ngam Mā Tēv yip tömaṙôngö, öt rēhĕn chin min hō-o tökētu ṙā-ang eltī yīö.

¹¹Pò e nö löktökūö maneutlö ngam tavūöi söl im maneuttö ò ngam minë-eny chu nö kiröng nö in yip tahëng mihëṅṙö tarik; ane inrē keuheūtngöre chūök lōpān nö kētu nö I minë-eny chu, töhet inrē tökētu: pò ngam minë-eny chu nö kiröng nö in vē tahëng mihëṅṙö tarik ṙô ngam Mā Tēv yip tömaṙôngö

¹²Hachōichngen e pöri yī-ö, pò yīö ngö ṙô, Hamūmiyö an ngam tahāklö ngam Mā Tēv, nup ṙòng chōn inrē, ël e, nup alaha kāḵ ò inrē, nö töng yô-òv.

¹³Ngö ṙô yī-ö inrē, Yĕh meuk, yöng chanëyö an angū-ö! Ngaich yī-ö tongken e, ṙô ngam Mā Tēv yip tömaṙôngö ngaich yī-ö inrē kētö nup töng kīlö, tökaròk, tövahavö inrē; ngatī kum yī-ö tö tökētu: Hō-o tö ngatī öich pökeh ṙā-ang eltī yīö? ṙô ngam Mā Tēv.

¹⁴Pòḵ ranôich pöri yēḵ ngam mahachīl, ngam töaṅhaṅv-in tö kōiny in nup töhĕng kiteūm pököre ò, kilēḵngôre inrē nö chūöku ṙô, nö kētö töng vahavö nö im Mā: nö tökētu pò chu öich tökiröng Rācha, ṙô ngam Mā Tēv yip tömaṙôngö, pinhë-eṅkūö an ngam minë-eny chu nö in vē tahëng mihëṅṙö tarik.